រាជធានីភ្នំពេញ ៖ ប្រមុខដឹកនាំរាជរដ្ឋាភិបាលកម្ពុជា បានចេញបញ្ជាឲ្យរដ្ឋមន្ត្រីក្រសួងសុខាភិបាលលោក ម៉ម ប៊ុនហេង ជួបប្រជុំជាមួយរដ្ឋមន្ត្រីក្រសួងយុត្តិធម៌ លោក កើត រិទ្ធ…
រាជធានីភ្នំពេញ ៖ ប្រមុខដឹកនាំរាជរដ្ឋាភិបាលកម្ពុជា បានចេញបញ្ជាឲ្យរដ្ឋមន្ត្រីក្រសួងសុខាភិបាលលោក ម៉ម ប៊ុនហេង ជួបប្រជុំជាមួយរដ្ឋមន្ត្រីក្រសួងយុត្តិធម៌ លោក កើត រិទ្ធ ដើម្បីធ្វើវិសោតនកម្មនូវមាត្រាមួយចំនួនដែលពាក់ព័ន្ធនឹងការផាកពិន័យអន្តរការណ៍ចំពោះជនណាដែលគេចវេសមិនព្រមធ្វើចត្តាឡីស័ក ។
«មានបងប្អូនយើងមួយចំនួនបានលួចឆ្លង ពីព្រំដែនកម្ពុជា-ថៃ ហើយចូលមកផ្ទៃក្នុងប្រទេសដោយមិនបានធ្វើចត្តាឡីស័កនោះទេ ប៉ុន្តែនៅផ្នែកខាងក្រៅរបស់យើងដែលរួមមាន ភូមិ ឃុំ ស្រុក រហូតដល់ខេត្ត ជាពិសេសប្រជាពលរដ្ឋ គឺមិនព្រមឲ្យអ្នកដែលមកពីខាងក្រៅ ដោយមិនបានធ្វើចត្តាឡីស័ក ដែលនាំអាចទៅការឆ្លងដល់សហគមន៍នោះទេ ។ ដូច្នេះយើងបានយកបងប្អូនទាំងនោះ យកមកធ្វើចត្តាឡីស័កផងដែរ ប៉ុន្តែយើងមិនទាន់បានអនុវត្តនូវវិធានការទណ្ឌកម្មនៅឡើយ ។ នេះជាប្រសាសន៍របស់សម្តេចតេជោនៅក្នុងសារសម្លេងផ្សព្វផ្សាយនៅព្រឹកថ្ងៃទី ១៥ ខែកុម្ភៈ ឆ្នាំ ២០២១។
សម្តេចតេជោបានមានប្រសាសន៍បន្តថា «តែខ្ញុំគិតថាស្នើសុំឯកឧត្តមរដ្ឋមន្ត្រីក្រសួងសុខាភិបាលពិភាក្សាជាមួយឯកឧត្តមរដ្ឋមន្ត្រីក្រសួងយុត្តិធម៌ អាចធ្វើការកែតម្រូវធ្វើវិសោតនកម្ម មាត្រាទី ៨ ឡើងវិញ ដោយបង្កើនចំនួន ការពិន័យនេះ ឲ្យមានការកើនឡើង ព្រោះថាការពិន័យតិចតួចយ៉ាងនេះ គឺអាចនឹងធ្វើឲ្យអ្នកមានប្រាក់ចំណូលច្រើនគួរសមមិនខ្លាចនឹងការបង់ប្រាក់នោះទេ» ។
សម្តេចបន្តថា «ដូច្នេះខ្ញុំសូមស្នើឲ្យក្រសួងសុខាភិបាល ក៏ដូចជាមន្ត្រីមូលដ្ឋានអនុវត្តនូវមាត្រាទី ៨ ទាក់ទងនឹងការផាកពិន័យអន្តរកាល សម្រាប់អ្នកដែលគេចវេសពីការធ្វើចត្តាឡីស័កនេះឲ្យខានតែបាន ។ ពិន័យនេះគឺជាវិធានការស្រាលណាស់សម្រាប់ ប្រសិនបើមានបញ្ហាទាក់ទងទៅនឹងជំងឺឆ្លង» ។
