បារាំង ៖ លោក Mauricio Pochettino បង្ហើប​ឱ្យ​ដឹង​ថា​គាត់​មាន​ទំនុកចិត្ត​ខ្ពស់​លើ​កូនក្រុម​របស់​គាត់​ថា​នឹង​អាច​យកឈ្នះ​ម្ចាស់ផ្ទះ Barcelona នៅ​ជំនួប​ជើង​ទី​១​វគ្គ​១៦​ក្រុម Champions League នា​ថ្ងៃ​ទី​១៦ ខែ​កុ​ម្ភះ ឆ្នាំ​២០២១ ឆាប់​ៗ​ខាង​មុខ​នេះ​។

PSG នឹង​ត្រូវ​អវត្តមាន​តារា​ឆ្នើម Neymar សម្រាប់​ជំនួប​ជើង​ទី​១​ដ៏​សំខាន់​មួយ​នេះ ដោយសារ​បញ្ហា​របួស​ភ្លៅ​កាលពី​ការ​ប្រកួត​ពានរង្វាន់ French Cup កន្លង​ទៅ​។ ទោះ​យ៉ាងនេះ​ក្តី​ក៏​លោក Pochettino បាន​បង្ហាញ​ពី​ជំនឿ​ចិត្ត​ខ្ពស់​ជាមួយ​លទ្ធផល​វិជ្ជមាន​សម្រាប់​ជំនួប​ខាង​មុខ​នេះ ។

គ្រូបង្វឹក PSG វ័យ​៤៨​ឆ្នាំ​ខាងលើ​បាន​ប្រាប់​ទៅ​កាន់ UEFA.com ថា «​ពិត​ណាស់​យើង​ត្រូវ​តែ​រៀបចំ​ផែនការ និង​គំនិត​ដ៏​ច្បាស់លាស់​បំផុត​មួយ​ចំនួន​អំពី​របៀប​វាយប្រហារ និង​វិធី​ដើម្បី​បញ្ឈប់ Barcelona មិន​ឱ្យ​មានឱកាស​ដាក់​សម្ពាធ​មក​លើ​យើង​។ ហើយ​យើង​តែងតែ​ជឿជាក់​លើ​កីឡាករ​ទាំងអស់​របស់​យើង ក្នុង​ការ​បំពេញភារកិច្ច​របស់​ពួក​គេ​តាម​មធ្យោបាយ​ល្អ​បំផុត និង​ទទួល​បាន​លទ្ធផល​ជា​វិជ្ជមាន​»៕ (​ដកស្រង់​ចេញពី Marca)