ខេត្តមណ្ឌលគិរី ៖ ក្រុមឈ្មួញឈើបានសម្រុកដឹកជញ្ជូនឈើខុសច្បាប់ចេញពីដែនជម្រកការពារសត្វព្រៃកែវសីមា ដែលមានរថយន្តរាប់សិបគ្រឿងក្នុងមួយយប់ៗយកទៅលក់នៅព្រំដែនកម្ពុជា-វៀតណាម ខណៈដែលប្រមុខរាជរដ្ឋាភិបាលកម្ពុជាបានដាក់បទបញ្ជាដាច់ខាតឱ្យបិទគ្រប់ច្រករបៀង និងច្រកព្រំដែនសំខាន់ៗដើម្បីបង្កើនការទប់ស្កាត់ការឆ្លងរីករាលដាលនៃជំងឺកូវីដ-១៩ ។
សេចក្តីរាយការណ៍បានឲ្យដឹងថា ក្រុមរថយន្តកែច្នៃនិងរថយន្តសាំយ៉ុង ព្រមទាំងម៉ូតូកែច្នៃ បានធ្វើសកម្មភាពដឹកឈើគ្រប់ប្រភេទចេញពីស្រុកអូររាំង និងស្រុកកែវសីមា ដែលស្ថិតនៅក្នុងដែនជម្រកការពារសត្វព្រៃកែវសីមា យកទៅលក់ឱ្យថៅកែដ៏ធំម្នាក់នៅព្រំប្រទល់រវាងខេត្តមណ្ឌលគិរីនិងខេត្តក្រចេះ ដែលត្រូវគេស្គាល់ឈ្មោះថា«តាវី» ។
ថៅកែធំទិញឈើនេះ បានសហការជាមួយដៃជើងរបស់ខ្លួន និងមានការសម្របសម្រួលពីសមត្ថកិច្ចនៅតាមមូលដ្ឋានក្នុងការដឹកជញ្ជូនឈើខុសច្បាប់ទាំងនោះ ចេញទៅតាមច្រករបៀងជាច្រើននៅក្នុងទឹកដីស្រុកស្នួល ខេត្តក្រចេះដែលនេះជាការបំពានទៅលើបទបញ្ជារបស់ប្រមុខរាជរដ្ឋាភិបាល ។
សេចក្តីរាយការណ៍បានបញ្ជាក់ថា ក្នុងមួយយប់ៗយ៉ាងហោចណាស់មានឈើគ្រប់ប្រភេទប្រមាណពី៣០ទៅ៥០ម៉ែត្រគូប ត្រូវបានក្រុមឈ្មួញធ្វើការដឹកជញ្ជូនចូលឃ្លាំងមួយកន្លែងនៅជិតព្រំប្រទល់រវាងខេត្តមណ្ឌលគិរីនិងខេត្តក្រចេះ ដែលមេឈ្មួញឈ្មោះ វី បានធ្វើការសម្របសម្រួលជាមួយអាជ្ញាធរនៅទីនោះដើម្បីឆ្លងដែនទៅវៀតណាម ។
សេចក្តីរាយការណ៍បន្តថា ក្រុមឈ្មួញបានប្រើប្រាស់រថយន្ដស្ទើរគ្រប់ប្រភេទដឹកជញ្ជូនឈើចេញពីព្រៃដែនជម្រក ដោយឆ្លងកាត់មុខស្នាក់ការដែនជម្រកការពារសត្វព្រៃកែវសីមាយ៉ាងរលូន ដោយពួកគេបានរត់ការសមត្ថកិច្ចជាមុន។ឈ្មួញដែលកំពុងមានឈ្មោះល្បីជាងគេនោះគឺឈ្មោះ ថារី ដឹកឈើចេញពីស្រុកអូររាំង ដោយយកឈ្មោះអ្នកមានអំណាចក្នុងខេត្តបាំងមុខបន្លាចសមត្ថកិច្ច ។
ជាក់ស្ដែង កាលពីព្រឹកថ្ងៃទី៨ ខែកុម្ភៈ ឆ្នាំ ២០២១ រថយន្តដឹកឈើប្រមាណ២២គ្រឿង បានសម្រុកដឹកជញ្ជូនឈើចូលឃ្លាំងថៅកែឈ្មោះ តាវី ប៉ុន្តែសមត្ថកិច្ចមិនអាចបង្ក្រាបទីតាំងស្តុកឈើនោះបានទាន់ពេលទេ ដោយក្រុមឈ្មួញបានធ្វើការចល័តកំណាត់ឈើហុបទាំងនោះទៅប្រទេសវៀតណាមដោយសុវត្ថិភាពអស់ទៅហើយ ៕
ចែករំលែកព័តមាននេះ