ខេត្ត​ប៉ៃលិន​៖ រហូតមកដល់រសៀលថ្ងៃទី០១ ខែកុម្ភ: ឆ្នាំ២០២១ អាជ្ញាធរខេត្ត ដឹក​នាំដោយលោកជំទាវ បាន ស្រីមុំ អភិបាលខេត្តប៉ៃលិន បានចាត់ឱ្យមន្រ្តី នៃមន្ទីរ​ជំនាញសាធារណ:ការ និងដឹកជញ្ជូនខេត្ត យកគ្រឿងចក្រ ធ្វើការឈូសឆាយផ្លូវ​ឆ្ពោះទៅកាន់រមណីយដ្ឋានទឹកធ្លាក់អូរតាវ៉ៅ ហៅភ្នំខៀវ ដើម្បីសម្រួលឱ្យភ្ញៀវទេសចរ​ជាតិ និងអន្តរជាតិ ងាយស្រួលក្នុងការធ្វើដំណើរចូលមកលេងកម្សាន្ត នាឱកាសបុណ្យ​ចូលឆ្នាំចិនខាងមុខឆាប់ៗនេះ ព្រោះជារមណីយដ្ឋានធម្មជាតិ​ដ៏ទាក់ទាញជាងគេបំផុត នៅក្នុងខេត្ត ពោលគឺមានទេសភាពស្រស់បំព្រង ត្រជាក់កែវភ្នែក មានទឹកជ្រោះហូរ​ឥតដាច់ ខួបប្រាំងខួបវស្សា​។

ទន្ទឹមនឹងនេះ គេសង្កេតឃើញក្រុមការងារយុវជន ស.ស.យ.ក ខេត្តប៉ៃលិន ក៏បានសស្រាក់សស្រាំ នាំគ្នាជួសជុលខ្យុស និងរៀបចំផ្លូវ កន្លែងលេងកម្សាន្ត នៅក្នុងរមណីយដ្ឋាននេះ ជារៀងរាល់ថ្ងៃដែរ ដើម្បីកែច្នៃឱ្យមានភាពទាក់ទាញ​កាន់តែខ្លាំងថែមទៀត​។

មន្រ្តីនៃមន្ទីរសាធារណការ និងដឹកជញ្ជន ខេត្តប៉ៃលិន​ម្នាក់ បានរៀបរាប់ឱ្យ​ដឹងថា ​ផ្លូវមុខខ្លោងទ្វារចូលទៅលេងកម្សាន្តក្នុងរមណីយដ្ឋានទឹកធ្លាក់អូរតាវ៉ៅ ហៅ ភ្នំខៀវ មានចម្ងាយប្រមាណជិត ៣គីឡូម៉ែត្រ ដែលពីមុនមានការលំបាកក្នុងការធ្វើដំណើរចុះ​ឡើងខ្លាំង ពោលគឺលំបាកក្នុងការបើកបរម៉ូតូ និងរថយន្ត ព្រោះមានក្បាលថ្ម រដិបរដុប ធ្វើឱ្យភ្ញៀវមួយចំ នួនលែងចង់ទៅលេងនៅទីនោះទេ​។ តែរហូតមកដល់ពេលនេះ បន្ទាប់ពីលោក​ជំទាវ បាន ស្រីមុំ ដែលបានឡើងកាន់តំណែង ជាអភិបាលខេត្តប៉ៃលិន បានឱ្យខាងមន្ទីរជំនាញ ចុះទៅធ្វើការឈូសឆាយពង្រាប ងាយស្រួល ក្នុងការបើកបរ​ម៉ូតូ និងរថយន្តទៅដល់កន្លែងលេងកម្សាន្តតែម្តង​។

ប្រភពដដែលបានបន្តទៀតថា ខាងមន្ទីរជំនាញ នឹងកា្រលក្រួសក្រហមជាមុនដំបូងសិន ហើយនៅថ្ងៃខាងមុខទៀត អភិបាលខេត្ត អាចនឹងធ្វើការរៀបចំចាក់បេតុងផ្លូវទាំងអស់​ខាងលើនេះ​។

ចំណែក​លោក សៀ សុខុម អនុប្រធាន ស.ស.យ.ក ខេត្តប៉ៃលិន បានរៀបរាប់​ថា ​អស់រយ:ពេលជាច្រើនថ្ងៃមកហើយ ពោលគឺតាំងពីដើមខែមករា ឆ្នាំ២០២១ ខាងក្រុម​ការងារយុវជន ស.ស.យ.ក ខេត្តប៉ៃលិន ដែលមានគ្នាប្រមាណ ២៥ ទៅ ៣០នាក់ បាននាំគ្នា​ជួសជុលផ្លូវជណ្តើរឡើងពីកន្លែងលេងទឹកជ្រោះ ឱ្យបានស្អាតល្អ រឹងមាំ ដើម្បីការពារកុំឱ្យមានករណីគ្រោះថ្នាក់ដល់ភ្ញៀវទេសចរ​។ យុវជនខ្លះ ជួសជុលដំបូល​រោងខ្យុស ហើយរុះរើរោងចាស់ៗ ដើម្បីសាងសង់សា​ជាថ្មីឡើងវិញ​។

លោកបញ្ជាក់ទៀតថា ការស្ថាបនាឡើងវិញនេះ គឺដើម្បីស្រូបយកនូវភ្ញៀវទេសចរ​ជាតិ-អន្តរជាតិ ឱ្យនាំគ្នាចូលមកលេងកម្សាន្ត ក្នុងខេត្តប៉ៃលិន នាឱកាសបុណ្យចូល​ឆ្នាំចិន កាន់តែច្រើនឡើងៗ ព្រោះរមណីយដ្ឋានមួយនេះ មានច្រើនជាន់ រហូតដល់ ៣៦ជាន់ឯណោះ មានទេស​ភាពទឹកធ្លាក់ កាន់តែស្រស់ស្អាត និងត្រជាក់​ស្រេបនៅ​ផ្នែកខាងលើ ដែលអាជ្ញាធរខេត្តប៉ៃលិន បានឈូសឆាយផ្លូវ ឡើងដល់ទៅផ្នែកខាងលើ​ហើយ មិនមានការលំបាកក្នុងការធ្វើដំណើរឡើងចុះនោះទេ​។ ម្យ៉ាងវិញទៀត ទឹកជ្រោះ ហូរតាមភ្នំខៀវនេះ មានកំពស់ខ្ពស់ល្អ អាចឱ្យប្រជាពលរដ្ឋ ក៏ដូចជាភ្ញៀវ ចុះទៅងូត​លេងកម្សាន្តបំបាត់ភាពនឿយហត់នៅក្នុងអារម្មណ៍ ហើយខាងខេត្ត នឹងបន្តអភិវឌ្ឍត្រង់​កន្លែងខាងលើនេះ ដូចភ្លៀងរលឹម មិនធ្វើឱ្យភ្ញៀវខកចិត្តនោះ​ឡើយ​៕ ដោយ​៖ នីយ៉ា