ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា មានជនមិនស្គាលមុខចំនួន២នាក់ជាស្ត្រី បានធ្វើសកម្មភាពលួចយកកាបូបលុយពីអាជីវករលក់ដូរ (អីវ៉ាន់ចាប់ហួយ) នៅទីតាំងផ្សារហ៊ុយឡេង ស្ថិតក្នុងភូមិស្រះឈូកខាងលិច ឃុំស្រះជីក ស្រុកភ្នំស្រុក ខេត្តបន្ទាយមានជ័យ ហេតុការណ៍នេះបង្កឲ្យភ្ញាក់ផ្អើលនេះបានកើតឡើងនៅវេលាម៉ោង១១ព្រឹក ថ្ងៃទី២២ ខែមករា ឆ្នាំ២០២១ ។
លោកវរសេនីយ៍ត្រី ប៉ិក គឹមហ៊ាក់ អធិការរងទទួលការងារព្រហ្មទណ្ឌ អធិការដ្ឋាននគរបាលស្រុកភ្នំស្រុក បានឲ្យដឹងថា នៅវេលាម៉ោង៥ល្ងាច ថ្ងៃទី២២ ខែមករា ឆ្នាំ២០២១ មានឈ្មោះឈឿង ប៊ុនឆុំ ភេទប្រុសអាយុ២៦ឆ្នាំ រស់នៅភូមិកណ្តាលខាងកើត ឃុំស្រះជីក ស្រុកភ្នំស្រុក បានមកប្តឹងថា នៅវេលាម៉ោង៨ព្រឹក ថ្ងៃទី២២ ខែមករា មានជនមិនស្គាល់មុខបានធ្វើសកម្មភាពបន្លំទិញបន្លែ រួចលួចយកកាបូបលុយម្តាយរបស់ខ្លួនឈ្មោះ កាន់ យឺង អាយុ៦០ឆ្នាំ នៅភូមិកណ្ដាលខាងកើត ឃុំស្រះជីក ស្រុកភ្នំស្រុក ជាអាជីវករលក់បន្លែ និងគ្រឿងទេសនៅផ្សារហ៊ុយឡេង ស្រុកភ្នំស្រុក ។
លោកអធិការរងបានបន្តថា ក្រោយពីទទួលបានបណ្តឹងភ្លាម លោកបានដឹកនាំកម្លាំងនគរបាលជំនាញ ព្រហ្មទណ្ឌនៃអធិការដ្ឋាននគរបាលស្រុក ចុះទៅពិនិត្យនៅកន្លែងកើតហេតុ និងបានឆែកកាមេរ៉ាសុវត្ថិភាព ក៏បានឃើញមុខសញ្ញាធ្វើសកម្មភាពលួចយកកាបូបប្រាក់ពិតប្រាកដមែន តែមើលមុខសញ្ញាមិនស្គាល់នោះទេ ហើយបើនិយាយសំលេងវិញ មិនមែនជាអ្នកភ្នំស្រុកទេ គឺមុខសញ្ញាក្រៅស្រុក។
លោកអធិការរងវរសេនីយ៍ត្រីប៉ិក គឹមហ៊ាក បានឲ្យដឹងទៀតថា ករណីចោរលួចកាបូបលុយនេះ ប្រហែលជាម៉ោងព្រឹកថ្ងៃទី២២ ម្ចាស់កាបូបមិនទាន់ដឹងខ្លួនទេ លុះដល់ម៉ោង១១ព្រឹកថ្ងៃដដែលទើបម្ចាស់ដឹងថា បាត់កាបូបលុយ ខណៈពេលម្ចាស់រកកាបូបលុយដើម្បីទៅទិញអីវ៉ាន់នៅផ្សារក្រុងសិរីសោភ័ណ្ឌ ទើបដឹងថា បាត់កាបូបប្រាក់។
លោកអធិការរងបញ្ជាក់ថា ក្នុងកាបូបនោះមាន ៖ ១-ប្រាក់រៀលចំនួន៣.៦០០.០០០រៀល (បីលានប្រាំមួយសែនរៀលគត់), ២-ប្រាក់បាតចំនួន៣៨.០០០បាត (បីម៉ឺនប្រាំបីពាន់បាត), ៣-ប្រាក់ដុល្លារចំនួន១០០$ (មួយរយដុល្លារ), ៤-កាតគ្រីម៉ូតូចំនួន២សន្លឹក, ៥-កាតគ្រីឡានចំនួន១សន្លឹក, ៦-អត្តសញ្ញាណប័ណសញ្ជាតិខ្មែរចំនួន២សន្លឹក, ៧-លិខិតឆ្លងដែនចំនួន១ក្បាល, ៨-ខ្សែ.កផ្លាកទីនចំនួន១ខ្សែទំងន់៥ជី និង៩-ខ្សែដៃមាសចំនួន១ខ្សែទម្ងន់៥ជី ។
លោកអធិការរងបន្តទៀតថា បើពិនិត្យតាមកាមេរ៉ាសុវត្ថិភាព ឃើញថា មានស្ត្រីចំនួន២នាក់អាយុប្រហែល៤០ឆ្នាំ ដោយម្នាក់ពាក់អាវពណ៌ស ខោពណ៌កាហ្វេ ពាក់មួកស្លាបពណ៌ប្រផេះ និងម្នាក់ទៀតពាក់អាវខាងក្រៅពណ៌ខ្មៅ ពាក់មួកស្លាបពណ៌កាហ្វេ បានមកធ្វើសកម្មភាពទិញបន្លែ ដូចជាណាំង៉ូវ ត្រកួន ត្រសក់ និងមើមខ្ទឹម.ស។ ហើយក្នុងពេលនោះ ម្ចាស់កាបូបមិនបានចាប់អារម្មណ៍នោះទេ ព្រោះតែរវល់លក់ដូរ ធ្វើឲ្យជនសង្ស័យក៏ឆ្លៀតឱកាសចូលទៅក្នុងតូប រួចធ្វើសកម្មភាពលួចយកកាបូបដាក់លុយដែលទុកក្នុងធុងក្បែរកន្លែងគាត់អង្គុយលក់ទៅបាត់គេចខ្លួនដោយសុវត្ថិភាព ។
ពាក់ព័ន្ធនឹងករណីខាងលើនេះ កម្លាំងនគរបាលជំនាញ កំពុងធ្វើការស្រាវជ្រាវរកមុខសញ្ញាហើយ ដើម្បីចាប់យកមកផ្តន្ទាទោសតាមច្បាប់ ៕
ចែករំលែកព័តមាននេះ