រាជធានី​ភ្នំពេញ ៖ សម្តេច​តេ​ជោ​នាយក​រដ្ឋមន្ត្រី ហ៊ុន សែន បាន​ប្រកាស​ថា ថ្ងៃ​ទី​២៩
ខែធ្នូ ឆ្នាំ​២០២០ កម្ពុជា​មាន​តំណក់​ប្រេង​ផ្ទាល់ខ្លួន​ដំបូង​ចេញពី​ប្លុក​A ។ សម្តេច​តេ​ជោ បាន​សរសេរ​លើ​បណ្តាញ​សង្គមនៅ​ថ្ងៃ​ទី​២៩ ខែធ្នូ ថា ៖ «​ខ្ញុំព្រះករុណា ខ្ញុំក្នុងនាម​​រាជ​រដ្ឋាភិបាល​នៃ​ព្រះរាជាណាចក្រ​កម្ពុជា មាន​សេចក្តី​សោមនស្ស​រីករាយ​ក្រៃ​លែង ក្នុង​ការ​ជម្រាប​ជូន​បងប្អូន​ជនរួមជាតិ​ទាំងអស់ អំពី​ការ​ចាប់ផ្តើម​ផលិតកម្ម​ប្រេង​ដំបូង​របស់​កម្ពុជា នៅ​តំបន់​ប្លុក​A ឈូង​សមុទ្រ​កម្ពុជា ដែល​ជា​ការ​ទន្ទឹងរង់ចាំ​អស់​រយៈកាល​ដ៏​យូរ​កន្លង​មកនេះ ។

ដោយ​កិច្ច​ខិតខំ​ប្រឹងប្រែង​របស់​រាជរ​ដ្ឋា​ភិបាល និង​ការ​ចូលរួម​យ៉ាង​សកម្ម​ពី​ក្រុមហ៊ុន
Kris Energy ដែល​ជា​ប្រតិបត្តិ​ករ​នៃ​គម្រោង​នេះ មក​ដល់​ពេល​នេះ​យើង​សម្រេច​បាន​នូវ​ការ​បញ្ចប់ដោយ​ជោគជ័យ​ជា​ស្ថាពរ នូវ​ការ​សាងសង់ ការបំពាក់​គ្រឿង​សម្ភារ​និង​បរិក្ខារ​នៃ​បណ្តា​ហេ​ដ្ឋារចនាសម្ព័ន្ធ​ចាំបាច់​នានា សម្រាប់​ដំណើរការ​ផលិតកម្ម​ធនធាន​រ៉ែ​ប្រេង​របស់​យើង​» ។

សម្តេច​តេ​ជោបន្ត​ថា «​តំណក់​ប្រេង​លើកដំបូង​របស់​កម្ពុជា​ចាប់​ផ្តើម​ផលិត​ចេញពី​អណ្តូង​ប្រេង​ទី​១​ឈ្មោះ A-0ID នៃ​ផ្លា​ត​ហ្វ​ម A នៅ​ក្នុង​ប្លុក​នៃ​ឈូង​សមុទ្រ​កម្ពុជា នៅ​ថ្ងៃ​ទី​២៩ ខែធ្នូ ឆ្នាំ​២០២០ ដែល​គាប់​ជួន​ជាមួយ​ថ្ងៃ​ខួប​លើក​ទី​២២ នៃ​ការ​បញ្ចប់សង្គ្រាម​នាំ​មក​នូវ​ការ​ឯកភាព​ជាតិ ឯកភាព​ទឹកដី តាម​រយៈ​នយោបាយ​ឈ្នះ ឈ្នះ (២៩​ធ្នូ ១៩៩៨-២៩ ធ្នូ ២០២០) ។ ថ្ងៃ​ទី២៩ ខែធ្នូ ឆ្នាំ​១៩៩៨ បង្ក​លក្ខណសម្បត្តិ​គ្រប់យ៉ាង​ឱ្យ​យើង​មាន​តំណក់​​ប្រេង​លើក​ដំបូង​នៅ​កម្ពុជា នា​ថ្ងៃ​ទី​២៩ ខែធ្នូ ឆ្នាំ​២០២០​នេះ​» ។

