ខេត្តបាត់ដំបង៖    ជើងខ្លាំងម្នាក់ ក្នុងចំណោមបក្សពួក ០៤នាក់ ដែលពូកែជិះម៉ូតូដេញ​កាប់គេមិនរើសមុខ និង​គប់កញ្ចក់រថយន្តគេស្ទើររាល់យប់ ត្រូវកម្លាំងការិយាល័យ​ព្រហ្មទណ្ឌកំរិតស្រាល ​ស្រាវជ្រាវឃាត់ខ្លួនបាន កាលពីល្ងាចថ្ងៃទី០១ ខែ​កុម្ភៈ ឆ្នាំ២០២១ នៅចំណុចភូមិរំចេក៤ សង្កាត់រតនៈ ក្រុងបាត់ដំបង។

ការចាប់​នេះ បានធ្វើឡើង​​ បន្ទាប់ពីជននេះ និងបក្សពួក បានព្រួតគ្នាកាប់ និងគប់ដុំថ្មទៅលើបុរសម្នាក់ ដោយគ្មានមូលហេតុ បណ្ដាលឲ្យរងរបួស។         

ប្រធានការិយាល័យព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា  ជនទំនើងម្នាក់នេះ ឈ្មោះ សើរ សារឿត ហៅ ជោ អាយុ ២២ឆ្នាំ នៅភូមិចំការសំរោង១ សង្កាត់ចំការសំរោង ក្រុងបាត់ដំបង។ 

លោកបាននិយាយថា ជននេះ និង​បក្សពួក ០៣នាក់ទៀត​ បានជិះម៉ូតូដេញកាប់ និង​គប់ដុំថ្ម ទៅលើជនរងគ្រោះម្នាក់ ឈ្មោះ ពេជ្រ គឹមឡុង អាយុ ២៨ឆ្នាំ កាលពីរំលងអាធ្រាត្រឈានចូលថ្ងៃទី២៩ ខែមករា​កន្លងទៅ នៅចំណុចភូមិរតនៈ សង្កាត់រតនៈ ក្រុងបាត់ដំបង បណ្ដាលឲ្យរងរបួសជាច្រើនកន្លែង ដោយគ្មានមូលហេតុឡើយ។ ភាគីទាំង២ ក៏មិនធ្លាប់ស្គាល់គ្នាដែរ។

ប៉ុន្តែក្រោយពីទទួលបណ្ដឹងជនរងគ្រោះ  លោកស្នងការខេត្ត បានបញ្ជាឲ្យកម្លាំង​របស់លោក ​ស្រាវជ្រាវ រហូតកំណត់មុខសញ្ញាជន​សង្ស័យបាន ទើបត្រូវឃាត់ខ្លួនបាន​ម្នាក់ ខណៈបក្សពួកចំនួន ០៣នាក់ទៀត កំពុងសម្ងំលាក់ខ្លួន។            

ជនរងគ្រោះ បានលើកឡើងក្នុង​របាយការណ៍របស់​សមត្ថកិច្ច​ថា ខ្លួនមិនធ្លាប់ស្គាល់​ក្រុមជនដៃដល់នោះទេ ហើយក៏មិនធ្លាប់មានជម្លោះជាមួយក្រុម​ជនពាលទាំងនោះដែរ។ ប៉ុន្តែស្រាប់តែក្រុមជនដៃដល់ ជិះម៉ូតូមកដេញកាប់ខ្លួន ដោយគ្មានមូលហេតុ ហើយខ្លះទៀត គប់នឹងដុំថ្ម។  

ដោយឡែកចម្លើយជនអន្ធពាល ឈ្មោះ សើរ សារឿត ហៅ ជោ​ បានសារភាពថា ខ្លួនក៏មិនដែលស្គាល់ជនរងគ្រោះដែរ។ 

ជននេះ បានឆ្លើយយ៉ាងព្រហើនថា​ នៅយប់កើតហេតុនោះ ខ្លួនជាអ្នកឌុប រីឯបក្សពួកខ្លួនម្នាក់ទៀត ជាអ្នកចុះដេញកាប់ជនរងគ្រោះ។​ ក្រុមខ្លួនតែងជិះម៉ូតូ​បង្កជម្លោះជាមួយគេ មិនរើសមុខទេ។ នៅពេលយប់ជិះជួប​នរណា កាប់ ឬវាយអ្នកនោះ ហើយក៏ធ្លាប់គប់កញ្ចក់រថយន្តគេលេងនៅពេលយប់ជាញយដង​ដែរ។          

លោក ឈឿង គឹមសុង បានប្រាប់ថា បើតាមចម្លើយជនដៃដល់រូបនេះ និងតាមរយៈការស្រាវជ្រាវកន្លងមក គឺក្រុមនេះ ពិតជាធ្លាប់បង្កបញ្ហាគ្រប់បែបយ៉ាង នៅពេលយប់មែន​។​ នៅយប់កើតហេតុនោះ ក្រុមជនអន្ធពាលនេះ បានជិះម៉ូតូដេញកាប់គេជាបន្តបន្ទាប់ តែមិនបង្កគ្រោះថ្នាក់ដល់អ្នកដទៃ លុះបង្កលើកចុងក្រោយ ទៅលើជនរងគ្រោះ ឈ្មោះ ពេជ្រ គឹមឡុង រហូតមានរបួសតែម្ដង។  

ប៉ុន្តែ លោក គឹម សុង បានបញ្ជាក់ថា​ បើតាមការសួរនាំ ក្រុមជនដៃដល់ សុទ្ធតែជាមុខ​សញ្ញា​ប្រើប្រាស់ថ្នាំញៀន ហើយជនឈ្មោះ សើរ សារឿត ហៅ ជោ នេះ ក៏មានសារធាតុ​ញៀនដែរ នៅពេលមន្រ្តីជំនាញពិនិត្យទឹកនោម។ 

លោកស្នងការ បាន​បញ្ជាឲ្យមន្រ្តីជំនាញ​ សួរនាំ ដើម្បីកសាងសំណុំរឿង បញ្ជូនជននេះ ទៅសាលាដំបូងខេត្ត៕ ដោយ៖ ឆោម ពិសម័យ