រាជធានីភ្នំពេញ ៖ បុរសម្នាក់បើករថយន្តប៊ែនដឹកដីមួយគ្រឿងបោះពួយយ៉ាងលឿន ក៏ជ្រុលទៅបុកពីក្រោយម៉ូតូកង់បី និងរថយន្តចំនួន៣គ្រឿងទៀតបន្តកន្ទុយគ្នាដែលកំពុងឈប់រង់ចាំស្តុបពេញទំហឹងតែម្តង បណ្តាលឲ្យបុរសម្នាក់បាត់បង់ជីវិតខណៈពេលបញ្ជូនទៅដល់មន្ទីរពេទ្យ និងរងរបួសធ្ងន់ចំនួន២នាក់ ។ ហេតុការណ៍ដ៏នេះបានកើតឡើងកាលពីវេលាម៉ោង៦និង៤០នាទីយប់ ថ្ងៃទី១៥…
រាជធានីភ្នំពេញ ៖ បុរសម្នាក់បើករថយន្តប៊ែនដឹកដីមួយគ្រឿងបោះពួយយ៉ាងលឿន ក៏ជ្រុលទៅបុកពីក្រោយម៉ូតូកង់បី និងរថយន្តចំនួន៣គ្រឿងទៀតបន្តកន្ទុយគ្នាដែលកំពុងឈប់រង់ចាំស្តុបពេញទំហឹងតែម្តង បណ្តាលឲ្យបុរសម្នាក់បាត់បង់ជីវិតខណៈពេលបញ្ជូនទៅដល់មន្ទីរពេទ្យ និងរងរបួសធ្ងន់ចំនួន២នាក់ ។ ហេតុការណ៍ដ៏នេះបានកើតឡើងកាលពីវេលាម៉ោង៦និង៤០នាទីយប់ ថ្ងៃទី១៥ ខែកុម្ភៈ ឆ្នាំ២០២១ ត្រង់ចំណុចស្តុបបាគូ តាមបណ្ដោយផ្លូវ៥០ម៉ែត្រ ស្ថិតក្នុងសង្កាត់ជើងឯក។
តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញមានរថយន្តចំនួន៣គ្រឿង និងម៉ូតូកង់បីឥណ្ឌាមួយគ្រឿងកំពុងឈប់រង់ចាំស្តុបបាគូ ដោយរថយន្តទី១ម៉ាកតូយ៉ូតាព្រូស ពណ៌ស ពាក់ស្លាកលេខ ភ្នំពេញ2BI-1766 បើកបរជាលក្ខណៈគ្រួសារមានគ្នា៣ទៅ៤នាក់។ រថយន្តទី២ ម៉ាកតូយ៉ូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2BA-4719 បើកបរដោយបុរសម្នាក់ និងបានបន្តពីក្រោយរថយន្តតូយ៉ូតាព្រូសខាងលើ ។
ប្រភពដដែលបន្តថា រីឯរថយន្តទី៣ ជារថយន្តកុងតឺន័រ ម៉ាកហ៊ីណូ ពណ៌បៃតង់លាយលឿន ពាក់ស្លាកលេខ ភ្នំពេញ 3A-7372 បើកបរដោយបុរសម្នាក់ និងកំពុងឈប់រង់ចាំស្តុបទន្ទឹមខាងស្តាំរថយន្តទាំង២គ្រឿងខាងលើ ។ ចំណែកឯម៉ូតូកង់បីឥណ្ឌាមួយគ្រឿងទៀតម៉ាកបាចា ពណ៌ក្រហម ពាក់ស្លាកលេខ ភ្នំពេញ1GS-6894 បើកបរដោយបុរសជាប្តី និងស្ត្រីជាប្រពន្ធ រួមទាំងកូនប្រុសអាយុ១៣ឆ្នាំម្នាក់ទៀតរួមដំណើរពីក្រោយ បានកំពុងឈប់រង់ចាំស្តុបនៅពីក្រោយរថយន្តទាំង៣គ្រឿងនោះ រួមជាមួយយានយន្តជាច្រើនគ្រឿងទៀតផងដែរ។
ប្រភពដដែលបន្តថា ស្របពេលនោះ ស្រាប់តែមានរថយន្តប៊ែនដឹកដីមួយគ្រឿងទៀតម៉ាក UD TRUCKS ពណ៌ស ពាក់ស្លាកលេខ ចង្កូតស្តាំ PP-2760 បើកបរដោយបុរសម្នាក់ តាម
