ខេត្តស្ទឹងត្រែង ៖ កម្លាំងសមត្ថកិច្ចបានឃាត់ខ្លួនជនសង្ស័យចំនួន៣នាក់ ក្រោយរកឃើញពីការលួចដឹកជញ្ជូនកាំជ្រួចឆ្លងដែនមកពីប្រទេសឡាវចូលកម្ពុជា ដោយខុសច្បាប់ ។ តាមព័ត៌មានពីសមត្ថកិច្ចឲ្យដឹងថា កាលពីរសៀលថ្ងៃទី១ ខែតុលា ឆ្នាំ២០២៥…
ខេត្តស្ទឹងត្រែង ៖ កម្លាំងសមត្ថកិច្ចបានឃាត់ខ្លួនជនសង្ស័យចំនួន៣នាក់ ក្រោយរកឃើញពីការលួចដឹកជញ្ជូនកាំជ្រួចឆ្លងដែនមកពីប្រទេសឡាវចូលកម្ពុជា ដោយខុសច្បាប់ ។ តាមព័ត៌មានពីសមត្ថកិច្ចឲ្យដឹងថា កាលពីរសៀលថ្ងៃទី១ ខែតុលា ឆ្នាំ២០២៥ កម្លាំងយោធានិងប៉ុស្តិ៍នគរបាលការពារព្រំដែនគោក៧០១ បានឃាត់រថយន្តម៉ាកសាំយ៉ុង ពណ៌សម្បកឪឡឹក មួយគ្រឿង ពាក់ផ្លាកលេខ ២B. ៧២២៨ ដោយប្រទះឃើញកាំជ្រួចចំនួន៥០កេស ក្នុងមួយកេសមាន១៨ប្រអប់ ។
ក្រោយការត្រួតពិនិត្យ និងសាកសួរជនសង្ស័យបានឆ្លើយសារភាពថា កាំជ្រួចទាំងនេះ បានដឹកចេញពីប្រទេសឡាវ តាមច្រករបៀង ចំណុចកោះស្ដាំដាក់តាមទូកឆ្លងមកឃុំព្រះរំកិល ស្រុកបុរីអូរស្វាយសែនជ័យ និងត្រូវបន្តគោលដៅដឹកជញ្ជូនទៅខេត្តកំពង់ធំ ។ តាមការឲ្យដឹងពីសមត្ថកិច្ច ជនសង្ស័យដែលត្រូវបានឃាត់ខ្លួនមានចំនួន៣នាក់ ។
១-ឈ្មោះ អូន សំណាង ភេទប្រុស អាយុ២០ឆ្នាំ ទីលំនៅភូមិក្រោម ឃុំព្រះរំកិល ស្រុកបូរីអូរស្វាយសែនជ័យ ។ ២-ឈ្មោះ ឡាំង វិចិត្រ ភេទប្រុស អាយុ៣៣ឆ្នាំ ទីលំនៅភូមិអន្លង់ស្វាយ ឃុំព្រះរំកិល ស្រុកបុរីអូស្វាយសែនជ័យ ។ និង៣-ឈ្មោះ សុវណ្ណ ធារ៉ាក់ ភេទប្រុស អាយុ២៥ឆ្នាំ ទីលំនៅភូមិក្រោម ឃុំព្រះរំកិល ស្រុកបុរីអូរស្វាយសែនជ័យ ។
ក្រោយការឃាត់ខ្លួនជនសង្ស័យខាងលើ កម្លាំងប៉ុស្តិ៍នគរបាលការពារព្រំដែនគោក៧០១ បានបញ្ជូនមកស្នងការដ្ឋាននគរបាលខេត្តស្ទឹងត្រែងដើម្បីសាកសួរបន្ត ។ លោកវរសេនីយ៍ឯក ភិវ ស៊ីនួន អ្នកនាំពាក្យស្នងការដ្ឋាននគរបាលខេត្តស្ទឹងត្រែងបានបញ្ជាក់នៅរសៀលថ្ងៃទី៣ ខែតុលា ឆ្នាំ២០២៥ថា ក្រោយបញ្ចប់នីតិវិធី និងត្រូវបញ្ជូនទៅតុលាការ ។
មិនមានមន្ត្រីជំនាញមួយណាបង្ហាញថាតើកាំកាំជ្រួចនេះបាននាំចូលមកធ្វើអ្វីឱ្យប្រាកដនោះទេ តែមន្ត្រីខ្លះសង្ស័យថាកាំជ្រួចដែលនាំចូលនេះអាចយកមកច្នៃជាកាំជ្រួចផ្សេងៗទៀត ដោយប្រើរំសេវកាំជ្រួចនាំចូលនេះ ។ ទាក់ទិននឹងគោលដៅនាំមកកាន់ខេត្តកំពង់ធំ សមត្ថកិច្ចមិនបានប្រាប់ឱ្យដឹងជាសាធារណៈនោះទេ សង្ស័យនាំចូលមកក្នុងរាជធានីភ្នំពេញក៏មិនច្បាស់ដែរ ៕
ចែករំលែកព័តមាននេះ