ខេត្តកំពង់ឆ្នាំង ៖ ដោយសារកត្តាគ្រោះថ្នាក់ចរាចរណ៍នៅតែជាបញ្ហាក្តៅគគុក ព្រោះតែបានសម្លាប់ និងបង្កឱ្យមនុស្សរងរបួសពិការជារៀងរាល់ថ្ងៃ នៅព្រឹកថ្ងៃទី១១ សីហា នាយការិយាល័យនគរបាលចរាចរណ៍ផ្លូវគោកខេត្ត
ខេត្តកំពង់ឆ្នាំង ៖ ដោយសារកត្តាគ្រោះថ្នាក់ចរាចរណ៍នៅតែជាបញ្ហាក្តៅគគុក ព្រោះតែបានសម្លាប់ និងបង្កឱ្យមនុស្សរងរបួសពិការជារៀងរាល់ថ្ងៃ នៅព្រឹកថ្ងៃទី១១ សីហា នាយការិយាល័យនគរបាលចរាចរណ៍ផ្លូវគោកខេត្ត បានដឹកនាំកម្លាំងនគរបាលចរាចរណ៍ខេត្ត ចុះផ្សព្វផ្សាយច្បាប់ចរាចរណ៍ផ្លូវគោកថ្មីនៅក្នុងគោលដៅ៣កន្លែង គឺនៅចំណតរថយន្ត ក្រុងកំពង់ឆ្នាំង មុខផ្សារព្រៃខ្មែរ និងមុខផ្សារពង្រ ស្រុករលាប្អៀរ ដើម្បីជួយទប់ស្កាត់ និងកាត់បន្ថយគ្រោះថ្នាក់ចរាចរណ៍ ។
លោក ឈឹម សារុន នាយការិយាល័យនគរបាលចរាចរណ៍ផ្លូវគោកខេត្ត បានឱ្យដឹងថា ក្រោយពីមានគោលការណ៍របស់លោកអគ្គស្នងការនគរបាលជាតិ លោកអភិបាលខេត្ត ជាប្រធានគណៈកម្មការសុវត្ថិភាពចរាចរណ៍ផ្លូវគោកខេត្ត និងលោកស្នងការនគរបាលខេត្ត កន្លងមក សមត្ថកិច្ចនគរបាលចរាចរផ្លូវគោកខេត្ត បានដាក់ប៉ុស្តិ៍ចល័តដើម្បីរឹងបណ្តឹងច្បាប់ចរាចរណ៍ ដោយមានការផាកពិន័យអ្នកជិះម៉ូតូពុំពាក់មួកសុវត្ថិភាព និងដាក់កញ្ចក់មើលក្រោយ បាញ់ល្បឿនរថយន្តដែលបើកបរលើសល្បឿនកំណត់ ក្នុងទីប្រជុំជន ផាកពិន័យអ្នកបើកបរគ្មានប័ណ្ណបើកបរ និងដឹកលើសទម្ងន់ជាដើម ។ ជាក់ស្តែង គ្រោះថ្នាក់ចរាចរណ៍រយៈពេល២ខែនេះ បានថយចុះគួរឱ្យគត់សម្គាល់ ។
កាលពីព្រឹកថ្ងៃទី១១ សីហា មន្ត្រីនគរបាលចរាចរណ៍ខេត្ត បានចុះផ្សព្វផ្សាយច្បាប់ចរាចរណ៍ផ្លូវគោកថ្មីដល់គោលដៅ៣កន្លែងដូចខាងលើ ។ ការផ្សព្វផ្សាយច្បាប់នេះចង់បញ្ជាក់ឱ្យពលរដ្ឋជ្រួតជ្រាបអំពីច្បាប់ចរាចរណ៍ផ្លូវគោកថ្មី ដែលត្រូវអនុវត្តចាប់ពីថ្ងៃទី១ ខែមករា ឆ្នាំ២០១៦ តទៅ ។ ការផាកពិន័យខ្លះអាចគុណនឹង៥ដងនៃច្បាប់ចាស់ ។
លោកប្រធានការិយាល័យក៏បានដាស់តឿនទៅកាន់អាជីវករលក់ដូរតាមចិញ្ចើមផ្លូវមុខផ្សារថា អ្នកលក់ដូរមិនត្រូវលក់តាមចិញ្ចើមផ្លូវសាធារណៈឡើយ ដែលអាចធ្វើឱ្យមានគ្រោះថ្នាក់នៅពេលយានយន្តជ្រុលចង្កូតមក ធ្វើឱ្យបាត់បង់ផ្លូវសម្រាប់អ្នកថ្មើរជើង និងបាត់បង់សោភណ័ភាពក្នុងទីប្រជុំជនផងដែរ ។
ចំពោះអ្នករត់ម៉ូតូឌុប ត្រូវតែដឹងឱ្យបានច្បាស់អំពីច្បាប់ចរារចរណ៍ គឺត្រូវតែពាក់មួកសុវត្ថិភាព ទាំងអ្នកបើកម៉ូតូ និងអ្នកជិះម៉ូតូ ត្រូវគោរពស្លាកសញ្ញាចរាចរណ៍ គំនូសចរាចរណ៍លើដងផ្លូវ នោះយើងនឹងមានសុវត្ថិភាពល្អ ។
ចំពោះអ្នកបើកបររថយន្តតាក់ស៊ី គឺត្រូវចេះច្បាប់ចរាចរណ៍ មានប័ណ្ណបើកបរ គោរពគំនូស និងភ្លើងសញ្ញាចរាចរណ៍ ពិសេសត្រូវចេះអត់ឱនយល់យោគ និងអធ្យាស្រ័យគ្នាក្នុងពេលបើកបរ និងមិនត្រូវដឹកមនុស្សលើសចំនួនកំណត់នោះឡើយ ធ្វើបានបែបនេះយើងជាអ្នកបើកបរ និងអ្នកធ្វើដំណើរនៅលើរថយន្ត ពិតជាអាចបញ្ចៀសគ្រោះថ្នាក់ចរាចរណ៍ដែលកំពុងកើតឡើងជារៀងរាល់ថ្ងៃគួរឱ្យព្រួយបារម្ភនេះបាន ៕
ចែករំលែកព័តមាននេះ