ខេត្តប៉ៃលិន ៖ រហូតមកដល់វេលាម៉ោង៦ និង៣០នាទីព្រឹកថ្ងៃទី១១ ខែកុម្ភ: ឆ្នាំ២០២១ ប្រជាពលរដ្ឋ រស់នៅក្នុងខេត្តប៉ៃលិន ដែលមានសាច់ឈាមកាត់ខ្សែស្រឡាយចិន បាននាំគ្នាសម្រុកទិញនំចំណី…
ខេត្តប៉ៃលិន ៖ រហូតមកដល់វេលាម៉ោង៦ និង៣០នាទីព្រឹកថ្ងៃទី១១ ខែកុម្ភ: ឆ្នាំ២០២១ ប្រជាពលរដ្ឋ រស់នៅក្នុងខេត្តប៉ៃលិន ដែលមានសាច់ឈាមកាត់ខ្សែស្រឡាយចិន បាននាំគ្នាសម្រុកទិញនំចំណី ធូប ទៀន និងផ្កាភ្ញី យកទៅដាក់តាំងនៅក្នុងផ្ទះ និងរៀបចំសែនព្រេន ព្រោះជាទំនៀមទម្លាប់តាំងពីដូនតារបស់គេមកផងដែរ ។
ចំណែកឯអាជីវករនៅក្នុងផ្សារក៏មានការមមាញឹកក្នុងការលក់ដូរ ស្ទើរតែរកពេលទំនេរមិនបាននោះឡើយ ដោយអ្នកខ្លះសប្បាយរីករាយយ៉ាងខ្លាំង ពេលលក់ឥវ៉ាន់ដាច់គ្រប់ៗមុខ តែអ្នកខ្លះបានបិទតូបឈប់លក់ ដើម្បីត្រៀមសែនព្រេនដល់កុងម៉ារបស់គេ ។
ប្រភពព័ត៌មានពីប្រជាពលរដ្ឋម្នាក់ ឈ្មោះ ហ៊ាសេងទ្រី ភេទប្រុស អាយុ៥០ឆ្នាំ រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន បានរៀបរាប់ឱ្យដឹងថា ៖ នៅព្រឹកថ្ងៃនេះ គាត់បាននាំគ្នាទៅទិញម្ហូប អាហារ ផ្លែឈើ ផ្កាអង្គារ៍សិល និងក្រដាសប្រាក់ដុល្លារខ្មោច ដើម្បីយកទៅដាក់តាំងនៅក្នុងផ្ទះ និងសែនព្រេនដល់កុងម៉ា ជីដូន ជីតា នាឱកាសបុណ្យចូលឆ្នាំចិននេះ ។
លោកបន្តទៀតថា ឱ្យតែដល់រដូវនេះម្តងៗ គឺនាំគ្នាត្រៀមខ្លួនរៀបចំផ្ទះសម្បែង និងម្ហូបអាហារសែនព្រេន ដើម្បីរំលឹកគុណ និងទទួលបាននូវពរជ័យពីជីដូនជីតា សម្រាប់ការរស់នៅប្រចាំថ្ងៃទៅមុខបន្តទៀត ។
ចំណែកអាជីវករម្នាក់ ឈ្មោះ យាយម៉ាប់ លក់ដូរនៅក្នុងផ្សារសាមគ្គីហៅប៉ាហ៊ី បានឱ្យដឹងថា ឱ្យតែដល់ពេលជិតរដូវចូលឆ្នាំចិន ជាពិសេស គឺនៅមុនថ្ងៃសែនចិន ឥវ៉ាន់របស់គាត់ ដូចជា ធូប ទៀន ក្រដាសប្រាក់ ដើមផ្កា គឺលក់ដាច់ខ្លាំង ។ គាត់បន្តទៀតថា នៅរៀងរាល់ឆ្នាំ ការលក់ដូររបស់គាត់ មានការកាក់កបខ្លាំងជាងគេ គឺនៅថ្ងៃបុណ្យចូលឆ្នាំចិន ដោយគាត់មិនហ៊ានឈប់សម្រាកនោះទេ ។
ចំណែកស្ត្រីវ័យក្មេងម្នាក់ ឈ្មោះ រិទ្ធិ លក់ដូរនៅក្នុងផ្សារប៉ាហ៊ី បានឱ្យដឹងដែរថា គ្រាន់តែបើកទ្វារតូបនៅពេលព្រឹកភ្លាម គឺមានប្រជាពលរដ្ឋ ក៏ដូចជា ម៉ូយចូលមកទិញឥវ៉ាន់របស់ខ្លួនយ៉ាងមមាញឹក ដែលធ្វើឱ្យគាត់សប្បាយរីករាយយ៉ាងខ្លាំង ទោះបីជាផ្លូវនៅក្នុងផ្សារមានការចង្អៀតបន្តិច ខណ:ប្រជាពលរដ្ឋចូលទៅទិញរបស់របរ ដើម្បីយកទៅសែនចិន កុងម៉ារបស់ខ្លួន កាន់តែច្រើនឡើងៗ គួរឱ្យកត់សម្គាល់ ។
តែក្រោយពេលគេទិញយកទៅសែនរួចរាល់អស់ហើយ នៅថ្ងៃបន្ទាប់អាចនឹងមានការស្ងប់ស្ងាត់ភ្ញៀវ ដោយអ្នកខ្លះជាប់រវល់ជប់លៀង ហូបអាហារជាមួយបងប្អូននៅផ្ទះ អ្នកខ្លះនាំគ្នាដើរលេងកម្សាន្តនៅតាមរមណីយដ្ឋាននានាក្នុងក្រុងប៉ៃលិន ៕
ចែករំលែកព័តមាននេះ