រាជធានីភ្នំពេញ ៖ ថ្ងៃច័ន្ទ ទី១៣ កក្កដា នៅវេលាម៉ោងប្រមាណ១០ព្រឹក ក្រុមការងារទឹកពិសា វីតាល់ ដែលគេស្គាល់ថា ជាអ្នកក្រុមហ៊ុនផលិតទឹកពិសាក្នុងស្រុកដែលមានគុណភាពខ្ពស់បានពាំនាំថវិកាចំនួន១លានរៀល
រាជធានីភ្នំពេញ ៖ ថ្ងៃច័ន្ទ ទី១៣ កក្កដា នៅវេលាម៉ោងប្រមាណ១០ព្រឹក ក្រុមការងារទឹកពិសា វីតាល់ ដែលគេស្គាល់ថា ជាអ្នកក្រុមហ៊ុនផលិតទឹកពិសាក្នុងស្រុកដែលមានគុណភាពខ្ពស់បានពាំនាំថវិកាចំនួន១លានរៀល ជាមួយនឹងទឹកពិសាវីតាល់០៥កេស រួមទាំងអំណោយមួយចំនួនទៀតទៅជូនលោក ចឹក ភី ជាកម្មករសំណង់ក្រីក្រម្នាក់ដែលកំពុងតែសម្រាកព្យាបាលនៅមន្ទីរពេទ្យព្រះកុសមៈ បន្ទាប់ពីទទួលការវះកាត់ កាត់ដៃទាំងសងខាងក្រោយពីជួបឧបទ្ទវហេតុឆក់ខ្សែរភ្លើង អំឡុងពេលបំពេញការងារ។
ករណីលោកចឹក ភី ត្រូវបានអ្នកលេងហ្វេសបុកមួយចំនួនចាត់ទុកជាសោកនាដកម្មក៏គួរឲ្យសោកស្តាយមួយសម្រាប់គាត់នឹងគ្រួសារគាត់ទាំងមួល។ ដោយមើលឃើញពីសភាពខ្វះខាត និងក្តីលំបាករបស់គាត់ មានសប្បុរសមួយចំនួនបានផ្តល់ថវិកាផ្ទាល់ខ្លួនមួយចំនួនជូនដល់គាត់ ហើយក៏បានផ្សព្វផ្សាយដល់សប្បុរសជនជិតឆ្ងាយ ដើម្បីជួយដល់គាត់ផងដែរ។
ស្ថិតក្នុងទឹកមុខឈឺចាប់ដ៏កម្សត់ លោកចឹក ភី បានព្យាយាមនិយាយ និងបង្ហាញពីសេចក្តីថ្លែងអំណរគុណចំពោះវីតាល់ដែលបានទៅសួរសុខទុក្ខលោក រួមជាមួយនឹងអំណោយជាជំនួយដល់គាត់ក្នុងគ្រាដែលគាត់កំពុងត្រូវការជំនួយបំផុត។
លោកអ៊ុំ វណ្ណៈ តំណាងក្រុមហ៊ុន វីតាល់ បាននិយាយថា ថវិកាដែលបានជូនជាអំណោយដល់លោកចឹក ភី គឺបានមកពីមូលនិធិ ២៥៛ របស់វីតាល់។ ពួកយើងមានគម្រោងនឹងជួយដល់ប្រជាពលរដ្ឋកម្ពុជា ដែលត្រូវការជំនួយច្រើននាក់ទៀត ដែលប្រហែលជាមួយនាក់ក្នុងមួយខែ។ វីតាល់ បាននឹងកំពុងតែរៀបចំកម្មវិធីសប្បុរសជាច្រើន ដើម្បីឆ្លើយតបនឹងអតិថិជនទាំងអស់ ចំពោះការគាំទ្រទឹកពិសាវីតាល់កន្លងមក។ វីតាល់សង្ឃឹមថា ជំនួយទាំងនេះមិនត្រឹមតែជួយបងប្រុស ភីពីការព្យាបាលផ្លូវកាយប៉ុណ្ណោះទេ គឺគាំជួយឲ្យបងប្រុសគាត់មានទឹកចិត្តក្នុងការរស់បន្តជីវិតជួបជុំគ្រួសារគាត់បន្តទៀត។
លោក គង់ ចិត្រា ដែលត្រូវជាប្អូនប្រុសបង្កើតរបស់លោក ចឹក ភី បាននិយាយទាំងអួលដើម.កថា លោកពិតជាអរគុណចំពោះក្រុមហ៊ុន វីតាល់ ដែលមានចិត្តសប្បុរសក្នុងការជួយបងប្រុសលោកដែលកំពុងតែមានការឈឺចាប់ទាំងផ្លូវកាយ និងផ្លូវចិត្ត។ លោកបន្តថា បងប្រុសលោកជួបគ្រោះថា្នក់ជិតមួយខែហើយ តាំងពីថ្ងៃទី១៥ មិថុនា មកម៉្លេះ ប៉ុន្តែគ្រួសារគ្មានប្រាក់ព្យាបាល ទើបសម្រេចចិត្តដាក់ទុកគាត់ឲ្យសម្រាកនៅមន្ទីពេទ្យខេត្តតាកែវ អស់រយៈពេលជាង១០ថ្ងៃ ប៉ុន្តែដោយសារតែមើលឃើញថា សភាពរបស់បងប្រុលលោកកាន់តែធ្ងន់ទៅលោក និងគ្រួសារក៏បានសម្រេចចិត្តលក់ក្របីមួយនឹមបានប្រាក់មួយចំនួន ទើបបញ្ជូនបងប្រុសលោកមកមន្ទីរព្រះកុសមៈនេះ។ ការព្យាបាលរបស់បងប្រុស ភី នឹងត្រូវការរយៈពេលយូរ ក៏ដូចជាថវិកាច្រើនផងដែរ។
គួរបញ្ជាក់ផងដែរថា មុននឹងថ្ងៃផ្តល់អំណោយនេះ វីតាល់ ក៏បានអំពាវនាវ និងស្វាគមន៍ដល់មិត្តហេ្វសប៊ុក និងជនរួមជាតិទាំងអស់ដែលមានចំណាប់អារម្មណ៍អាចចូលរួមជាមួយវីតាល់បាននៅថ្ងៃច័ន្ទ ទី១៣ កក្កដានេះ នៅមន្ទីព្រះកុសមៈ បន្ទប់លេខ៤ ជាន់ទី២ គ្រែ២២។ វីតាល់សង្ឃឹមថា ថវិកា ឬអំណោយបន្តិចបន្តួចរបស់អ្នកទាំងអស់គ្នានឹងក្លាយជាវត្ថុដ៏មានតម្លៃ ដើម្បីលើកទឹកចិត្តបងប្រុស ភី ឲ្យបានឆាប់ជាសះស្បោយ និងអាចមានកម្លាំចិត្តរស់ជុំគ្រួសារគាត់បន្តទៀត។
ចែករំលែកព័តមាននេះ