ប៉ូលិសនៅអាហ្វ្រិកខាងត្បូង បានចាត់វិធានការរឹតបន្ដឹងសន្ដិសុខនៅពហុកីឡដ្ឋានប្រកួត World Cup បន្ថែមទៀតក្រោយពីមានបាតុកម្មទាមទារដំឡើងប្រាក់ឈ្នួលពីបណ្ដាបុគ្គលិកសន្ដិសុខ World Cup ។ សូមរំលឹកថា កាលពីថ្ងៃអង្គារកន្លងទៅនេះ មានបុគ្គលិកសន្ដិសុខរាប់រយនាក់បានប្រមូលផ្ដុំគ្នាធ្វើបាតុកម្មនៅពហុកីឡដ្ឋាន Ellis Park ក្រុងចូហានណេស្ប៊ើក ដើម្បីឱ្យគេដំឡើងប្រាក់ឈ្នួលរបស់ខ្លួន ។
ក្រៅពីនេះប៉ូលិសក៏បានបន្ដរឹតបន្ដឹងសន្ដិសុខបន្ថែមទៀតនៅបណ្ដាពហុកីឡដ្ឋានក្នុងទីក្រុង Durban ក្រុង Cape Town និងក្រុង Port Elizabeth ។ ការតវ៉ាពីប្រាក់ឈ្នួល មកដល់ពេលនេះ បានរាលដាលស្ទើរតែចំនួនពាក់ កណ្ដាលនៃពហុកីឡដ្ឋានប្រកួត World Cup នៅអាហ្វ្រិកខាងត្បូង ។ មានប៉ូលិស១.០០០នាក់ ត្រូវបានគេដាក់ពង្រាយនៅពហុកីឡដ្ឋាន Ellis Park បន្ទាប់ពីមានផ្ទុះការតវ៉ាពីសំណាក់បុគ្គលិកសន្ដិសុខ ។
ការតវ៉ានោះ បានកើតឡើងមុនការប្រកួតរវាងក្រុមប្រេស៊ីល និងក្រុមកូរ៉េខាងជើង ។លោក Danny Jordan ប្រធានគណៈកម្មការរៀបចំការប្រកួតអាហ្វ្រិកបានថ្លែងថា រូបលោកទទួលស្គាល់នូវសិទ្ធិរបស់កម្មករក្នុងការធ្វើបាតុកម្ម តែបើប៉ះពាល់និងរំខានដល់ ការប្រកួតនោះពិតជាពុំអាចទទួលយកបានឡើយ ៕
ចែករំលែកព័តមាននេះ