ខេត្តកំពង់ធំ ៖ បុរសម្នាក់ត្រូវបានគេប្រទះឃើញបញ្ចប់ជីវិតដោយយកខ្សែចងភ្ជាប់ជាមួយនឹងគោយន្ត បានបង្កឱ្យមានការភ្ញាក់ផ្អើលកើតឡើងកាលពីព្រឹកថ្ងៃទី៧ ខែគុម្ភ: ឆ្នាំ២០២១ ស្ថិតនៅក្នុងភូមិសែនអភិវឌ្ឍន៍មួយ ឃុំទីពោ ស្រុកសន្ទុក ខេត្តកំពង់ធំ…
ខេត្តកំពង់ធំ ៖ បុរសម្នាក់ត្រូវបានគេប្រទះឃើញបញ្ចប់ជីវិតដោយយកខ្សែចងភ្ជាប់ជាមួយនឹងគោយន្ត បានបង្កឱ្យមានការភ្ញាក់ផ្អើលកើតឡើងកាលពីព្រឹកថ្ងៃទី៧ ខែគុម្ភ: ឆ្នាំ២០២១ ស្ថិតនៅក្នុងភូមិសែនអភិវឌ្ឍន៍មួយ ឃុំទីពោ ស្រុកសន្ទុក ខេត្តកំពង់ធំ ។
ជនរងគ្រោះឈ្មោះ អ៊ុន ទក ភេទប្រុស អាយុ២៣ឆ្នាំ រស់នៅភូមិកើតហេតុ ។
តាមការបំភ្លឺពីឈ្មោះ អ៊ុត មឿន ភេទស្រី អាយុ៥០ឆ្នាំ ត្រូវជាម្ដាយបង្កើតរបស់ជនរងគ្រោះ បានរៀបរាប់ប្រាប់សមត្ថកិច្ចឱ្យដឹងថា កាលពីយប់ថ្ងៃទី៦ ខែកុម្ភៈ កូនរបស់គាត់ និងឈ្មោះ អ៊ុន ប៉េង អាន ភេទប្រុស អាយុ២៥ឆ្នាំ ពួកគេទាំងពីនាក់បងប្អូនបាននាំគ្នាទម្លាក់អុសស្វាយចន្ទីពីលើគោយន្តកន្ត្រៃដាក់នៅក្នុងឡរដុតធ្យូងខាងក្រោយផ្ទះគាត់ចម្ងាយប្រហែល២៥ម៉ែត្រ បន្ទាប់ពីទម្លាក់អុសរួច នៅម៉ោងប្រហែល៨យប់ ពួកគាត់នាំគ្នាហូបបាយជុំគ្នានៅលើគ្រែក្រោមផ្ទះ ពេលហូបបាយរួច កូនរបស់គាត់បានសុំលុយគាត់៥ពាន់រៀលទិញស្រាផឹក ។
តាមប្រភពដដែលបានបន្តថា ភ្លាមនោះគាត់ក៏ឱ្យប្ដីយកលុយឱ្យកូនចំនួន១ម៉ឺនរៀល ហើយកូនរបស់គាត់ក៏ជិះម៉ូតូចេញទៅបាត់ រហូតដល់ម៉ោងប្រហែល១២យប់ ទើបឃើញកូនជិះម៉ូតូមកដល់ផ្ទះវិញ ទាំងសភាពស្រវឹងស្រាទ្រេតទ្រោត ហើយបានសុំលុយគាត់១០ម៉ឺនរៀលទៀត និងថាយកទៅលេងប្រពន្ធនៅឯភ្នំពេញ ប៉ុន្តែគាត់មិនឱ្យទេ ដោយប្រាប់កូនថា «កូនឯងកុំទាន់ទៅអី បើកូនឯងស្រវឹងស្រាយ៉ាងនេះ ចាំព្រឹកស្អែកទៅ ព្រោះកាលពីលើកមុនអញ្ចឹងឯងជិះដួលម៉ូតូរបួសស្នាមមិនទាន់បាត់ផង» ។
តាមប្រភពដដែលបានបន្តទៀតថា កូនរបស់គាត់ក៏និយាយថា «ពុកម៉ែឯងមិនយល់ពីអារម្មណ៍កូនសោះ» ។ បន្ទាប់ពីនិយាយបែបនេះរួច កូនរបស់គាត់ក៏ចុះចេញពីផ្ទះបាត់ ដោយមិនដឹងថាទៅណាឡើយ ចំណែកគាត់និងប្ដីដេកលើផ្ទះរហូតដល់មាន់រងាវជិតភ្លឺថ្ងៃទី៧ ខែកុម្ភៈ ឆ្នាំ២០២១ ទើបភ្ញាក់ឡើង តែមិនឃើញកូនមកផ្ទះទៀត ក៏នាំគ្នាដើររកកូនតាមផ្ទះបងប្អូន និងម៉ែធម៌របស់កូននៅក្នុងភូមិជាមួយគ្នា តែរកយ៉ាងណា ក៏មិនមានអ្នកណាបានឃើញដែរ ទើបពួកគាត់ត្រឡប់មកផ្ទះវិញ ។
តាមប្រភពដដែលបានបន្តទៀតថា ពេលមកដល់ផ្ទះ គាត់ដើរទៅមើលខាងក្រោយផ្ទះ ស្រាប់តែប្រទះឃើញកូនយកខ្សែស្មាច់ជាប់ភ្ជាប់នឹងគោយន្តកន្ត្រៃ នៅក្បែរមាត់ឡដុតធ្យូង បណ្តាលឱ្យបាត់បង់ជីវិតបាត់ទៅហើយ ។ ភ្លាមនោះគាត់ហៅបងប្អូន និងកូនៗផ្សេងទៀតឱ្យមកជួយមើល ហើយក៏ស្រាយខ្សែរួចលើកសពយកមកដាក់លើផ្ទះ និងបានដោះអាវពិនិត្យមើលពុំមានស្លាកស្នាមអ្វីគួរឲ្យកត់សម្គាល់ឡើយ គឺមានតែស្នាមជាំនៅលើ.កតែប៉ុណ្ណោះ ទើបនាំគ្នាសន្និដ្ឋានថា កូនបានបញ្ចប់ជីវិតខ្លួន និងបានរាយការណ៍ជូនសមត្ថកិច្ចតែម្ដង។
តាមប្រភពដដែលបានបន្តទៀតថា បន្ទាប់មកសមត្ថកិច្ចជំនាញបានសហការជាមួយប៉ុស្តិ៍នគរបាលរដ្ឋបាល ក្រុមប្រឹក្សាឃុំ មេភូមិ គ្រូពេទ្យ និងក្រុមគ្រួសារដើម្បីចូលរួមពិនិត្យ ទីកន្លែងកើតហេតុ និងសព ដោយរកឃើញនៅលើ.កមានស្នាមទ្រុតព័ទ្ធជុំវិញ.កបញ្ឆិតទៅក្រោយ ក្រៅពីនេះនៅលើដងខ្លួន ពុំមានស្លាកស្នាមអ្វីកត់សម្គាល់ឡើយ ។
ក្រោយពីពិនិត្យចប់ក៏បានធ្វើកំណត់ហេតុ ប្រគល់សពជូនទៅក្រុមគ្រួសារ យកទៅធ្វើបុណ្យតាមប្រពៃណី ៕
ចែករំលែកព័តមាននេះ