សម្តេច​តេ​ជោ ក៏​សូម​ឆ្លៀតឱកាស​នេះ​រំឭកជម្រាប​ជូន​បងប្អូន​ជនរួមជាតិ​ជ្រាប​ថា កិច្ច​ព្រមព្រៀង​ប្រេងកាត​ដំបូង​ត្រូវ​បាន​ចុះហត្ថលេខា​នៅ​ឆ្នាំ​២០០២ ជាមួយ​សម្ព័ន្ធ​ក្រុមហ៊ុន មាន​ក្រុមហ៊ុន Chevron Oversea Petroleum (Cambodia) Ltd., LG Caltex Oil Corporation, Moeco Cambodia Co., Ltd. និង KrisEnergy ។

សម្ព័ន្ធ​ក្រុមហ៊ុន​នេះ​ដឹកនាំ​ដោយ​ក្រុមហ៊ុន Chevron របស់​អា​មេ​រិ​ក ។ នៅ​ឆ្នាំ​២០១០ ក្រុមហ៊ុន Chevronបាន​​ប្រកាស​រក​ឃើញ​ជម្រក​រ៉ែប្រេង​មាន​លក្ខណៈ​ពាណិជ្ជកម្ម​ជា​លើក​ដំបូងរបស់​កម្ពុជា និង​បាន​កសាង​គម្រោង​ផែនការអភិវឌ្ឍន៍​និង​អាជីវកម្ម ដើម្បី​ស្នើ​សុំ​រាជរដ្ឋាភិបាលពិនិត្យ​និង​សម្រេច ។ តាម​ផែនការ​នោះ ផលិតកម្ម​ប្រេង​ដំបូង​គ្រោង​នឹង​ចាប់ផ្តើម​នៅ​អំឡុង​ខែធ្នូ ឆ្នាំ​២០១២ ។

ប៉ុន្តែ​ដោយ​ការ​ពិនិត្យ​លក្ខណៈ​បែងចែក​ផល​សេដ្ឋកិច្ច និង​សង្គតិភាព​ច្បាប់​ពាក់ព័ន្ធ និង​ផែនការអភិវឌ្ឍន៍ និង​អាជីវកម្ម​ស្នើ​ឡើង​ដោយ​ក្រុមហ៊ុន Chevron នៅ​ពេល​នោះ បាន​តម្រូវ​ឲ្យ​ភាគី​ទាំង​ពីរ​ត្រូវ​ចរចា​កែសម្រួល​លក្ខខណ្ឌ​កិច្ចព្រមព្រៀង​មួយ​ចំនួន​ឡើង​វិញ ដើម្បី​ឲ្យ​មាន​សង្គតិភាព​ជាមួយ​បទ​ប្បញ្ញត្តិ​ច្បាប់​កម្ពុជា​ផង និង​មាន​សមធម៌​កាន់តែ​ប្រសើរ​នៅ​ក្នុង​ការ​បែងចែក​ផល​សេដ្ឋកិច្ច​ពី​ផែនការអាជីវកម្ម​នេះ​ផង ដំណើរការ​អនុវត្ត​តាម​ផែនការ​ផលិត​ប្រេង​នៅ​ខែធ្នូ ឆ្នាំ​២០១២ ក៏​ត្រូវ​បាន​រាំងស្ទះ​មិន​អាច​អនុវត្ត​បាន ។

ការ​ចរចា​កិច្ចព្រមព្រៀង​ប្រេងកាត ក៏​បាន​ប្រព្រឹត្ត​ទៅ​យ៉ាង​ស្វិតស្វាញ​រវាង​ភាគី​ទាំង​ពីរ​(​រាជរដ្ឋាភិបាល​និង​ក្រុមហ៊ុន​) ទាំង​លើ​ទិដ្ឋភាព​ច្បាប់ បច្ចេកទេស និង​សេដ្ឋកិច្ច ។ នៅ​ក្នុង​រយៈពេល​ចរចា​ដ៏​តឹងតែង​នេះ ក្រុមហ៊ុន Chevron Oversea Petroleum (Cambodia) Ltd., LGCaltex Oil Corporation និង​ក្រុមហ៊ុន Moeco Cambodia Co., Ltd. បាន​ស្នើ​សុំ​ដកខ្លួន​ចេញ​ជា​បន្តបន្ទាប់​គ្នា នៅ​ឆ្នាំ​២០១៤ និង​ឆ្នាំ​២០១៦​។

