ខេត្តរតនគិរី ៖ យុវជនម្នាក់ដែលបើកកាណូតបានជួបគ្រោះថ្នាក់ចរាចរណ៍ផ្លូវទឹកបុកជាមួយកាណូតមួយគ្រឿងផ្សេងទៀត បណ្តាលឱ្យធ្លាក់ចូលទឹកបាត់ កាលពីថ្ងៃទី៩ កុម្ភៈកន្លងទៅ ត្រូវបានរកសពឃើញនៅថ្ងៃទី១១ កុម្ភៈ ត្រង់ចំណុចមុខកំពង់តាវង ភូមិសាមខា…
ខេត្តរតនគិរី ៖ យុវជនម្នាក់ដែលបើកកាណូតបានជួបគ្រោះថ្នាក់ចរាចរណ៍ផ្លូវទឹកបុកជាមួយកាណូតមួយគ្រឿងផ្សេងទៀត បណ្តាលឱ្យធ្លាក់ចូលទឹកបាត់ កាលពីថ្ងៃទី៩ កុម្ភៈកន្លងទៅ ត្រូវបានរកសពឃើញនៅថ្ងៃទី១១ កុម្ភៈ ត្រង់ចំណុចមុខកំពង់តាវង ភូមិសាមខា ឃុំជ័យឧត្តម ស្រុកលំផាត់ ខេត្តរតនគិរី ។
ជនរងគ្រោះឈ្មោះ ចាន់ថា តុលា ភេទប្រុស អាយុ១៨ឆ្នាំ ជាជនជាតិឡាវ រស់នៅភូមិស្រែពកតូច ឃុំសិរីមង្គល ស្រុកកូនមុំ ខេត្តរតនគិរី និងអ្នករួមដំណើរម្នាក់ឈ្មោះឈឿន វី ភេទប្រុស អាយុ២៣ឆ្នាំ មានទីលំនៅជាមួយជនរងគ្រោះ ។ ចំណែកភាគីខាងកាណូតមួយទៀតបើកបរដោយឈ្មោះម៉ុក ណារ៉ា ភេទប្រុស អាយុ២៩ឆ្នាំ ជនជាតិខ្មែរ មានទីលំនៅភូមិសាមខា ឃុំជ័យឧត្តម ស្រុកលំផាត់ ខេត្តរតនគិរី ពុំមានរងរបួស ។
តាមប្រភពព័ត៌មានបានឱ្យដឹងថា នៅពេលឃើញហេតុការណ៍កាណូតទាំង២គ្រឿងបុកគ្នាបែបនេះកើតឡើង ប្រជាពលរដ្ឋ ព្រមទាំងសមត្ថកិច្ចបានចុះមុជទឹករកជនរងគ្រោះដែរ ប៉ុន្តែរកមិនឃើញឡើយ រហូតដល់ថ្ងៃទី១១ កុម្ភៈ ទើបប្រទះឃើញសពអណ្តែតទឹក ដោយមានរងរបួសឆ្អឹងជំនីរផ្នែកខាងស្តាំផងដែរ ។
បច្ចុប្បន្ន សមត្ថកិច្ចកំពុងស្រាវជ្រាវរកមូលហេតុនៃគ្រោះថ្នាក់ចរាចរណ៍ផ្លូវទឹកខាងលើនេះ និងបានពិនិត្យសព ព្រមទាំងធ្វើកំណត់ហេតុរួចប្រគល់សពជូនឪពុកម្តាយដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