លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាបានឲ្យដឹង​ថា កម្មវិធីឧបត្តម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម ២ឆ្នាំ បានចាប់​ផ្ដើមតាំងពី ខែមិថុនា ឆ្នាំ២០១៩ មកនោះ គិតត្រឹមថ្ងៃទី១៩ ខែមករា ឆ្នាំ២០២១ មាន ស្រ្តីមានផ្ទៃពោះ និងកុមារជាងចំនួន ១៧ម៉ឺននាក់ បានទទួលផលពីកម្មវិធីនេះ ដោយគិតជាថវិកាប្រមាណ ១០លានដុល្លារ។

ក្រៅពី ការឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ និងកម្មវិធី គាំពារសង្គមរបស់រដ្ឋមានជាច្រើនទៀតដូចជាការឧបត្ថម្ភសាច់ប្រាក់ជូនគ្រួសារក្រីក្រ។ សម្រាប់កម្មវិធីឧបត្ថម្ភសាច់ប្រាក់ជូនគ្រួសារក្រីក្រនិងងាយរងគ្រោះដោយសារជំងឺកូវីដ១៩ បានអនុវត្តបានចំនួន ៣ជុំ រួចមកហើយ ដោយក្នុង៣ជុំកន្លងទៅនោះរាជរដ្ឋាភិបាល បានចំណាយថវិកាជាង ២០០លានដុល្លារ។ បច្ចុប្បន្នរាជរដ្ឋាភិបាល កំពុងបន្តការឧបត្ថម្ភសាច់ប្រាក់ក្នុងជុំទី ៤ ដែលមានរយៈពេល ៣ខែ ចាប់ពីខែមករា ដល់ខែមីនាឆ្នាំ២០២១។ 

លោក វង សូត បានគូសបញ្ជាក់ថាសម្រាប់ការឧបត្ថម្ភសាច់ប្រាក់ជូនគ្រួសារក្រីក្រ​ក្នុងខែមករា ឆ្នាំ២០២១ មានគ្រួសារក្រីក្រសរុបជាង ៧១ម៉ឺនគ្រួសារ គិតជាសមាជិក​ចំនួនជាង ២លាន៨សែននាក់ និងគ្រោងចំណាយថវិកាជាងចំនួន ៣២លានដុល្លារ។ របាយការណ៍ខាងលើបានលើកឡើងក្នុងកិច្ចប្រជុំបូកសរុបលទ្ធផលការងារ កម្មវិធីឧបត្ថម្ភសាច់ប្រាក់មនុស្សធម៌នេះ នៅព្រឹកថ្ងៃទី១ ខែកុម្ភៈ ឆ្នាំ ២០២១។

មន្រ្តីបានបញ្ជាក់ថា កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម​២ឆ្នាំ នៅតែបន្តនៅពេលអនាគត រីឯកម្មវិធីឧបត្ថម្ភសាច់ប្រាក់ជូនគ្រួសារក្រីក្រ ងាយរងគ្រោះដោយ ជំងឺកូវីដ១៩វិញ មិនទាន់មានការសម្រេចណាមួយថា ត្រូវបន្ត ឬមិនបន្តក្រោយ​បញ្ចប់ជុំទី ៤ នៅខែមីនា ឆ្នាំ២០២១នោះទេ។

សម្តេចនាយករដ្ឋមន្រ្តីធ្លាប់​បានប្រកាសថាប្រសិនបើជំងឺកូវីដ១៩នៅមិនទាន់ស្ងប់​ទេការឧបត្ថម្ភ​នេះនៅតែបន្ត៕