ការ​ចរចា​បាន​បន្ត​អូស​បន្លាយពេល​យ៉ាង​យូរ​តាំងពី​ឆ្នាំ​២០១០ រហូត​ដល់​ថ្ងៃ​ទី​២៣​ខែ​សីហា​ឆ្នាំ ២០១៧ ទើប​សម្រេច​បាន​នូវ​កិច្ចព្រមព្រៀង​ថ្មី និង​គម្រោង​ផែនការអភិវឌ្ឍន៍​និង​អាជីវកម្ម​អណ្តូងប្រេង​ថ្មី ដែល​បើកផ្លូវ​ឲ្យ​ដំណើរការ​សាងសង់​និង​អភិវឌ្ឍ​ផ្លា​ត​ហ្វ​ម​អណ្តូងប្រេង​អាច​ចាប់ផ្តើម​បាន ។ សម្តេច​តេ​ជោ​បន្ត​ថា ហេដ្ឋារចនាសម្ព័ន្ធ​ផលិត
កម្ម​ប្រេង​ធំ​ៗ​និង​សំខាន់​ៗ ដែល​បាន​សាងសង់ ដំឡើង និង​រៀបចំ​រួចរាល់​ជា​ស្ថាពរ​នៅ​ក្នុង​តំបន់​ប្លុក​A សម្រាប់​ដំណើរការ​ផលិតកម្ម​ជា​រួម​មាន​៖

ផ្លា​ត​ហ្វ​ម​អណ្តូងប្រេង​ផលិត​នៅ​កោះ​បា​តាង​នៃ​ប្រទេស​ឥណ្ឌូ​ណេ​ស៊ី ចាប់ផ្តើម​សាង​សង់​នៅ​អំឡុ​ង​ខែធ្នូ ឆ្នាំ​២០១៩ និង​បាន​បញ្ចប់​នៅ​ខែសីហា ឆ្នាំ​២០២០ ។ ផ្លា​ត​ហ្វ​ម​នេះ បាន​ដឹក​ចូល​មក​ដល់​តំបន់​ប្លុក​A និង​បាន​បញ្ចប់​ការ​ដំឡើង​រួចរាល់​ជា​ស្ថាពរ​នៅ​ថ្ងៃ​ទី​៧ ខែកញ្ញា ឆ្នាំ​២០២០​។ កប៉ាល់​ផលិតកម្ម​ប្រេង​បាន​ដំឡើង ជួសជុល និង​បំពាក់​សម្ភារ​បរិក្ខារ​រួចរាល់​នៅ​ខែកញ្ញា ឆ្នាំ២០២០ នៅ​ប្រទេស​សិង្ហ​បុរី និង​បាន​ដឹក​មក​ដល់ ​និង​ដំឡើង​រួចរាល់​នៅ​ប្លុក​A នៅ​ថ្ងៃ​ទី​១៨ ខែតុលា ឆ្នាំ​២០២០ ។

កប៉ាល់​ស្តុក​ប្រេង បាន​រៀបចំ​និង​ត្រៀមចាំ​រួចរាល់​នៅ​ប្លុក​A នៅ​ថ្ងៃ​ទី​៩ ខែវិច្ឆិកា ឆ្នាំ​២០២០ ។ អណ្តូងប្រេង​ទី​១ បាន​បញ្ចប់​ការ​សាងសង់​នៅ​ថ្ងៃ​ទី​២៣ ខែធ្នូ ឆ្នាំ​២០២០ និង​ចាប់ផ្តើម​ផលិត​ចេញ​ប្រេង​ដំបូង​នៅ​ថ្ងៃ​ទី​២៩ ខែធ្នូ ឆ្នាំ​២០២០​នេះ ។ ក្រៅពី​នេះ មាន​អណ្តូងប្រេង​ចំនួន​២​ទៀត​ក៏​បាន​ខួង​ជម្រៅ​ដល់​ស្រទាប់​ជម្រក​រ៉ែ​ប្រេង​រួច​ហើយ​ដែរ ។

