រាជធានីភ្នំពេញ ៖ លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល បានមានប្រសាសន៍ថា សព្វថ្ងៃនេះ មានឱសថព្យាបាលជំងឺរលាកថ្លើមរ៉ាំរ៉ៃ បានបន្តចុះថ្លៃពីរាប់ពាន់ដុល្លារ មកប្រមាណ៦៨ដុល្លារ សម្រាប់ព្យាបាលរលាកថ្លើមសេ ក្នុងរយៈពេលបីខែ អាចជាសះស្បើយ៩៥% និងប្រមាណ ៤២ដុល្លារ ក្នុងមួយឆ្នាំ សម្រាប់ព្យាបាលរលាកថ្លើមបេ ។
លោកជំទាវ យក់ សម្បត្តិ ថ្លែងអោយដឹងនៅក្នុងសិក្ខាសាលាពិគ្រោះយោបល់ ស្តីអំពីការអនុវត្តផែនការយុទ្ធសាស្ត្រជាតិ និងហិរញ្ញប្បទាន សម្រាប់កម្មវិធីឆ្លើយតបជំងឺរលាកថ្លើមដោយសារវីរុសបេ និងសេ ឆ្នាំ២០២០-២០២៤ នៅភោជនីយដ្ឋានទន្លេបាសាក់២ នាព្រឹកថ្ងៃទី២២ មករា ២០២១នេះ ។
តាមការប៉ាន់ស្មាន របស់អង្គការសុខភាពពិភពលោកនៅឆ្នាំ២០១៧ ក្នុងប្រទេសកម្ពុជា មានអ្នកជំងឺរលាកថ្លើមរ៉ាំរ៉ៃ ប្រភេទវីរុសបេ ស្មើនឹង៤៧៥,០០០នាក់ និងអ្នកកំពុងរស់នៅជាមួយជំងឺរលាកថ្លើមរ៉ាំរ៉ៃប្រភេទវីរុសសេ មានត្រឹម ២៥៧,០០០នាក់។
លោកជំទាវ ថ្លែងថា មូលហេតុដែលនាំឲ្យមានការឆ្លងជំងឺរលាកថ្លើមប្រភេទបេ និងសេ គឺបណ្តាលមកពីការការបរិភោគម្ហូបអាហារមិនមានអនាម័យ ពិសេសអ្នកចូលចិត្តពិសាស្រាច្រើន និងបារី ។
លោកជំទាវ បានបន្តថា ជំងឺរលាកថ្លើមបេ និងសេនេះ ប្រសិនបើយើង មិនបានព្យាបាលឲ្យបានត្រឹមត្រូវ និងទាន់ពេលវេលាទេ វាអាចមានផលប៉ះពាល់ធ្ងន់ធ្ងរ ដោយធ្វើឲ្យអ្នកជំងឺ ទៅជាក្រិនថ្លើម និងឈានដល់ជំងឺមហារីកថ្លើមទៀតផង ។
លោកជំទាវ ក៏បានបញ្ជាក់ថា ក្រសួងសុខាភិបាលនៃព្រះរាជាណាចក្រកម្ពុជា បានប្តេជ្ញា និងធ្វើការជាមួយដៃគូនានា ដើម្បីដោះស្រាយបញ្ហាប្រឈមទាក់ទងនឹងជំងឺរលាកថ្លើមបេ និងសេ ដោយផ្ដោតលើចក្ខុវិស័យ«គ្មានការឆ្លងមេរោគរលាកថ្លើមថ្មីនៅកម្ពុជា» ប្រជាជនកម្ពុជា ដែលមានមេរោគរលាកថ្លើមរ៉ាំរ៉ៃ អាចទទួលបានសេវា ធ្វើរោគវិនិច្ឆ័យ ការព្យាបាល និងថែទាំ ដោយមានប្រសិទ្ធភាព មានតម្លៃសមរម្យ និងមានគុណភាពល្អ ។ តាមរយៈផែនការយុទ្ធសាស្ត្រជាតិ ប្រទេសកម្ពុជាបេ្តជ្ញាចូលរួម ដើម្បីសម្រេចឲ្យបាននូវការលុបបំបាត់ជំងឺរលាកថ្លើមប្រភេទ បេ និង សេ នៅឆ្នាំ២០៣០ ដោយអនុលោមតាម គោលដៅរបស់អង្គការសុខភាពពិភពលោក ក្នុងការកាត់បន្ថយ អត្រាឆ្លងថ្មី៩០% និង អត្រាមរណភាព ៦៥% នៅឆ្នាំ២០៣០ ។
បច្ចុប្បន្ននេះ ប្រជាពលរដ្ឋកម្ពុជា ហាក់មិនសូវមានការចាប់អារម្មណ៍ពីជំងឺថ្លើមប្រភេទបេ និងសេ នោះទេ ដោយមិនបានទៅពិនិត្យសុខភាពឲ្យបានទៀតទាត់ ឡើយលុះដល់ពេលមានចេញជារោគសញ្ញា ហើយទើបទៅរកគ្រូពេទ្យពិនិត្យទើបដឹងថា ខ្លួនមានកើតជំងឺថ្លើមប្រភេទបេ ឬសេ ។ ប្រជាពលរដ្ឋ ដែលមានជំងឺទាំងនេះ គួរតែទៅជួបគ្រូពេទ្យ ដើម្បីពិនិត្យ និងព្យាបាលឲ្យបានទាន់ពេលវេលា ចៀសវាងមានការធ្ងន់ធ្ងរវិវត្តន៍ទៅជាក្រិនថ្លើម ឬមហារីកថ្លើម ដែលត្រូវចំណាយថវិកាច្រើននិងគ្រោះថ្នាក់ដល់អាយុជីវិត ទៀតផង ៕
ចែករំលែកព័តមាននេះ