រាជធានីភ្នំពេញ ៖ ក្រសួងអប់រំ យុវជន និងកីឡា បានសម្រេចប្តូរគ្រូបង្រៀនម្នាក់នៅសាលាបឋមសិក្សាសន្ធរម៉ុកយកលុយសិស្ស ទៅឲ្យបំរើការងារនៅសាលាបឋមសិក្សាសែនសុខ ដែលស្ថិតក្នុងរាជធានីភ្នំពេញ ។ នេះបើតាមអ្នកនាំពាក្យក្រសួង…
រាជធានីភ្នំពេញ ៖ ក្រសួងអប់រំ យុវជន និងកីឡា បានសម្រេចប្តូរគ្រូបង្រៀនម្នាក់នៅសាលាបឋមសិក្សាសន្ធរម៉ុកយកលុយសិស្ស ទៅឲ្យបំរើការងារនៅសាលាបឋមសិក្សាសែនសុខ ដែលស្ថិតក្នុងរាជធានីភ្នំពេញ ។ នេះបើតាមអ្នកនាំពាក្យក្រសួង ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានឲ្យកោះសន្តិភាពដឹងនៅថ្ងៃទី៤ ខែកុម្ភៈ ឆ្នាំ២០២១ យ៉ាងដូច្នេះថា ៖«ក្រោមកិច្ចសហការរវាងមន្ទីរអប់រំ យុវជន និងកីឡា រាជធានីភ្នំពេញ និងគណៈគ្រប់គ្រងសាលាបឋមសិក្សាសន្ធរម៉ុកបានដោះស្រាយករណីមិនប្រក្រតីខាងលើនេះ គ្រូបង្រៀនកម្រិតបឋមសិក្សា ស្ថិតក្នុងខណ្ឌទួលគោកម្នាក់ ផ្លាស់ឲ្យទៅបំរើ ការងារនៅសាលាបឋមសិក្សាសែនសុខ ក្នុងខណ្ឌសែនសុខ» ។
អ្នកនាំពាក្យបានលើកឡើងថា ជាទូទៅ ប្រសិនបើមានករណីមិនប្រក្រតីណាមួយក្នុងគ្រឹះស្ថានសិក្សានៅទូទាំងប្រទេសគណៈគ្រប់គ្រងគ្រឹះស្ថានសិក្សាមានវិធានការ ដើម្បីដោះស្រាយទៅតាមទិដ្ឋភាពជាក់ស្តែង ហើយអាចមានការសហការជាមួយមន្ទីរអប់រំយុវជន និងកីឡា ដែលជាសេនាធិការរបស់ក្រសួងអប់រំ ក្នុងការដោះស្រាយបញ្ហាទាំងនោះ ។
លោក រស់ សុវាចា បានលើកឡើងទៀតថា ក្រសួង អប់រំ និងកីឡាបាននឹងបន្តជំរុញការគ្រប់គ្រងសាលារៀន ដើម្បីបន្តពង្រឹងកំណែទម្រង់អប់រំយុវជន និងកីឡា ។ ករណីមានភាពមិនប្រក្រតីការដោះស្រាយបញ្ហាទាំងនេះ គឺមានសណ្ឋានផ្សេងៗពីគ្នា អាស្រ័យលើការប្រព្រឹត្តិ ។ លោកបានគូសបញ្ជាក់ថា «វិធានការរដ្ឋបាលដែលដាក់ចំពោះគ្រូបង្រៀនដែលធ្វើខុសអាចការស្តីបន្ទោស ឬការសរសេជាលាយលាក់អក្សរ ឬអាចជាការចុះកិច្ចសន្យាក្រោយការប្រព្រឹត្តិមិនប្រក្រតី ឬមួយការផ្លាស់ប្តូរទីកន្លែងធ្វើការ ឬមួយឈានដល់ការលុបឈ្មោះចេញពីក្របខណ្ឌ មន្ត្រីរាជកាក្រោមឱវាទរបស់ក្រសួងអប់រំយុវជន និងកីឡា» ។
ជាមួយគ្នានោះដែរ អ្នកនាំពាក្យបានអះអាងថា រាជរដ្ឋាភិបាលបានប្តេជ្ញាពង្រឹងគុណភាពគ្រូបង្រៀន តាមរយៈលើកកម្ពស់គុណវុឌ្ឍិ និងផ្តល់ប្រាក់ខែរបស់គ្រួបង្រៀន ។ នៅឆ្នាំ២០១៥ ប្រាក់ខែគ្រូបង្រៀន ស្ថិតក្នុងចន្លោះពី៥សែនរៀល ទៅ១លាន២សែនរៀល ។ នៅឆ្នាំ២០២០ស្ថិត ចន្លោះពី១លាន២សែនរៀលទៅ២លាន១សែនរៀល ។ ក្រសួងអប់រំយុវជន និងកីឡា បានបន្តធ្វើការជាមួយគ្រប់ភាគីពាក់ព័ន្ធ ជាពិសេសជាមួយក្រសួងសេដ្ឋកិច្ច និងហិរញ្ញវត្ថុ ដើម្បីតម្លើងប្រាក់ខែគ្រូបង្រៀន ។
អ្នកនាំពាក្យក៏បានលើកឡើងថា ក្រសួងអប់រំយុវជន និងកីឡា បានបន្តជំរុញដល់គ្រប់ភាគីពាក់ព័ន្ធបន្តអនុវត្តយ៉ាងម៉ាត់វិធានការរដ្ឋាភិបាល និងលិខិតបទដ្ឋានគតិយុត្តិដែលមាន ជាធរមាន ។
សូមជម្រាបករណីគ្រូបង្រៀននៅសាលាបឋមសិក្សាសន្ធរម៉ុកនេះ បន្ទាប់ពីអាណាព្យាបាលសិស្សបានធ្វើការបង្ហោះសាលាថា គ្រូបង្រៀនបឋមសិក្សាម្នាក់បានយកប្រាក់ពីសិស្ស៦ម៉ឺនរៀលក្នុងមួយខែដែលអះអាងជា ការតបស្នងសងគុណគ្រូ ៕
សូមបញ្ជាក់ ៖ ក្រសួងអប់រំកំពុងសម្រេចគ្រូបង្រៀនយកលុយសិស្សនៅសាលាសន្ធរម៉ុកហើយ
ចែករំលែកព័តមាននេះ