សម្តេច​តេ​ជោ​បាន​លើក​ឡើង​ទៀត​ថា ការចាប់ផ្តើម​ផលិតកម្ម​ប្រេង​នេះ គឺជា​ពរ​ជ័យ​សម្រាប់កម្ពុជា ។ នេះ​ជា​ការ​ចាប់ផ្ដើម​មួយ​ជំហាន​ដំបូង​ដ៏​សំខាន់ សម្រាប់​កម្ពុជា​ឆ្ពោះទៅ​បង្កើត​បាន​នូវ​សមត្ថភាព​ជាតិ​និង​ខឿន​ឧស្សាហកម្ម​ប្រេងកាត ឧស្ម័ន និង​ថាមពល​នៅ​កម្ពុជា ។ ផលប្រយោជន៍​សំខាន់​ៗ​រួម​មាន ៖ ចំណូល​ថវិកាជាតិ ផល​សេដ្ឋកិច្ច​ទទួល​បាន​ពី​ការ​បង្កើត​បាន​នូវ​ពិពិធ​កម្ម​ខឿន​ឧស្សាហកម្ម​ក្នុង​វិស័យ​ប្រេងកាត និង​ការ​កសាង​សមត្ថភាព​ជាតិ​នៅ​ក្នុង​វិស័យ​នេះ ។

ការ​រក​ឃើញ​និង​អាជីវកម្ម​ធនធាន​រ៉ែ​ប្រេង​នៅ​កម្ពុជា ក្រោម​ការ​ដឹកនាំ​របស់​រាជរដ្ឋាភិ​បាល គឺជា​ពរ​ជ័យ​សម្រាប់​ប្រជាជន និង​ប្រទេស​ជាតិ មិនមែន​ជា​បណ្តាសា​ដូច​ការ​លើក​ឡើង​របស់​ជន​អគតិ​មួយ​ចំនួន​នោះ​ទេ ។ កូ​វី​ដ​-១៩​បាន​រំខាន​ដល់​យើង តែ​ក៏​មិន​អាច​បំផ្លាញ​ចោល​នូវ​ការ​ខិតខំ​របស់​យើង​ដើម្បី​ផលិត​ប្រេង​នោះ​បាន​ដែរ​។ ចូល​ឆ្នាំ​សកល​ថ្មី​២០២១​ខាង​មុខ ទោះ​យើង​មិន​បាន​សប្បាយ​រីករាយ​ដូច​ឆ្នាំ​មុន​ៗ​ដោយសារ​តែ​កូ​វី​ដ​-១៩ តែ​យើង​ទទួល​បាន​កាដូ​ដ៏​ធំ​សម្រាប់​ជាតិ​យើង នោះ​គឺ​ប្រេង​ដែល​ផលិត​ចេញ​លើក​ដំបូង​ក្នុង​ទឹកដី​យើង ។

ឆ្នាំ​ថ្មី សមិទ្ធផល​ថ្មី​សម្រាប់​សេដ្ឋកិច្ច​កម្ពុជា​ចាប់ពី​ដើមឆ្នាំ​២០២១​តទៅ ។ ទូលព្រះបង្គំ ខ្ញុំព្រះករុណា ខ្ញុំ សូម​ឆ្លៀតឱកាស​ដ៏​មហោឡារិក​នេះ សម្តែង​នូវ​អំណរ​គុណ​យ៉ាង​ជ្រាលជ្រៅ​និង​ស្មោះស្ម័គ្រ​បំផុត​ជូន​ចំពោះ​ជនរួមជាតិ​ទាំងអស់ ដែល​បាន​ចូលរួម​និង​គាំទ្រ​យ៉ាង​សកម្ម​ជាមួយនឹង​រាជរដ្ឋាភិបាល នៅ​ក្នុង​ដំណើរការ​អភិវឌ្ឍន៍សេដ្ឋកិច្ច​ និង​សង្គម​នា​ពេល​កន្លង​មកនេះ ៕