ADផ្ទាំងផ្សព្វផ្សាយពាណិជ្ជកម្ម

Picture

គេចម៉ោងការ​ងារ លួច​​​​​​​បើកឡានបង្ក​គ្រោះ​ ត្រូវ​គេទារជាង២ពាន់ដុល្លារ​

3 ឆ្នាំ មុន
  • ភ្នំពេញ

រាជធានីភ្នំពេញ ៖ យុវជនជា​​បុគ្គលិក​ក្រុមហ៊ុនសេវាកម្ម​បោក​អ៊ុត​ម្នាក់​ សង្ស័យ​គេច​ម៉ោង​ការងារ​ទៅ​បើករថយន្ត​ក្រុមហ៊ុន​ដោយ​ចិត្ត​ខ្លួន​ឯង ស្រាប់តែ​បើក​ទៅ​កៀរ​រថយន្ដមួយគ្រឿង​ម៉ាក​ឡិចស៊ីស ៤៧០(Lexus LX 470) ​បណ្តាល​ឱ្យ​​រង​ការ​ខូចខាត ហើយ​មិន​ព្រម​ឈប់​ដោះស្រាយ…

រាជធានីភ្នំពេញ ៖ យុវជនជា​​បុគ្គលិក​ក្រុមហ៊ុនសេវាកម្ម​បោក​អ៊ុត​ម្នាក់​ សង្ស័យ​គេច​ម៉ោង​ការងារ​ទៅ​បើករថយន្ត​ក្រុមហ៊ុន​ដោយ​ចិត្ត​ខ្លួន​ឯង ស្រាប់តែ​បើក​ទៅ​កៀរ​រថយន្ដមួយគ្រឿង​ម៉ាក​ឡិចស៊ីស ៤៧០(Lexus LX 470) ​បណ្តាល​ឱ្យ​​រង​ការ​ខូចខាត ហើយ​មិន​ព្រម​ឈប់​ដោះស្រាយ បែរជា​ព្យាយាម​បើក​​គេច​ ប៉ុន្តែ​ត្រូវ​ម្ចាស់​រថយន្ត​ម៉ាកឡិចស៊ីស ​តាម​ទាន់ ទារ​សំណង​ខូចខាត​ចំនួន​2500​ដុល្លារ លុះគ្មានលទ្ធភាពសង ក៏សុំ​ឱ្យ​ក្រុមហ៊ុនជួយ តែក្រុមហ៊ុន​មិនជួយ​ ថែមទាំង​ដាក់ពាក្យ​ប្តឹងទៀត​។

ហេតុការណ៍​ខាងលើនេះ​បានបង្ក​ឱ្យមានការ​ភ្ញាក់​ផ្អើល​កាលពី​វេលា​ម៉ោង​9​និង​30​នាទី​យប់​ថ្ងៃ​ទី​២៦ ខែមករា ឆ្នាំ​2021 នៅ​ចំណុ​ច​ស្តុ​ប​ក្តាន់​ពីរ តាម​បណ្ដោយ​មហាវិថី​សហព័ន្ធ​រុ​ស្ស៊ីសង្កាត់​ស្រះ​ចក ខណ្ឌដូនពេញ រាជធានីភ្នំពេញ ។

រថយន្ដ​បង្ក​​មួយគ្រឿង​ខាងលើ​ម៉ាក KIA BONGO iii ជា​ប្រភេទ​រថយន្ត​ដឹក​ទំនិញ ពណ៌​ស ពាក់​ស្លាក​លេខ ភ្នំពេញ​ 2AW-1831 ជា​របស់​​ក្រុមហ៊ុនសេវាកម្ម​បោក​អ៊ុត​ បើកបរ​ដោយ​យុវជនម្នាក់ មិនស្គាល់​ឈ្មោះ​ ​ជាបុគ្គលិកក្រុមហ៊ុន​ ។ ចំណែក​រថយន្ត​ដែលរងការ​ខូចខាត​​ម៉ាកឡិចស៊ីស ៤៧០ (Lexus LX 470) ពណ៌​ទឹកប្រាក់ ពាក់​ស្លាក​លេខ ភ្នំពេញ​ 2J-9229 អ្នកបើកបរមិនស្គាល់អត្ត​សញ្ញាណ ។

តាម​ប្រភព​ពី​យុវជន​បើករថយន្ត​បង្ក​បាន​ប្រាប់​អោយ​ដឹង​ថា រូប​គាត់​​ជា​បុគ្គលិកបម្រើការ​ងារ​​នៅ​ក្នុង​ក្រុមហ៊ុន​ខាងលើ​​នោះ តែ​នៅ​ផ្នែក​ផ្សេង ហើយ​ស្គាល់គ្នា​ជាមួយ​អ្នក​បើកបរ​រថយន្ត​ដឹកអី​​វ៉ា​ន់​របស់​​ក្រុមហ៊ុន ។

