លោក គួច ខេវិន បង្ហោះសារចាក់ដោតរឿង“ទុំទាវ ២០២១”
រាជធានីភ្នំពេញ ៖ លោក គួច ខេវិន អ្នកផលិតកម្មវិធីទូរទស្សន៍ម្នាក់ បានបង្ហោះសារចាក់ដោតដាក់ចំៗថា “ទម្រាំតែពពួកបំពុលសង្គម ជាន់ពន្លិចប្រពៃណី បំផ្លាញវប្បធម៌…
រាជធានីភ្នំពេញ ៖ លោក គួច ខេវិន អ្នកផលិតកម្មវិធីទូរទស្សន៍ម្នាក់ បានបង្ហោះសារចាក់ដោតដាក់ចំៗថា “ទម្រាំតែពពួកបំពុលសង្គម ជាន់ពន្លិចប្រពៃណី បំផ្លាញវប្បធម៌ អក្សរសិល្ប៍ ប្រមាថដល់សាសនាជាតិ ងាកមុខមកសុំទោស ឬទទួលទោសនោះ ឥទ្ធិពលអាក្រក់ៗ វាបានសាយភាយ ជះទៅឆ្ងាយ ហើយដិតជាប់ខួរក្បាលក្មេងៗ ក្នុងសង្គមខ្មែររួចទៅហើយ ពេលណាមួយ ថ្ងៃណា មួយវាហ្នឹង ផុសចេញមកជាថ្មីម្តងទៀតមិនខាន” ។
លោក គួច ខេវិន ថ្លែងចំៗបែបនេះ បន្ទាប់ពីក្រុមប្រឹក្សាពិន័យ និងលើកសរសើរ នៃក្រសួងវប្បធម៌ និងវិចិត្រសិល្បៈ បានកោះហៅកញ្ញាតេង ស៊ីណាត និងកញ្ញា តេង ដាណា រួមនឹងអ្នកពាក់ព័ន្ធ ក្នុងការផលិតវីដេអូឃ្លីបរឿង “ទុំទាវ ២០២១” មកអប់រំណែនាំ ដោយទទួលចំណាត់ការចំនួន ៨ចំណុច កាលពីព្រឹកថ្ងៃទី១០ ខែកុម្ភៈ ឆ្នាំ២០២១ ។
លោក គួច ខេវិន បានសរសេរកាលពីម៉ោង៧និង២៣នាទីយប់ ថ្ងៃទី១០ កុម្ភៈម្សិលមិញនេះថា «បើកសករាជថ្មី នៃដើមឆ្នាំ២០២១ វាបានធ្វើឲ្យផ្អើលអស់អ្នកតាស្រុក លោកតាព្រៃ ព្រាយចុងចេក អាបចុងឫស្សី ដោយសារតែការលេងសម្តីអសុរស លោតកញ្ឆេងសម្តែងអាសអាភា.ស បញ្ចេញកេរ្តិ៍គ្មានខ្មាស មកធ្វើជាត្រីមុខ បាត់អស់សុជីវធម៌ អត់សីលធម៌ គ្មានគុណធម៌ មិនចេះអៀនខ្មាស របស់ពួកអ្នកប្រើប្រព័ន្ធព័ត៌មានសង្គមហ្វេសប៊ុក ពីរបីដំបរស្វា ធ្វើឲ្យពុលពេញក្នុងសង្គមខ្មែរ ។
ដើម្បីតែផលប្រយោជន៍ និងចង់ឲ្យល្បី ដោយគ្មានសមរម្យ ពួកមួយក្តាប់តូចនោះ ហាក់ធ្វើជាលីលាលែងដឹង លែងឮ លែងស្គាល់ និងធ្វើមិនឃើញអ្វីទាំងអស់ ។ បើនិយាយពីអំនួត គឺអួតកប់ពពក តែមើលទៅឬកពារ អកប្បកិរិយា សម្ដីសំដៅ គឺជ្រកក្រោមអាចម៌ជន្លេន ផ្ទឹមពុំបានទៅនឹងអ្នកទិញអេតចាយផង ! ។
ក៏ប៉ុន្តែ ទិដ្ឋិភាពច្របូកច្របល់បែបនេះកើតឡើង វាពិបាកនឹងស្តីបន្ទោសពួកក្មេងៗទាំងហ្នឹង ? ព្រោះដោយសារតែ ពួកចាស់ៗជាម៉ែ ជាឪ ជាអ្នកមានសមត្ថកិច្ចត្រួតត្រាការងារនេះ មិនចេះ មិនធ្លាប់ មិនដែលអប់រំ ពួកវាពីមុនៗមកទេដឹង ។
“ស្វាទោះឆ្លាត ទោះល្ងង់ ទោះខ្លៅ វាងាយចេះនឹងធ្វើត្រាប់” (Monkey see monkey do) គេរមែងសង្កេតឃើញថា ជារឿយៗទាល់តែភ្លើងឆេះព្រៃ អណ្តាតភ្លើងផុតចុងឫស្សី ទើបគេនាំគ្នាធ្វើជាផ្អើល បៀមទឹកទៅព្រួស ! មានអ្នកមុខ អ្នកមាត់ មានមន្ត្រីតិចតួចដែលម្តងម្កាល ចេញមុខឲ្យយោបល់ ណែនាំអប់រំ កែលម្អរពួកបំពុលសង្គមតាមហ្វេសប៊ុក ទោះបីជាដឹងមុនថា បានផលល្អតិចតួចក្តី តែជាជាងមិន បានធ្វើសោះ ។
ទម្រាំតែពពួកបំពុលសង្គម ជាន់ពន្លិចប្រពៃណី បំផ្លាញវប្បធម៌ អក្សរសិល្ប៍ ប្រមាថដល់សាសនាជាតិ ងាកមុខមកសុំទោស ឬទទួលទោសនោះ ឥទ្ធិពលអាក្រក់ៗ វាបានសាយភាយ ជះទៅឆ្ងាយ ហើយដិតជាប់ខួរក្បាលក្មេងៗក្នុងសង្គមខ្មែររួចទៅហើយ ពេលណាមួយ ថ្ងៃណាមួយវានឹង ផុសចេញមកជាថ្មីម្តងទៀតមិនខាន ។
តើមន្ត្រីៗ នៃក្រសួងពាក់ព័ន្ធ ដូចជា៖ ក្រសួងព័ត៌មាន ក្រសួងវប្បធម៌ និងវិចិត្រសិល្បៈ ក្រសួងកិច្ចការសាសនា ក្រសួងមហាផ្ទៃ និងស្ថាប័នតុលាការជាដើម ដែលស៊ីប្រាក់ខែរាស្ត្រ ហើយមានកាតព្វកិច្ចបម្រើ ជាតិ សាសនា ព្រះមហាក្សត្រ គួរគប្បីធ្វើអ្វីដើម្បី លុបបំបាត់ប្រភេទល្បែងល្ងីល្ងឺ ក្នុងបណ្តាញព័ត៌មានសង្គមហ្វេសប៊ុក និងពពួកបំពុលសង្គមខ្មែរមួយក្តាប់តូច ឬពីរបីដំបរស្វានោះ ? ។ ប្រិយមិត្តណាដឹងជួយប្រាប់ផង ព្រោះខ្ញុំក៏មិនដឹង ដោយសារតែខ្ញុំជារាស្ត្រសាមញ្ញៗ ធម្មតាៗ មិនសូវយល់ការរាក់ជ្រៅ ! » ៕
ចែករំលែកព័តមាននេះ