ខេត្តកំពង់ចាម ៖ អគ្គិភ័យបានឆាបឆេះរាលដាលកម្ទេចកុងផ្លាកេ ដោយមានផ្សែងហុយទ្រលោមបង្កឲ្យមានការភ្ញាក់ផ្អើល ត្រូវបានរថយន្តពន្លត់អគ្គិភ័យចំនួន១១ គ្រឿង ចេញមកអន្តរាគមន៍ជួយបាញ់ទឹកពន្លត់។ ហេតុការណ៍នោះបានកើតឡើងនៅវេលាម៉ោង១១ព្រឹក ថ្ងៃទី៣០ ខែមករា ឆ្នាំ២០២១ ចំណុចបរិវេណរោងចក្រក្តារបន្ទះភ្នំប្រុសភ្នំស្រី នៅភូមិអណ្តូងច្រុះ ឃុំអំពិល ស្រុកកំពង់សៀម ខេត្តកំពង់ចាម ដែលមានម្ចាស់រោងចក្រឈ្មោះ ជា ពៅ អាយុ៤១ឆ្នាំ រស់នៅរាជធានីភ្នំពេញ។ប្រតិបត្តិការនេះបានធ្វើឡើងរហូតដល់វេលាម៉ោងជាង៥ល្ងាច ទើបអាចគ្រប់គ្រងស្ថានការណ៍បានទាំងស្រុង។
នគរបាលពន្លត់អគ្គិភ័យនៃស្នងការដ្ឋាននគរបាលខេត្តប្រាប់ឱ្យដឹងថា ពេលដែលភ្លើងបានឆាបឆេះដំបូងត្រូវបានរថយន្តពន្លត់អគ្គិភ័យរបស់អធិការនគរបាលស្រុកកំពង់សៀម ១គ្រឿងចេញមកអន្តរាគមន៍បាញ់ទឹកពន្លត់ តែដោយសារអំណាចភ្លើងឆេះខ្លាំងពេក មិនអាចបាញ់ឈ្នះនោះទេហើយត្រូវបានលោកឧត្តមសេនីយ៍ទោ ឯម កុសល ស្នងការនគរបាលខេត្ត បញ្ជាឱ្យរថយន្តនៅតាមអធិការដ្ឋា ននគរបាលស្រុកក្រុងក្នុងខេត្តកំពង់ចាមចំនួន១១គ្រឿងចេញមកជួយអន្តរាគមន៍។ នគរបាលពន្លត់អគ្គិភ័យនៃស្នងការដ្ឋាននគរបាលខេត្តប្រាប់បន្តថា ភ្លើងបានឆេះរាលដាលកម្ទេចកុងផ្លាកេ ដោយបានឆេះស្ទើរតែដល់អគារនៅក្នុងបរិវេណរោងចក្រ តែត្រូវបានរថយន្តពន្លត់អគ្គិភ័យ៣គ្រឿងបាញ់ទឹកផ្គុំគ្នាទើបអាចទប់ស្កាត់មិនឱ្យភ្លើងឆេះ។
ជាមួយនោះគេបានឃើញវត្តមានស្នងការនគរបាលខេត្ត ចុះបញ្ជាដោយផ្ទាល់តែម្ដង។ សកម្មភាពរបស់កងកម្លាំងពន្លត់អគ្គិភ័យបានបន្តរហូតដល់វេលាម៉ោង៥ និង៣០នាទីល្ងាច ទើបអាចគ្រប់គ្រងស្ថានការណ៍បានទាំងស្រុង។ អគ្គិភ័យនេះបណ្ដាលឲ្យបាត់បង់ និងខូចខាតដូចជា៖ សម្បកកម្ទេចឈើកុងផ្លាកេចំនួន០២កន្លែង ទំហំ២០០ម៉ែត្រគុណនឹង២០០ម៉ែត្រ កម្ព ស់០៥ ម៉ែត្រ។ អគ្គិភ័យនេះមិនបណ្ដាលឲ្យឆេះរាលដាលដល់ផ្ទះប្រជាពលរដ្ឋ ក្បែរនៅឡើយ។
មូលហេតុ បណ្ដាមកពីការឆ្លងរាលដាលភ្លើងឆាបឆេះព្រៃនៅក្បែរនោះ ហើយភ្លើងបានប៉ើងធ្លាក់មកលើកម្ទេចកុងផ្លាកេ បណ្ដាលឲ្យកើតអគ្គិភ័យបង្កការភ្ញាក់ផ្អើល។ក្នុងគ្រានោះកម្លាំងសមត្ថកិច្ចយើងបានពន្លត់អគ្គិភ័យ បានអន្តរាគមន៍បាញ់ទឹករលត់ជាស្ថាពរ ដោយបានសហការប្រើប្រាស់ឡានទឹកចំនួន១១គ្រឿង ប្រើប្រាស់ទឹកអស់៤៤ រថយន្តគិតជាម៉ែត្រគូបស្មើ២២៦ម៉ែត្រគូប។ សូមបញ្ជាក់ថា កាលពីរាត្រីមួយក្នុងឆ្នាំ២០២០ អគ្គិភ័យក៏បានឆាប់ឆេះអគារនៅក្នុងបរិវេណរោងចក្រនេះ សមត្ថកិច្ចអន្តរាគមន៍ប្រើពេលមួយយប់ទល់ភ្លឺ ក្នុងការជួយអន្តរាគមន៍។ ហើយកាលពីប៉ុន្មានឆ្នាំមុនគ្រាដែលរោងចក្រកុងផ្លាកេនេះ ធ្លាប់ឆេះម្ដង សរុបចំនួន៣លើកមកហើយ តែមិនបណ្ដាលឱ្យកម្មករ ឬបុគ្គលិករោងចក្រណាម្នាក់គ្រោះថ្នាក់នោះទេ៕ ដោយ ៖ យ៉ាន់ ចាន់ថេត
ចែករំលែកព័តមាននេះ