រាជធានីភ្នំពេញ ៖ អាជ្ញាធររាជធានីភ្នំពេញ ដឹកនាំដោយលោកឃួង ស្រេង ជាអភិបាល បាននិងកំពុងបន្តការងារជួសជុលនិងអ៊ុតកៅស៊ូផ្លូវចំនួន១៦ខ្សែនៅក្នុងមូលដ្ឋានខណ្ឌដូនពេញ ដែលទទួលរងការខូចខាតដោយជំនន់ទឹកភ្លៀងកាលពីកន្លងមក ដើម្បីសំរួលដល់ការធ្វើដំណើររបស់ប្រជាពលរដ្ឋនិងដើម្បីជាការលើកសោភណ្ឌភាពរាជធានីភ្នំពេញអោយកាន់តែមានសម្រស់មួយកម្រិតថែមទៀតផងដែរ។
កាលពីល្ងាចថ្ងៃទី២៩ ធ្នូ កន្លងទៅនេះ លោកសាំ ពិសិដ្ឋប្រធានមន្ទីរសាធារណការនិងដឹកជញ្ជូនរាជធានីភ្នំពេញ និងលោកសុខ ពេញវុធ អភិបាលខណ្ឌដូនពេញ បានចុះពិនិត្យដំណើរការនៃការជួសជុលកែលំអរនៅផ្លូវលេខ៥១ ចាប់ពីផ្លូវលេខ១១៤ ដល់មហាវិថី ព្រះសីហនុ នៅក្នុងមូលដ្ឋានខណ្ឌដូនពេញ ខណៈដែលក្រុមការងារកំពុងតែអ៊ុតកៅស៊ូACលើបណ្តោយផ្លូវនេះ ។
លោកសុខ ពេញវុធ អភិបាលខណ្ឌដូនពេញ បានលើកឡើងថា សកម្មភាពជួលជុល ផ្លូវលេខ៥១ ដោយចាប់ពីផ្លូវលេខ១១៤ ដល់មហាវិថី ព្រះសីហនុនេះជាផ្លូវមួយ ក្នុងចំណោមផ្លូវទាំង១៦ ខ្សែក្នុងខណ្ឌ ដែលលោកឃួង ស្រេង អភិបាលនៃគណៈអភិបាលរាជធានីភ្នំពេញបានសំរេចឲ្យធ្វើការជួសជុលកែលំអរឡើងវិញជាបន្ទាន់ ក្រោយទទួលរងការខូចខាតដោយជំនន់ទឹកភ្លៀងដើម្បីសំរួលការធ្វើដំណើររបស់ប្រជាពលរដ្ឋ។
លោកសុខ ពេញវុធ ក្នុងនាមប្រជាពលរដ្ឋក្នុងខណ្ឌដូនពេញបានថ្លែងអំណរគុណយ៉ាងជ្រាលជ្រៅដល់លោកឃួង ស្រេង អភិបាលរាជធានីដែលបានអនុវត្តតាមអនុសាសន៏ដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ណែនាំឲ្យមានការជួសជុល និងស្តារឡើងវិញ រាល់ហេដ្ឋារចនាសម្ពន្ធ័ដែលខូចខាតក្រោយជំនន់ទឹកភ្លៀងតាមបណ្តាខណ្ឌមួយចំនួននៅក្នុងរាជធានីភ្នំពេញ ហើយលោកក៏បានសំណូមពរដល់បងប្អូនប្រជាពលរដ្ឋដែលរស់នៅអមសងខាងផ្លូវដែលកំពុងតែដំណើរការ ជួសជុលនេះសូមចូលរួមសហការ ដើម្បីអោយការដ្ឋានប្រព្រឹត្តទៅដោយរលូននិងបានរួចរាល់តាមការគ្រោងទុក។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានណែនាំឱ្យក្រុមការងារជួសជុល និងអ៊ុតកៅស៊ូផ្លូវត្រូវយកចិត្តទុកដាក់ឱ្យបានត្រឹមត្រូវ និងមានគុណភាពយូអង្វែង ព្រមទាំងសុំការយោគ និងអធ្យាស្រ័យពីប្រជាពលរដ្ឋចំពោះការបិទផ្លូវក្នុងរយៈពេលខ្លី និងការរំខាននៃការដ្ឋាននោះ ៕ (កែសម្រួលដោយ ៖ ធីតា)
ចែករំលែកព័តមាននេះ