ខេត្តពោធិ៍សាត់ ៖ ប្រជាកសិករនៅឃុំខ្នារទទឹង ស្រុកបាកាន ខេត្តពោធិ៍សាត់ បានសម្ដែងទឹកចិត្តសប្បាយរីករាយយ៉ាងខ្លាំង ដោយសារឆ្នាំនេះមានទឹកគ្រប់គ្រាន់សម្រាប់ធ្វើស្រែប្រាំង ព្រមទាំងទទួលបានទិន្នផលខ្ពស់ ក្នុងមួយហិកតាពី ៧…
ខេត្តពោធិ៍សាត់ ៖ ប្រជាកសិករនៅឃុំខ្នារទទឹង ស្រុកបាកាន ខេត្តពោធិ៍សាត់ បានសម្ដែងទឹកចិត្តសប្បាយរីករាយយ៉ាងខ្លាំង ដោយសារឆ្នាំនេះមានទឹកគ្រប់គ្រាន់សម្រាប់ធ្វើស្រែប្រាំង ព្រមទាំងទទួលបានទិន្នផលខ្ពស់ ក្នុងមួយហិកតាពី ៧ តោនទៅ ៨តោន ហើយលក់ក៏បានថ្លៃជាងឆ្នាំមុនៗទៀតផង ដែលប្រភេទស្រូវ អូអឹម ក្នុងមួយគីឡូក្រាមមានតម្លៃពី ១.០០០រៀលទៅ១.០៣០រៀល ឯស្រូវ សូម៉ាលី និង សែនក្រអូប ក្នុងមួយគីឡូក្រាមតម្លៃពី ១.១៥០រៀលទៅ១.២០០រៀលឯណោះ ។
លោក ព្រំ មឿន ប្រធានក្រុមប្រឹក្សា និងជាមេឃុំខ្នារទទឹងបានឲ្យដឹងថា ឃុំខ្នារទទឹងមានផ្ទៃដីបង្កបង្កើនផលសរុបជាង ២.៨០០ហិកតា ធ្វើបាន ១០០% ។ នៅរដូវវស្សាប្រជាកសិករភាគច្រើននិយមធ្វើស្រូវសូម៉ាលី និងសែនក្រអូប ព្រោះពូជទាំងពីរនេះអតិថិជននិយមចូលចិត្តច្រើនជាងគេ ។ ស្រូវវស្សាដែលប្រជាកសិករបានធ្វើក្នុងឆ្នាំ ២០២០ កន្លងមកនេះ លូតលាស់ល្អគ្រប់ទីកន្លែង ប៉ុន្តែបានប៉ះពាល់ទឹកជំនន់ជាង ៦០០ហិកតា ហើយផ្ទៃដីដែលត្រូវស្ដារឡើងវិញមានចំនួន ៤៤៣ហិកតា ។
លោក ព្រំ មឿន ឲ្យដឹងថា បន្ទាប់ពីទទួលបានស្រូវពូជប្រភេទ អូអឹម ពីសម្ដេចតេជោ ហ៊ុន សែន ភ្លាមប្រជាកសិករក្នុងឃុំខ្នារទទឹង ស្រុកបាកាន បាននាំគ្នាសម្រុកស្ដារឡើងវិញបានទាន់ពេលវេលា ស្របពេលដែលប្រព័ន្ធធារាសាស្ត្រដំណាក់អំពិល មានប្រភពទឹកគ្រប់គ្រាន់ ពិសេសបានការជំរុញ និងយកចិត្តទុកដាក់ពីសំណាក់លោកអភិបាលខេត្ត អភិបាលស្រុក អាជ្ញាធរភូមិឃុំ និងក្រុមការងារចុះមូលដ្ឋានផងដែរ ។
សព្វថ្ងៃនេះប្រជាកសិករឃុំខ្នារទទឹង ស្រុកបាកាន កំពុងតែសប្បាយរីករាយក្នុងការប្រមូលផលស្រូវប្រភេទ អូអឹម របស់សម្ដេច ដែលកំពុងទុំពណ៌មាសពាសពេញស្រែ ហើយកន្លែងខ្លះរកម៉ាស៊ីនច្រូតស្ទើរតែមិនទាន់ទៀតផង ។ ស្រូវប្រភេទ អូអឹម នេះឲ្យផលក្នុងមួយហិកតាពី ៧តោនទៅ ៨តោនឯណោះ ហើយតម្លៃវិញពី ១.០០០រៀលទៅ ១.០៣០រៀលក្នុងមួយគីឡូក្រាម ។
ការងារបង្កបង្កើនផលស្រូវនៅឃុំខ្នារទទឹង ស្រុកបាកានទទួលបានជោគជ័យនេះ ដោយសារប្រព័ន្ធធារាសាស្ត្រដំណាក់អំពិលរបស់រាជរដ្ឋាភិបាល មានប្រភពទឹកគ្រប់គ្រាន់សម្រាប់ស្រោចស្រពលើដីស្រែ ពិសេសប្រជាកសិករឧហ្សាហ៍ព្យាយាម និងអនុវត្តបានត្រឹមត្រូវតាមបច្ចេកទេសកសិកម្មក្នុងការពង្រាពដីនិងការប្រើប្រាស់ជីជាដើម ។ សរុបមកប្រជាកសិករសប្បាយចិត្ត ទី ១ ក្រោយពេលស្រូវខូចដោយទឹកជំនន់ សម្ដេចតេជោបានផ្ដល់ពូជមកឲ្យធ្វើស្ដារឡើងវិញ, ទី ២ មានទឹកស្រោចស្រពគ្រប់គ្រាន់, ទី ៣ ស្រូវលូតលាស់ល្អបានទិន្នផលខ្ពស់ និងទី ៤ ស្រូវលក់បានថ្លៃជាងរាល់ឆ្នាំ ។
ប្រជាកសិករឃុំខ្នារទទឹង បានថ្លែងអំណរគុណយ៉ាងជ្រាលេជ្រៅចំពោះសម្ដេចតេជោ និងបានសំណូមពរដល់ថ្នាក់ដឹកនាំគ្រប់លំដាប់ថ្នាក់ ធ្វើយ៉ាងណាជួយរក្សាទឹកឲ្យមានគ្រប់គ្រាន់នៅរដូវប្រាំង និងរក្សាតម្លៃស្រូវយ៉ាងហោចណាស់ត្រឹម ១.០០០រៀលក្នុងមួយគីឡូក្រាម កុំឲ្យដូចឆ្នាំមុនៗមួយគីឡូក្រាមតែ ៦០០រៀលទៅ ៧០០រៀល គឺមិនអាចទូទាត់ថ្លៃភ្ជួររាស់ ថ្លៃជី ថ្លៃច្រូត និងថ្លៃកម្លាំងពលកម្មបាននោះទេ ។
ទោះយ៉ាងណាបើតាមការស្ទាបស្ទង់ឲ្យដឹងថា ស្រូវឆ្នាំនេះបានថ្លៃនោះដោយសារតែមានឈ្មួញមកពីប្រទេសវៀតណាមចូលមកទិញដល់ស្រែ បើលក់ឲ្យតាមរោងម៉ាស៊ីនកិនស្រូវក្នុងស្រុកនោះ គឺមិនបានថ្លៃនោះឡើយ ៕
ចែករំលែកព័តមាននេះ