ក្រុងណៃពិដោ ៖ សារព័ត៌មានក្នុងស្រុកមីយ៉ាន់ម៉ា បានដកស្រង់សម្តីលេខាធិការសហព័ន្ធអង្ករមីយ៉ាន់ម៉ាឲ្យដឹងថា គ្រោះទឹកជំនន់និងភ្លៀងធ្លាក់យ៉ាងខ្លាំងចាប់តាំងពីពាក់កណ្តាលខែកក្កដា នៅតំបន់ Sagaing រដ្ឋ Shan
ក្រុងណៃពិដោ ៖ សារព័ត៌មានក្នុងស្រុកមីយ៉ាន់ម៉ា បានដកស្រង់សម្តីលេខាធិការសហព័ន្ធអង្ករមីយ៉ាន់ម៉ាឲ្យដឹងថា គ្រោះទឹកជំនន់និងភ្លៀងធ្លាក់យ៉ាងខ្លាំងចាប់តាំងពីពាក់កណ្តាលខែកក្កដា នៅតំបន់ Sagaing រដ្ឋ Shan និងរដ្ឋ Kachin របស់ខ្លួន បានបំផ្លិចបំផ្លាញដល់ដំណាំស្រូវប្រមាណជាជាង២៤.០០០ហិកតា ប៉ុន្តែការនាំចេញអង្កររបស់ជាតិអាចនឹងមិនត្រូវបានរងផលប៉ះពាល់អ្វីឡើយ ។
យោងតាមសេចក្តីថ្លែងការណ៍មួយពីក្រសួងកសិកម្ម ផ្ទៃដីដាំស្រូវក្នុងរដូវប្រាំងចំនួន៩៨១ហិកតា ផ្ទៃដីស្រូវមូសុងមាន១៤.៦៧៦ហិកតានិងសំណាប១.២៤០ហិកតាបានរងផលប៉ះពាល់ដោយសារទឹកជំនន់ គិតចាប់ពីថ្ងៃទី១៩ ខែកក្កដា ឆ្នាំ២០១៥ ។
ទោះជាយ៉ាងណា ប្រភពដដែលបង្ហើបបន្ថែមថា ទិន្នផលសរុបទាំងអស់ទំនងជាប៉ះពាល់តិចតួច ប៉ុន្តែមិនធ្ងន់ធ្ងរអ្វីឡើយដល់ការនាំចេញ ។ មន្ត្រីជាន់ខ្ពស់រូបនោះបានជំរុញរដ្ឋាភិបាលឲ្យគាំទ្រ ឬទំនុកបម្រុងដល់ប្រជាកសិករដូចគ្នា និងច្បាប់ថ្មីដែលមានទម្រង់ការពារកសិករជាដើម ។ ចំណែកអ្នកជំនាញបានគូសបញ្ជាក់ថា គ្រោះទឹកជំនន់ដែលបានកើតឡើងថ្មីៗនេះ គឺស្ថិតក្នុងផ្នែកមួយដ៏សំខាន់របស់មីយ៉ាន់ម៉ា ហើយក៏ពុំមែនជាកម្រិតទាបផងដែរដែលទីតាំងខ្លះគឺបានប្រមូលផលរួចទៅហើយដែរ ។
រីឯសហព័ន្ធអង្ករមីយ៉ាន់ម៉ារំពឹងថា ទិន្នផលស្រូវសម្រេចបាន១៤លានតោន (៨,៩៦លានតោនជាអង្ករកិនរួចស្រេច) ក្នុងឆ្នាំ២០១៥នេះ។ រដ្ឋាភិបាលបាននិងកំពុងដាក់ទិសដៅនាំចេញក្នុងរង្វង់២លានតោនឆ្នាំនេះ ។ មីយ៉ាន់ម៉ាបាននាំចេញប្រហែល១,៨លានតោនក្នុងឆ្នាំសារពើពន្ធ២០១៤-២០១៥ ។ សហរដ្ឋអាមេរិកបានវាយតម្លៃថា មីយ៉ាន់ម៉ា នឹងផលិតស្រូវអង្ករបាន២០លានតោន (១២,៨លានតោនជាអង្ករកិនរួចស្រេច) ហើយនាំចេញក្នុងរង្វង់២លានតោនក្នុងឆ្នាំសារពើពន្ធ២០១៥-២០១៦ គឺគិតចាប់ពីខែមករា ដល់ខែធ្នូឆ្នាំ២០១៥ ៕
ចែករំលែកព័តមាននេះ