រាជធានីភ្នំពេញ ៖ លោក ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា គ្រប់ការរៀបចំដំណើរ​ទស្សនកិច្ច​ទេសចរណ៍ទៅកាន់សហគមន៍ទេសចរណ៍ សហគមន៍អេកូទេសចរណ៍ និងតំបន់ទេសចរណ៍ជនបទ ត្រូវប្រើប្រាស់សេវាកម្មរបស់សហគមន៍ឱ្យបានច្រើន ដាច់ខាតមិនអាចរំលងការទំនាក់ទំនងជាមួយប្រជាសហគមន៍ឡើយ ដោយ​ហេតុថាកិច្ចសហការ និងទំនាក់ទំនងល្អជាមួយសហគមន៍ ។ និយាយឲ្យ​ចំលោករដ្ឋមន្រ្តីទំនងចង់បញ្ជាក់ថា អ្នកទេសចរណ៍ទៅដល់សហគមន៍ណា ត្រូវប្រើប្រាស់សេវាមាន អាហារ ការស្នាក់នៅ ដឹកជញ្ជួន ជាដើម របស់សហគមន៍នោះ ធ្វើដូច្នេះ អាចចូលរួមជំរុញជីវភាពរបស់ប្រជាពលរដ្ឋមូលដ្ឋានឱ្យកានតែប្រសើរឡើង ។

ការលើកឡើងរបស់លោកថោង ខុន បែបនេះ ស្របពេលសហគមន៍ទេសចរណ៍​បានកំពុងដើរតួនាទីសំខាន់នៅក្នុងការស្តារវិស័យទេសចរណ៍ឡើងវិញនៅក្នុងពេលនេះនិងក្រោយពេលវិបត្តិកូវីដ ១៩ ។ ការលើកឡើងរបស់លោករដ្ឋមន្រ្តីដូច្នេះ ក៍ស្របពេល​ដែលពលរដ្ឋជាច្រើន ដែលរស់នៅតាមសហគមន៍ទេសចរណ៍ បានត្អូញត្អែរពីការ​មិនទទួលបានចំណូលពីវិស័យទេសចរណ៍ទោះបីជាពួកគាត់រស់នៅក្នុងសហគមទេសចរណ៍ ឬជិតប្រាសាទបុរាណ ដែលមានអ្នកទេសចរចេញចូលមិនដាច់ក្តី ។ មែនទែន​ទៅការត្អូញត្អែរពីការមិនទទួលបានចំណូលពីវិស័យទេសចរណ៍នេះ ធ្លាប់មានឮតំាងពី​យូរ​មកហើយពិសេសមុនពេលមិនទាន់មានវត្តមានកូវីដ១៩មកម្លេះ ។ ការត្អូញត្អែរ​ជាច្រើន​កោះសន្តិភាព ធ្លាប់ទទួលបានពីពល​រដ្ឋនៅក្នុងខេត្តសៀមរាប ផងដែរ ។ ពលរដ្ឋដែលជាកូនចៅដូនតាអ្នកសាងប្រាសាទអង្គរវត្តបាននិយាយថាកញ្ចប់ទស្សនកិច្ចរបស់ភ្ញៀវទេសចរបរទេស ត្រូវគេបានរៀបចំទៅកន្លែងធំ រាប់ទំាងការស្នាក់នៅ អាហារ កន្លែងទិញវត្ថុអនុស្សាវរីយ៍ ។ ពលរដ្ឋរកទទួលទានតាមចិញ្ចើមផ្លូវមិនមាន​ឱកាសលក់ទំនិញ ផ្តល់សេវាកម្មអ្នកទេសចរណ៍ដែលបានទិញកញ្ចប់ទេសចរណ៍​តាមរយៈក្រុមហ៊ុននោះឡើយ ។

ការដាក់បញ្ជារបស់លោកថោង ខុន នៅពេលនេះមិនដឹងថាមានប្រសិទ្ធភាព​ប៉ុណ្ណានោះ​ទេ។ លោកមិនបានបញ្ជាក់ពីទោសទណ្ឌសម្រាប់អ្នកមិន​ប្រតិបត្តិតាមនោះ​ឡើយ។ ក្រសួងទេសចរណ៍បានត្រឹមបញ្ជាក់ថា លោករដ្ឋមន្ត្រីទេសចរណ៍បានបញ្ជាក់យ៉ាង​ដាច់អហង្កាថា «គ្រប់ការរៀបចំដំណើរទស្សនកិច្ចទេសចរណ៍ទៅកាន់​សហគមន៍​ទេសចរណ៍ សហគមន៍អេកូទេសចរណ៍ និងតំបន់ទេសចរណ៍ជនបទ ត្រូវតែ​ប្រើប្រាស់សេវា​កម្មរ​បស់សហគមន៍ឱ្យបានច្រើន ដាច់ខាតមិនអាចរំលងការ​ទំនាក់ទំនងជាមួយប្រជាសហគមន៍បានឡើយ»។

លោករដ្ឋមន្រ្តីបានបញ្ជាក់ថា ការរៀបចំកញ្ចប់ទស្សនកិច្ចទេសចរណ៍ ត្រូវបានតែផ្ដល់ចំណូល​ទៅឱ្យប្រជាសហគមន៍ ពីព្រោះប្រជាសហគមន៍​ជាអ្នកបង្កើតឱ្យមានផលិតផលទេសចរណ៍ ជាអ្នកអភិរក្សការពារធនធានធម្មជាតិ ជីវចម្រុះ ក៏ដូចជាសក្ដានុពលទេសចរណ៍ដទៃទៀត រីឯវិស័យសាធារណៈដែល​មានក្រសួង ស្ថាប័ន រដ្ឋបាលខេត្ត រដ្ឋបាលស្រុក ឃុំ ភូមិ ព្រមទាំងអង្គការដៃគូ​អភិវឌ្ឍន៍ដទៃទៀត ជាអ្នកគាំទ្រដល់ការអភិវឌ្ឍ និងការអភិរក្សនៅក្នុងមូល​ដ្ឋានសហគមន៍ ក៏ដូចជាជួយផ្សព្វផ្សាយ បណ្ដុះបណ្ដាលប្រជាសហគមន៍​ឱ្យចេះទទួលភ្ញៀវទេសចរ។

ការដាក់បញ្ជាដូចខាងលើនេះ បានធ្វើឡើងនៅក្នុងឱកាសដែលលោក ថោង ខុន អញ្ជើញទៅ​ប្រកាន់​ចូលកាន់​តួនាទី លោកប្រធានថ្មី មន្ទីរទេសចរណ៍ខេត្​តកោះកុងនាថ្ងៃទី ៨ ខែកុម្ភៈឆ្នាំ ២០២១នេះ ៕