យោងតាមមាត្រា៨ នៃអនុក្រឹត្យស្តីពី វិធានការសុខាភិបាលដើម្បីទប់ស្កាត់និងឆ្លើយតបការឆ្លងរាលដាលជាអន្តរជាតិនៃជំងឺនៅតាមច្រកចេញចូល ចុះថ្ងៃទី ១៧ ខែកញ្ញា ឆ្នាំ ២០១៥ បានចែងថា «អ្នកដំណើរ ឬការីនៃយានដឹកជញ្ជួនណាដែលគេចវះ មិនឲ្យមន្ត្រីចត្តាឡីស័កធ្វើការត្រួតពិនិត្យ ឬមិនសហការជាមួយនឹងមន្ត្រីចត្តាឡីស័កក្នុងការអនុវត្តវិធានការសុខាភិបាល ឬមិនបំពេញតាមបែបបទដែលមានកំណត់ក្នុងអនុក្រឹត្យនេះ ត្រូវទទួលពិន័យអន្តរការណ៍ជាប្រាក់ពី ២០ ម៉ឺនរៀល ដល់១លានរៀល ទៅតាមទំហំនៃបទល្មើស និងតម្រូវឲ្យអនុវត្តវិធានការសុខភិបាល» ។
សម្តេចបានបញ្ជាថារដ្ឋមន្ត្រីទាំង ២ រួប និងក្រុមប្រឹក្សាអ្នកច្បាប់ត្រូវរៀបចំធ្វើវិសោតកម្មអនុក្រឹត្យដែលមានរួចមកហើយនេះ តែពង្រឹងចំណុចទាក់ទិននិងការផាកពិន័យ «ដើម្បីធានាថាយើងអនុវត្តទៅនឹងមានប្រសិទ្ធភាព» ។
សម្តេចបានបន្តថានៅក្នុងអនុក្រឹត្យខាងលើនេះផងដែរ ក៏បានបញ្ជាក់ថា «ការទទួលពិន័យអន្តរការណ៍នេះមិនធ្វើឲ្យជនប្រព្រឹត្តបទល្មើសរួចផុតពីការទទួលខុសត្រូវព្រហ្មទណ្ឌដែលមានចែងនៅក្នុងច្បាប់និងបទប្បញ្ញត្តិព្រហ្មទណ្ឌជាធរមានឡើយ» ។ ដូច្នេះជនណាដែលក្លែងបន្លំឯកសារពាក់ព័ន្ធនឹងសុខភាព ក្នុងគោលបំណងគេចវេះពិការអនុវត្តវិធានការចត្តាឡីស័ក ត្រូវផន្ទាទោសតាមច្បាប់ព្រហ្មទណ្ឌជាធរមាន ។
សម្តេចបានបញ្ជាក់ថា ការធ្វើបែបនេះគឺដើម្បីធានាថាយើងត្រូវធ្វើឲ្យបានម៉ត់ចត់ អំពីការធ្វើចត្តាឡីស័កនេះ យើងមិនត្រូវមានការអត់ធ្មត់ ឬក៏មិនមានការមើលរំលងអនុវត្តលិខិតបទដ្ឋានគតិយុតរបស់រាជរដ្ឋាភិបាលទៅទៀតទេ ។ តែមុននេះយើងបានអនុវត្តខ្លះទៅលើអ្នកដែលបានរត់គេចចេញពីកន្លែងធ្វើចត្តាឡីស័ក សំដៅពលរដ្ឋខ្មែររស់នៅអាមេរិកវិលមកកម្ពុជាហើយរត់ចេញពីកន្លែងធ្វើចត្តាឡីស័កធ្លាប់អនុវត្តត្រឹម ២ ឬ ៣ ករណី រួចហើយ ៕
ចែករំលែកព័តមាននេះ