ខេត្តបន្ទាយមានជ័យ ៖ លោកតា២នាក់ រស់នៅក្រោមសំយាបផ្ទះអ្នកស្រុក និងជាប់ចិញ្ចើមផ្លូវផង ដេកគ្មានមុង និងម្នាក់គ្មានទាំងខ្នើយកើយជាយូរមកហើយ ពិតជាអាណិតពួកគាត់ណាស់ ។ លោកតាទាំង២នាក់ខាងលើម្នាក់ឈ្មោះ…
ខេត្តបន្ទាយមានជ័យ ៖ លោកតា២នាក់ រស់នៅក្រោមសំយាបផ្ទះអ្នកស្រុក និងជាប់ចិញ្ចើមផ្លូវផង ដេកគ្មានមុង និងម្នាក់គ្មានទាំងខ្នើយកើយជាយូរមកហើយ ពិតជាអាណិតពួកគាត់ណាស់ ។
លោកតាទាំង២នាក់ខាងលើម្នាក់ឈ្មោះ ស៊ឹម សៃ អាយុ៦០ឆ្នាំ ជាជនអាណាថា គ្មានទីពឹង មានស្រុកកំណើត នៅស្រុកបារាយណ៍ ខេត្តកំពង់ធំ និងម្នាក់ទៀតឈ្មោះ គឹម ចំរើន អាយុ៥៤ឆ្នាំ ។
លោកតាទី១ អះអាងថា ជាអតីតអ្នកមកពីជំរុំសាយធូ ហើយថា គាត់មានប្រពន្ធជាជនជាតិថៃ នៅខេត្តស៊ីសាកេត ប៉ុន្តែប្រពន្ធគាត់បានស្លាប់ដោយសារគ្រោះថ្នាក់ចរាចរណ៍ បន្សល់នៅកូនប្រុសទាំង២ រស់នៅស្រុកថៃ រហូតដល់បច្ចុប្បន្ន ។ គាត់បន្តថា ក្រោយមាតុភូមិនិវត្តន៍ពីជំរុំជាយដែន គាត់បានរសាត់អណ្តែតមករស់នៅក្រុងប៉ោយប៉ែត អតីតស្រុកអូរជ្រៅ តាំងពីសម័យផ្ទះហោះផ្ទះហើរ ប៉ុន្តែមិនមានដី១ដុំ ដើម្បីធ្វើផ្ទះស្នាក់នៅឡើយ ដោយពេលខ្លះទៅស្នាក់នៅជាមួយមិត្តភក្តិ ដោយមួយរយៈចុងក្រោយ ពិសេសសម័យកូវីដគ្មានប្រាក់ជួលផ្ទះគេ គាត់ក៏ធ្លាក់ខ្លួនយកសំយ៉ាបផ្ទះអ្នកស្រុកនៅក្នុងភូមិបាលិលេយ្យ១ សង្កាត់ប៉ោយប៉ែតធ្វើជាជម្រកតែម្តង ។
ដោយឡែក បុរសចំណាស់ទី២ អះអាងថា គាត់មានប្រពន្ធ និងកូនត្រឹមត្រូវ ស្នាក់នៅក្នុងភូមិកើតហេតុប៉ុន្តែគាត់អះអាងថា ដោយសារអាណិតបុរសចំណាស់ទី១ ដេកម្នាក់ឯង គាត់ក៏ចាកចេញពីផ្ទះមកដេកជាមួយគ្នា គ្រាន់ជជែកលេងពេលអផ្សុក ។ អ្វីដែលមើលទៅគួរឲ្យអាណិតជីវិតគាត់ទាំង២នាក់ហាក់កំសត់និងវេទនាណាស់ ព្រោះចាស់ហើយ មុងក៏គ្មាន ហើយបុរសទី១ យកការ៉ុងធ្វើខ្នើយសម្រាប់កើយទៀតផង ។ តើវាសនាពួកគាត់ និងទៅជាយ៉ាងណា បើការទទួលទាន និងរស់នៅដូចទិដ្ឋភាពឃើញជាក់ស្តែងនេះ?។
ក្រោយសាកសួរពីប័ណ្ឌក្រីក្រលោកតាទី១ អះអាងថា មិនដែលបានទទួលទេ ។ លោកតាទី១ លើកឡើងថា ជីវិតដ៏កំសត់របស់គាត់ បច្ចុប្បន្នរស់អាស្រ័យលើការរើសអេតចាយដោះស្រាយបាយទឹក និងចំណាយលើការទិញធូបមូសដុតរាល់យប់ ដោយ១យប់១ប្រអប់ផងដែរ ។ ក្រោមសំយ៉ាបផ្ទះអ្នកស្រុកជិត២ឆ្នាំ គាត់អះអាងថា បានទទួលរបបអង្គការលើទឹកដីកាស៊ីណូ៥គីឡូក្រាមម្តង និងកាលពីយប់ថ្ងៃមុន មានក្រុមការងារមួយមិនស្គាល់ ជួបគាត់ដល់កន្លែងស្នាក់នៅប្រគល់ប្រាក់ឲ្យជិត២ម៉ឺនរៀល ។ ដ្បិតលោកតាទាំង២អុជធូបមូស ជុំវិញទីតាំងដេក ប៉ុន្តែមិនអាចជៀសផុតពីមូសខាំបានឡើយ ព្រោះពេលឃើញសភាពដេកពួនរបស់គាត់ផ្ទាល់ធូបមូសបានរលត់អស់ហើយក្បាល ឬដៃជើងពួកគាត់នៅកណ្តាលវាល ។
ឆ្លើយតបសំណួរលោកតាទាំង២និយាយថា បើមានមុងមិនអាចចងបានព្រោះជាចំណីផ្លូវអាចទើសយានយន្តគេចេញចូលទៅរកសេវាកោសជប់នៅម្តុំនោះ ។ លោកតាទី១ ប្រាថ្នាចង់មានកន្លែងស្នាក់នៅព្រោះគាត់ចាស់ហើយ គ្មានទីពឹងទេ ហើយទទូចសុំសប្បុរសជនក្នុង និងក្រៅប្រទេស មេត្តាជួយគាត់ផង ។
អាជ្ញាធរកន្លងមកបានលើកឡើងថា ពលរដ្ឋដែលទទួលបានប័ណ្ឌក្រីក្រដ៍រាបណាជាសមាជិកក្នុងមូលដ្ឋានដោយមានសៀវភៅគ្រួសារ ឬសៀវភៅស្នាក់នៅត្រឹមត្រូវ និងឆ្លងកាត់ការចុះសម្ភាសន៍សួរនាំយ៉ាងល្អិតល្អន់ពីក្រុមការងារសង្គមកិច្ច ឬសង្កាត់ បើជាអ្នកបន្លាស់ទី ឬអ្នកចំណូលថ្មីមិនទទួលបានប័ណ្ឌក្រីក្រឡើយ ប៉ុន្តែអាជ្ញាធរថា តែងតែឲ្យក្រុមការងារចុះស្រាវជ្រាវផ្តល់អំណោយជាគ្រឿងឧបភោគ និងបរិភោគជាបន្តបន្ទាប់ ចំពោះអ្នកមានជីវភាពខ្វះខាតទាំងនេះដែរ ៕
ចែករំលែកព័តមាននេះ