ខេត្តព្រៃវែង ៖ ដីដុះ គឺជាកន្លែងងូតទឹកលេងកំសាន្តមួយដ៏ពេញនិយមសំរាប់ភ្ញៀវទេសចរណ៍ជាតិ និងអន្តរជាតិ បើទោះបីជាទីតាំងមួយនេះនៅមិនទាន់មានការរៀបចំឱ្យបានសមស្រប និងមិនទាន់មានអ្នកគ្រប់គ្រងឱ្យបានច្បាស់លាស់ក៏ដោយ ។
ទីកំសាន្តមួយនេះស្ថិតនៅតាមបណ្តោយដងទន្លេមេគង្គ ក្នុងឃុំស្វាយភ្លោះ ស្រុកពាមជរ ខេត្តព្រៃវែង ហើយក្នុងមួយថ្ងៃៗមានអ្នកមកងូតទឹកលេងកំសាន្តពី១០០នាក់ទៅ២០០នាក់សំរាប់ថ្ងៃធម្មតា ចំណែកនៅថ្ងៃបុណ្យផ្សេងៗដូចជាបុណ្យភ្ជំ និងបុណ្យចូលឆ្នាំជាដើមបានកើតឡើងពី៥០០នាក់ ទៅដល់១.០០០នាក់ឯណោះ។
ដោយមើលឃើញពីសក្តានុពលដ៏ធំធេងនៃតំបន់ដីដុះមួយនេះ ទើបនៅព្រឹកថ្ងៃទី១៦ កក្កដា ២០១៥ព្រឹកម៉ិញនេះ អាជ្ញាធរខេត្តដែលដឹកនាំដោយលោក អ៊ុំ វណ្ណា អភិបាលរងខេត្ត បានដឹកនាំមន្ត្រីជំនាញពាក់ពន្ធ័ទាំងអស់ចុះទៅត្រួតពិនិត្យទីតាំងតំបន់ដីដុះនេះ ដើម្បីរៀបចំផែនការកែលម្អតំបន់មួយនេះឱ្យក្លាយទៅជាតំបន់រមណីយដ្ឋានដ៏ស្រស់ស្អាត និងពេញនិយមសំរាប់ខេត្តព្រៃវែង ។
លោក អ៊ុំ វណ្ណ បានបញ្ជាក់ឱ្យអ្នកយកព័ត៌មាន«កោះសន្តិភាព»ដឹងថា ដើម្បីធ្វើឱ្យតំបន់ដីដុះនេះក្លាយទៅជារមណីយដ្ឋានមួយដែលមានស្តង់ដា គឺចាំបាច់យើងត្រូវតែរៀបចំឱ្យមានអ្នកគ្រប់គ្រងមួយដ៏ច្បាស់លាស់ជាមួយនឹងការបំពាក់នូវឧបករណ៍មួយចំនួនដូចជា ពោងសុវត្ថិភាព ពោងបញ្ជាក់ពីតំបន់ទឹកជ្រៅ និងរាក់ ខ្ចូសសំរាប់ភ្ញៀវអង្គុយទទួលទានអាហារ បង្គន់អនាម័យ និងធុងសំរាមជាដើម ហើយជាពិសេសគឺក្រុមជួយសង្គ្រោះនៅពេលមានហេតុការណ៍អ្វីមួយកើតឡើង ។
គួរបញ្ជាក់ផងដែរថា បើទោះបីជាតំបន់ដីដុះនេះគឺជាកន្លែងងូតទឹកកំសាន្តដ៏ពេញនិយមយ និងសប្បាយយ៉ាងណាក៏ដោយ ប៉ុន្តែទីតាំងនេះក៏ជួបនូវបញ្ហាប្រឈម ដែលទាមទារឱ្យមានការដោះស្រាយ និងចាត់វិធានការបន្ទាន់ផងដែរ ជាក់ស្តែងដូចជាករណីលង់ទឹកជាដើម ដែលមកដល់ពេលនេះមានអ្នកលង់ទឹកស្លាប់អស់ចំនួន៣នាក់ហើយ ដូច្នេះសូមជូនដំណឹងដល់បងប្អូនប្រជាពលរដ្ឋទាំងអស់ ដែលមានបំណងចង់ទៅលេងតំបន់ដីដុះនេះ សូមយកចិត្តទុកដាក់ ប្រយ័ត្នប្រយ៉ែងចំពោះមិត្តិភក្តិ ឬសមាជិកក្នុងគ្រួសារដែលមិនចេះហែលទឹក ជាពិសេសក្មេងតូចៗដែលទៅជាមួយ ព្រោះពេលនេះទឹកទន្លេចាប់ផ្តើមឡើងហើយ៕
ចែករំលែកព័តមាននេះ