បណ្ដោយផ្លូវ៥០ម៉ែត្រ ទិសដៅពីកើតទៅលិច និងក្នុងល្បឿនយ៉ាងលឿន។ លុះដល់ចំណុចស្តុបកើតហេតុ រថយន្តប៊ែនដឹកដីនោះ ក៏បានជ្រុលចង្កូតទៅបុកពីក្រោយម៉ូតូកង់បីឥណ្ឌាទាំងកំរោល និងរុញម៉ូតូកង់បីឥណ្ឌាទៅបុកផ្ទប់ពីក្រោយរថយន្តកុងតឺន័រពេញទំហឹងទៀត ។
ប្រភពដដែលបន្តទៀតថា ហើយរថយន្តប៊ែនដឹកដីនោះដោយមិនទាន់អស់ល្បឿន ក៏បន្តជ្រុលទៅមុខទៀត រួចក៏ទៅបុកពីក្រោយរថយន្តតាកូម៉ាព្រូស ពណ៌ទឹកប្រាក់ ធ្វើឲ្យរថយន្តរុញទៅបុកបន្តពីក្រោយរថយន្តតូយ៉ូតាព្រូស ពណ៌ស ដែលឈប់នៅខាងមុខគេ បណ្តាលឲ្យរងការខូចខាតក្រពឹតកាងផ្នែកខាងក្រោយ។ រីឯរថយន្តតូយ៉ូតាព្រូស ពណ៌ទឹកប្រាក់ បានរងការខូចខាតក្រពឹតទាំងផ្នែកខាងមុខ និងខាងក្រោយយ៉ាងដំណំ។
ប្រភពដដែលបន្តទៀតថា ចំណែកឯរថយន្តកុងតឺន័របានរងការខូចខាតបន្តិចបន្តួច រីឯម៉ូតូកង់បីឥណ្ឌាវិញបានរងការខូចខាតស្ទើរទាំងស្រុង និងបណ្តាលឲ្យបុរសជាអ្នកបើកបរត្រូវជាប្តីវ័យ៥០ឆ្នាំបានរងរបួសបាក់ជើងខាងឆ្វេងសន្លប់ស្ដូកស្ដឹង រីឯស្ត្រីជាប្រពន្ធ និងកូនដែលរួមដំណើរពីក្រោយបានរងរបួសធ្ងន់។ ដោយឡែករថយន្តប៊ែនដឹកដីបង្កបានរងការខូចខាតក្រពឹតផ្នែកកាងខាងមុខ ភ្លាមៗនោះអ្នកបើកបររថយន្តក៏បានបើកទ្វាររថយន្តចុះរត់គេចខ្លួនចេញពីកន្លែងកើតហេតុបាត់ស្រមោលតែម្តង។
បន្ទាប់មកមានគ្រោះថ្នាក់ចរាចរណ៍បុកបន្តកន្ទុយគ្នាខាងលើនេះ ក៏មានរថយន្តរបស់គ្លីនិកឯក ស៊ឹងម៉ារី បានមកដឹកយកបុរសជាប្តីបញ្ជូនទៅសង្គ្រោះនៅឯមន្ទីរពេទ្យព្រះកុសុមៈ។ ចំណែកឯប្រពន្ធ និងកូនក៏ត្រូវបានរថយន្តរបស់គ្លីនិកឯកមួយទៀតដឹកយកទៅធ្វើការសង្គ្រោះភ្លាមៗ។ តែជាអកុសលបុរសរងគ្រោះជាប្តីក៏បានបាត់បង់ជីវិត ខណៈពេលដែលដឹកបញ្ជូនទៅសង្គ្រោះនៅឯមន្ទីរពេទ្យព្រះកុសុមៈទៅហើយ។
ក្រោយពេលកើតហេតុដោយរថយន្ត តូយ៉ូតាព្រូស ពណ៌ស មិនចង់មានរឿងរ៉ាវវែងឆ្ងាយ ក៏ព្រមបើករថយន្តចេញពីកន្លែងកើតហេតុយកទៅជួសជុលដោយខ្លួនឯង។ ដោយឡែករថយន្តទាំង៣គ្រឿង និងម៉ូតូកង់បីឥណ្ឌា ក៏ត្រូវបានសមត្ថកិច្ចជំនាញធ្វើការវាស់វែង រួចយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយទៅតាមផ្លូវច្បាប់ជាបន្តទៀតនៅពេលក្រោយ ។ រីឯសពជនរងគ្រោះមិនបានស្គាល់អត្តសញ្ញាណទេ ត្រូវបានសាច់ញាតិដឹកយកទៅធ្វើបុណ្យតាមប្រពៃណីនៅស្រុកកំណើតហើយ ៕
ចែករំលែកព័តមាននេះ