រាជធានីភ្នំពេញ ៖ លោក កឹម សុខា អ្នកនយោបាយខ្មែរមួយរូបដែលកំពុងរុំព័ទ្ធដោយបណ្តឹង «ក្បត់ជាតិ» នៅតុលាការក្រុងភ្នំពេញ បានធ្វើដំណើរទៅកាន់បណ្តាខេត្តមួយចំនួននៅជាយដែនប្រទេសថៃ ដោយលោកបានបញ្ជាក់ថា ដំណើរទៅកាន់ខេត្តទាំងនោះគឺជាការធ្វើសកម្មភាពសប្បុរសធម៌ ខ្មែរជួយខ្មែរ ដែលវាមិនប៉ះពាល់ដល់ បំរាមនយោបាយ ដែលតុលាការបានកំណត់ចំពោះលោកឡើយ ។
ជាក់ស្តែងនារសៀល ថ្ងៃព្រហស្បត៍ ទី១៤ ខែមករា ឆ្នាំ២០២១ នេះលោកកឹម សុខា រួមទាំងសហការីរបស់លោក បានមកកាន់ខេត្តជាប់ព្រំដែនថៃពីរទៀត ដើម្បីសួរសុខទុក្ខ លើកទឹកចិត្ត និងនាំយកជំនួយមនុស្សធម៌ជូនដល់ពលករខ្មែរដែលទើបតែវិលត្រឡប់មកពីធ្វើការនៅប្រទេសថៃ បន្ទាប់ពីក្រុមរបស់លោកបានចាកចេញពីខេត្តប៉ៃលិនកាលពីថ្ងៃម្សិលមិញ ។
អ្នកនយោបាយរូបនេះបានអះអាងថាសកម្មភាពរបស់ខ្លួនគឺមិនបានខុសនឹងបម្រាមរបស់តុលាការឡើយ ព្រោះលោកទៅកាន់ខេត្តជាយដែនថៃ គឺសម្រាប់ការចែកអំណោយដល់ពលរដ្ឋខ្មែរកំពុងធ្វើតត្តាឡីស័ក មិនមែនទៅឃោសនារឿងនយោបាយនោះទេ
លោក កឹម សុខាន បានបញ្ជាក់យ៉ាងដូច្នេះថា ៖ « នេះជាសកម្មភាពមនុស្សធម៌ សាមគ្គីធម៌ គុណធម៌ ខ្មែរជួយខ្មែរ ដែលខ្ញុំអាចចូលរួមបាន ដោយមិនប៉ះពាល់បំរាមនយោបាយ ដែលកំពុងបិទសិទ្ធិសេរីភាពខ្ញុំ។ នេះជាជំនួយមនុស្សធម៌ ដែលម្ចាស់ជំនួយតម្រូវឲ្យខ្ញុំយកទៅជូនពលករខ្មែរដែលទើបតែវិលត្រឡប់ពីធ្វើការនៅប្រទេសថៃ កំពុងធ្វើចត្តាឡីស័កក្នុងមណ្ឌលនានា» ។
បន្ថែមពីលើនេះ លោកក៏បានបង្ហាញការអរគុណបងប្អូនជនរួមជាតិដែលមានទឹកចិត្តសប្បុរស ចូលរួមដោយស្មារតីសាមគ្គីភាព ចែករំលែក ខ្មែរជួយខ្មែរ តាមលទ្ធភាព និងសទ្ធាជ្រះថ្លា មិនប្រកាន់និន្នាការ។
លោកបានបញ្ជាក់ថា ពេលព្រឹកថ្ងៃទី ១៤ មករានេះ គាត់បាទៅដល់ មណ្ឌលចត្តាឡីស័កក្នុងខេត្តឧត្តរមានជ័យ ទីកន្លែងដែលលោកបានផ្តល់ជូន នូវថវិកាចំនួនដប់លានរៀល(១០ ០០០ ០០០៛) ដែលជាជំនួយរបស់សប្បុរសជនខ្មែរររស់នៅរដ្ឋវ៉ាសុីនតោន(Washington State USA) តាមរយៈ KVD និងសម្ភារៈមួយចំនួនមានម៉ាស់ និងសាប៊ូកម្ចាត់មេរោគ ដែលជាជំនួយរបស់សប្បុរសជនខ្មែររស់នៅប្រទេសកាណាដា។
បន្ទាប់មកក្រុមការងារបស់លោក នាពេលរសៀលនៅមណ្ឌលចត្តាឡីស័កខេត្តបន្ទាយមានជ័យ និងបាន ផ្តល់ជូនថវិកាចំនួនដប់លានរៀល(១០ ០០០ ០០០៛) ដែលជាជំនួយរបស់សប្បុរសជនខ្មែររស់នៅរដ្ឋមួយចំនួនក្នុងសហរដ្ឋអាមេរិក និងសម្ភារៈមួយចំនួនមានម៉ាស់ និងសាប៊ូកម្ចាត់មេរោគ ដែលជាជំនួយរបស់សប្បុរសជនខ្មែររស់នៅប្រទេសបារាំង ៕
ចែករំលែកព័តមាននេះ