តាម​ប្រភព​ដដែលបានបន្ត​ថា រាល់​ពេល​អ្នកបើកបរ​បើករថយន្ត​ដឹក​​អី​​វ៉ា​ន់​យក​ទៅ​អោយ​ភ្ញៀវ រូប​គាត់​ក៏​គេច​ម៉ោង​កា​រ​ងារ​លួច​ឡើង​រថយន្ដ សុំ​ទៅ​ជាមួយ​គេដែរ​ និង​បាន​សុំ​បើករថយន្ត​ជំនួស​​អ្នកបើកបរ​ ។ ដោយ​យល់​ថា​ជា​អ្នក​ស្គាល់គ្នា ​អ្នកបើកបរ​រថយន្ដ​ក៏​ព្រមអោយ​គាត់​​បើក ​នៅ​​​ពេល​ធ្វើ​ដំណើរ​តាម​បណ្តោយ​មហាវិថី​សហព័ន្ធរុ​ស្ស៊ី ទិស​ដៅ​ពី​កើត​ទៅ​លិច លុះ​មក​ដល់​ចំណុ​ច​មុខ​ទីស្តីការ​គណៈរដ្ឋមន្ត្រី ​គាត់​ក៏​​បើក​វ៉ា​គេ​ឯង ដោយងាក​ចង្កូត​ជ្រុល​ទៅ​កៀរ​រថយន្ត​មួយគ្រឿងម៉ាកឡិចស៊ីស ៤៧០ (Lexus LX470) ពណ៌​ទឹកប្រាក់ ដែល​ធ្វើ​ដំណើរ​ស្រប​ទិស​គ្នា បណ្តាល​ឲ្យ​ខូចខាត​កំ​ពិត​ថ្ពាល់​មុខ​ខាងស្តាំ ធ្លាក់​ស្តុ​ប​មួយ​ចំហៀង ធ្វើ​ឲ្យ​គាត់​ភ័យ​ស្លន់ស្លោ ក៏​បន្ថែម​ល្បឿន​រថយន្ដ​ព្យាយាម​បើក​គេច ក៏​ត្រូវ​ម្ចាស់​រថយន្តឡិចស៊ីស​តាម​ឃាត់​ទាន់​នៅចំនុច​ស្តុ​ប​ក្តាន់​ពីរ ​បង្ក​ការ​ភ្ញាក់ផ្អើល​ដល់​សមត្ថកិច្ច​មូលដ្ឋាន​ចុះ​ជួយ​សម្របសម្រួល ។

​តាម​ប្រភពដដែលបានបន្ត​ថា បន្ទាប់​ពីកើតហេតុ អ្នកបើកបរ​រថយន្ត​​ម៉ាកឡិចស៊ីស​បាន​ទារ​សំណង​ខូចខាត​ចំនួន​2500​ដុល្លារ ដើម្បី​ជា​ការ​ព្រមាន​ខ្លះ​ដល់​អ្នកបើកបរ​ដែល​គ្មាន​ទំនួល​ខុស​ត្រូវ ។ ដោយសារ​តែ​មិន​មាន​លទ្ធភាព​សង​ប្រាក់​ទៅ​ខាង​រថយន្ត​​ម៉ាកឡិចស៊ីស​ ​គាត់​​បាន​ទាក់ទង​ទៅ​ថៅកែ​សុំ​ការជួយ​​អន្តរាគមន៍ តែ​ខាង​ថៅកែ​បាន​បដិសេធ​មិន​ជួយ​ទេ និង​ឱ្យ​​គាត់​ដោះស្រាយ​ដោយ​ខ្លួនឯង​ទៅ ថែម​ទាំង​ដាក់​ពាក្យប្តឹង​​រូបគាត់​​ទៀត ព្រោះ​​គាត់​បាន​ល្មើស​នឹង​ច្បាប់​ការងារ​ក្រុមហ៊ុន គេច​ម៉ោង​ការងារ​ទៅ​បើករថយន្ត​ក្រុមហ៊ុន​ដោយ​ចិត្ត​ឯង បង្ក​គ្រោះថ្នាក់ ហើយ​មិន​ព្រម​ឈប់​ដោះស្រាយ ធ្វើ​អោយ​ប៉ះពាល់​ដល់​កិត្តិយស​ក្រុមហ៊ុន​ទៀត ។

ក្រោយពេល​​កើតហេតុ​ យុវជន​បើករថយន្ត​បង្ក​ត្រូវ​ឃាត់ខ្លួន​បណ្ដោះអាសន្ន ចំណែក​រថយន្ដ​ទាំង​ពីរ​គ្រឿង ត្រូវ​បាន​សមត្ថកិច្ច​ជំនាញ​វាស់វែង​យក​ទៅ​រក្សា​ទុក​បណ្តោះអាសន្ន​នៅ​កា​រិ​យាល័យ​នគរបាល​ចរាចរណ៍​ផ្លូវគោក​នៃ​ស្នងការដ្ឋាន​នគរបាល​រាជធានី​ភ្នំពេញ​រង​ចាំ​ដោះស្រាយ​បន្ត​នៅ​នៅ​ពេល​ក្រោយ ៕

អត្ថបទសរសេរ ដោយ

កែសម្រួលដោយ

ប៉ុស្តិ៍ទាក់ទង