ខេត្តតាកែវ ៖ ស្រុកបូរីជលសារ និងស្រុកកោះអណ្តែត នៃខេត្តតាកែវ កំពុងតែបែកធ្លាយ រឿងមានជនជាតិវៀតណាមមកជួលដីខ្មែរធ្វើស្រែយ៉ាងពពាក់ពពូននៅរដូវប្រាំងឆ្នាំ២០២១នេះ។ ជាការធ្វេសប្រហែសរបស់អាជ្ញាធរមានសមត្ថកិច្ច និងកំពុងបង្កគ្រោះថ្នាក់ដល់ពលរដ្ឋភូមិផងរបងជាមួយគ្នា ដោយជៀសមិនរួច ខណៈមានជនជាតិវៀតណាមមកជួលដីស្រែខ្មែរបង្កបង្កើនផលស្រូវនារដូវប្រាំងនេះ ស្របពេលស្រុកទេសនៃប្រទេសទាំងពីរកំពុងតែជួបនូវវិបត្តជំងឺកូវីដ១៩ ដែលកំពុងរាតត្បាតរាល់ថ្ងៃ។
សមត្ថកិច្ចអន្តោប្រវេសន៍ខេត្ត បានបង្ហើបឲ្យដឹងថា មានជនជាតិវៀតណាម ចូលមកធ្វើស្រែនារដូវប្រាំងលើទឹកដីក្នុងស្រុកបូរីជលសារ និងស្រុកកោះអណ្តែត ពិតប្រាកដមែន ដោយពួកគេទាំងនោះខ្លះបោះតង់សង់ជារោងស្នាក់នៅធ្វើស្រែ ខ្លះទៀតមិនបានធ្វើរោងស្នាក់នៅធ្វើនៅក្បែរដីស្រែដែលកំពុងបង្កបង្កើនផលនោះទេ គឺមកព្រឹក រួចត្រឡប់ទៅវិញល្ងាច។ ចំណែកស្រុកកោះអណ្តែត មានជនជាតិវៀតណាមធ្វើស្រែ តែពួកគេមានលិខិតអនុញ្ញាតិស្នាក់នៅក្នុងប្រទេសកម្ពុជាស្របច្បាប់ និងខ្លះក៏ចូលមកធ្វើរោង ដើម្បីស្នាក់នៅផងដែរ។
ចំពោះករណីមានការបែកធ្លាយជនជាតិវៀតណាមមកជួលដីធ្វើស្រែក្នុងស្រុកបូរីជលសារនេះ លោក ទុយ សុភ័ក្រ អភិបាលស្រុកបូរីជលសារ មិនអាចទាក់ទងសុំការបំភ្លឺបានទេ នៅព្រឹកថ្ងៃទី១៦ ខែមករា ឆ្នាំ២០២១នេះ ដោយហៅទូរស័ព្ទចូលមិនមានអ្នកទទួល។
រីឯលោក ផាន ផល អធិការនគរបាលស្រុកបូរីជលសារ បានឲ្យដឹងនៅព្រឹកថ្ងៃទី១៦ ខែមករា នេះដែរថា រឿងនេះលោកមិនដឹងច្បាស់នោះទេ ហើយលោកក៏មិនជាប់ពាក់ព័ន្ធក្នុងរឿងជួលដីឲ្យវៀតណាមធ្វើស្រែប្រាំងនោះដែរ គឺមានឈ្មោះទាហានព្រំដែនម្នាក់ជាអ្នកធ្វើ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