ខេត្តសៀមរាប ៖ សារមន្ទីរវាយនភណ្ឌប្រពៃណីអាស៊ីមួយ បានចាប់ដំណើរការសាងសង់នៅលើទឹកដីវប្បធម៌ប្រវត្តិសាស្រ្តខេត្តសៀមរាប ក្រោមជំនួយឧបត្ថម្ភរបស់សាធារណរដ្ឋឥណ្ឌា ក្នុងទឹកប្រាក់ប្រមាណជាង១លាន៥សែនដុល្លារអាមេរិក ។ កាលពីព្រឹកថ្ងៃព្រហស្បតិ៍ ថ្ងៃទី១៦ កញ្ញា ឆ្នាំ២០១០ លោកជំទាវ ប្រាទីបា ទេវីស៊ីង ប៉ាទីល ប្រធានាធិបតីនៃសាធារណរដ្ឋឥណ្ឌា រួមជាមួយលោក គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង បានអញ្ជើញជាអធិបតីក្នុងពិធីបញ្ចុះបឋមសិលាសាងសង់សារមន្ទីរវាយនភណ្ឌអាស៊ី ដែលជាជំនួយរបស់រដ្ឋាភិបាលឥណ្ឌា ។
អភិបាលខេត្តសៀមរាប លោកស៊ូ ភិរិន្ទ កាលពីព្រឹកថ្ងៃព្រហស្បតិ៍ នោះ បានមានប្រសាសន៍ថា សំណង់អគារសារមន្ទីរវាយនភណ្ឌប្រពៃណីអាស៊ី ដែលនឹងលេចចេញជារូបរាងយ៉ាងធំអស្ចារ្យនៅលើទឹកដីអង្គរនៅពេលឆាប់ៗខាងមុខនេះ គឺសំរាប់ដាក់តាំងពិពរ័ណ៍ផលិតផលជាច្រើន ជាពិសេសកំណាត់ និងសូត្រមកពីបណ្តាប្រទេសជាច្រើននៅអាស៊ី ។ លោកបានបន្ថែមថា សារមន្ទីរនេះជាជំនួយរបស់សាធារណរដ្ឋឥណ្ឌាដែលគេដាក់ថា ក្រុមប្រឹក្សាទំនាក់ទំនងវប្បធម៌ឥណ្ឌាសំរាប់ប្រទេសជាសមាជិកនៃកិច្ចសហប្រតិបត្តិការទន្លេមេគង្គ-គង្គា ។
មន្ត្រីអាជ្ញាធរអប្សរាបានថ្លែងថា អគារសារមន្ទីរវាយនភណ្ឌប្រពៃណីអាស៊ីនេះ គ្រោងចំណាយអស់ទឹកប្រាក់ប្រមាណជាង១លាន៥សែនដុល្លារអាមេរិក សាងសង់លើផ្ទៃដីជិត១ហិកតា ជាប់កែងរង្វង់មូលផ្លូវ៦០ម៉ែត្រ ក្នុងបរិវេណបុរីសណ្ឋាគារវប្បធម៌ និងទេសចរណ៍ដែលគ្រប់គ្រងដោយអាជ្ញាធរអប្សរា ។ យោងតាមឯកសាររបស់អាជ្ញាធរអប្សរាបានឱ្យដឹងថា គោលបំណងនៃការស្ថាបនាសារមន្ទីរនេះឡើង គឺដើម្បីឱ្យមានការយល់ដឹងអំពីបេតិកភណ្ឌពិភពលោកនៃតំបន់អង្គរ សំរាប់ប្រទេសជាសមាជិកនៃកិច្ចសហប្រតិបត្តិការទន្លេមេគង្គ-គង្គា រួមមានប្រទេសកម្ពុជា ឥណ្ឌា ឡាវ ភូមា ថៃ វៀតណាម និងបណ្តាប្រទេសពីភូមិភាគអាស៊ីគ្នេយ៍ មានម៉ាឡេស៊ី ឥណ្ឌូណេស៊ី សិង្ហបុរី និងហ្វ៊ីលីពីនជាដើម ។
លោកប៊ុន ណារិទ្ធិ អគ្គនាយកអាជ្ញាធរអប្សរា បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃចន្ទ ថា សារមន្ទីរនេះនឹងបង្ហាញនូវបេតិកភណ្ឌអរូបីរបស់បណ្តាប្រទេសក្នុងមហាអនុតំបន់ទន្លេមេគង្គ ក្នុងការរក្សាចំណេះដឹងប្រពៃណី ដែលបន្សល់ទុកពីដូនតារបស់ពួកគេតាមរយៈការដាក់តាំងផលិតផលដែលភាគ ច្រើនធ្វើពីសូត្រ និងកំណាត់ ។ លោកបន្ថែមថា ក្រោយពីការសាងសង់រួច សារមន្ទីរនេះនឹងត្រូវប្រគល់មកឱ្យអាជ្ញាធរអប្សរាគ្រប់គ្រង ព្រោះបានសាងសង់លើដីរបស់អាជ្ញាធរអប្សរា ។
សូមជំរាបផងដែរថា បច្ចុប្បន្នខេត្តសៀមរាបដ៏មានសក្តានុពលលើវិស័យទេសចរណ៍របស់ប្រទេសកម្ពុជាមួយនេះ មានសារមន្ទីរចំនួន៣ ហើយបូកបញ្ចូលទាំងសារមន្ទីរវាយនភណ្ឌប្រពៃណីអាស៊ី ដែលកំពុងចាប់ដំណើរការសាងសង់នេះ សំរាប់ដាក់តាំងរតនសម្បត្តិដ៏មានតំលៃមហាសាលរបស់ដូនតា បង្ហាញភ្ញៀវទេសចរជាតិ-អន្តរជាតិ ទស្សនានិងស្វែងយល់ពីប្រពៃណីរបស់ខ្មែរ ៕
ចែករំលែកព័តមាននេះ