ខេត្តបន្ទាយមានជ័យ ៖ ប្រជាពលរដ្ឋខ្មែរម្នាក់ ធ្វើដំណើរដោយថ្មើរជើងចេញពីប្រទេសថៃ ឆ្លងដែនដោយខុសច្បាប់ ចូលមកកម្ពុជាវិញ ស្រាប់តែជួបគ្រោះថ្នាក់ ជាន់មីនដែលបន្សល់ទុកតាំងពីសម័យសង្គ្រាមតាមបណ្ដោយព្រំដែន ផ្ទុះដាច់ជើងខាងស្តាំត្រឹមជង្គង់ ត្រូវបានកម្លាំនគរបាលវរការពារព្រំដែនគោកលេខ៩១១…
ខេត្តបន្ទាយមានជ័យ ៖ ប្រជាពលរដ្ឋខ្មែរម្នាក់ ធ្វើដំណើរដោយថ្មើរជើងចេញពីប្រទេសថៃ ឆ្លងដែនដោយខុសច្បាប់ ចូលមកកម្ពុជាវិញ ស្រាប់តែជួបគ្រោះថ្នាក់ ជាន់មីនដែលបន្សល់ទុកតាំងពីសម័យសង្គ្រាមតាមបណ្ដោយព្រំដែន ផ្ទុះដាច់ជើងខាងស្តាំត្រឹមជង្គង់ ត្រូវបានកម្លាំនគរបាលវរការពារព្រំដែនគោកលេខ៩១១ ចូលទៅជួយ និងដឹកបញ្ជូនទៅសង្គ្រោះនៅក្នុងមន្ទីពេទ្យបង្អែក ទាំងយប់ ។
ហេតុការណ៍ផ្ទុះមីនលាន់កក្រើកដីខាងលើនេះ បង្កការភ្ញាក់ផ្អើលឡើងកាលពីវេលាម៉ោង៧ និង១០នាទីយប់ ថ្ងៃទី១៤ ខែកុម្ភៈ ឆ្នាំ២០២១ នៅត្រង់ព្រំដែនកម្ពុជា-ថៃ ស្ថិតនៅចំណុចច្រកព្រៃគប់ ស្ថិតនៅភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
ប្រភពព័ត៌មានពីមន្ត្រីនគរបាលការពារព្រំដែន បានឲ្យដឹងថា ជនរងគ្រោះបានចេញពីប្រទេសថៃ លួចឆ្លងដែនចូលមកក្នុងប្រទេសកម្ពុជាវិញ ដោយដើរកាត់តាមតំបន់ព្រៃភ្នំ ជាយក្រុងប៉ោយប៉ែត ខេត្តបន្ទាយមានជ័យ លុះពេលគាត់ដើរមកដល់ចំណុចកើតហេតុ ក៏ជួបនឹងគ្រោះថ្នាក់ ជាន់មីនបណ្តាលឲ្យដាច់ជើងខាងស្តាំបែបនេះ តែម្ដងទៅ ។
សមត្ថកិច្ចបានប្រាប់បន្តថា ជនរងគ្រោះមានឈ្មោះ យឿន រ៉ន ភេទប្រុស អាយុ៣៣ឆ្នាំ ជាប្រជាពលរដ្ឋរស់នៅភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
សមត្ថកិច្ច បានអោយដឹងទៀតថា ក្រោយទទួលព័ត៌មានថា មានប្រជាពលរដ្ឋជាន់មីន ដែលឆ្លងដែនដោយខុសច្បាប់ នៅយប់ថ្ងៃកើតហេតុខាងលើ លោក ឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដឹកនាំកម្លាំងចុះទៅដល់ទីតាំងកើតហេតុ និងជួយដឹកជនរងគ្រោះមកសង្គ្រោះ នៅមន្ទីរពេទ្យបង្អែកមង្គលបូរី ។
បច្ចុប្បន្ន ជនរងគ្រោះកំពុងសម្រាកព្យាបាលនៅក្នុងមន្ទីពេទ្យបង្អែកមង្គលបូរី ៕
ចែករំលែកព័តមាននេះ