ភ្នំពេញ៖ បុរសម្នាក់ បើករថយន្តមួយគ្រឿងស៊េរីទំនើប ម៉ាក RANGE ROVER ក្នុងស្ថានភាពលឿន ដូចហោះ ជ្រុលចង្កូត បុកចំបង្គោលភ្លើង បណ្តាលអោយ​បាក់អស់មួយបង្គោល កាលពីវេលាម៉ោង ១០ និង ១០នាទី យប់ថ្ងៃទី៥ ខែកុម្ភៈ ឆ្នាំ២០២១ តាមបណ្តាយផ្លូវ២១៥​ កែងផ្លូវ ២១៧ នៅចំណុចស្តុបអាងទឹក ស្ថិតនៅក្នុងសង្កាត់វាសវង់ ខណ្ឌ ៧មករា​។

​ប្រភពព័ត៌មានពីជុំវិញកន្លែងកើតហេតុ បានអោយដឹងថា មុនពេលកើតហេតុ គេបានឃើញបុរសម្នាក់ មិនស្គាល់អត្តសញ្ញាណនោះទេ បើករថយន្តបង្កមួយគ្រឿងម៉ាក RANGE ROVER ពណ៌ស ពាក់ស្លាកលេខ កម្ពុជា TR0110 តាមបណ្តោយផ្លូវព្រះសីហនុ ក្នុងទិសដៅពីត្បូងទៅជើង ខណៈពេលបើកមកដល់ចំណុចកើតហេតុ ដោយសារអ្នកបើកបរស្រវឹង​ផង ហើយបើកក្នុងល្បឿន មិនបានបន្ថយល្បឿន ​ណាមួយនៅផ្លូវ​កោងផងនោះ ក៏ជ្រុលចង្កូ តបុកពេញទំហឹងបណ្តាលអោយខ្ទេច​អស់មួយកំណាត់ខាងមុខ ខ្ទេចផ្នែកខាងស្តាំ ថែមទាំងបាក់បង្គោលភ្លើងមួយដើម និងស្លាកសញ្ញា​មួយ។ ឡានផ្ទុះពោងទាំងសងខាង តែសំណាងល្អហើយ ដែលមិនមានអ្នករងរបួស​អីនោះទេ គ្រាន់តែខូចខាតរថយន្តខ្លួនឯង និងទ្រព្យ​សម្បត្តិរបស់រដ្ឋតែប៉ុណ្ណោះ។

​ភ្លាមៗ ​អ្នកបើកបរ ត្រូវបានសមត្ថកិច្ច ឃាត់ខ្លួន យកទៅសួរនាំ នៅអធិការដ្ឋាន​នគរបាលខណ្ឌ៧មករា​។ រីឯ​រថយន្ត ត្រូវបានសមត្ថកិច្ច​ វាស់វែង អូស​យកទៅរក្សាទុក នៅ​ការិយា​ល័យ​ចរាចរណ៍​​ផ្លូវគោក ដើម្បី​ធ្វើ​ការ​ដោះ​ស្រាយ​គ្នា​៕ ដោយ៖ យឹម ឈឿន