រាជធានីភ្នំពេញ ៖ ក្នុងន័យបញ្ជាក់ជូនកសិករឱ្យយល់ច្បាស់អំពីអត្ថប្រយោជន៍នៃសហគមន៍កសិកម្មទំនើបលោក ឃឹម ហ្វីណង់ អនុរដ្ឋលេខាធិការ និងអ្នកនាំពាក្យក្រសួងកសិកម្ម រុក្ខាប្រម៉ាញ់ និងនេសាទ បានថ្លែងថា…
រាជធានីភ្នំពេញ ៖ ក្នុងន័យបញ្ជាក់ជូនកសិករឱ្យយល់ច្បាស់អំពីអត្ថប្រយោជន៍នៃសហគមន៍កសិកម្មទំនើបលោក ឃឹម ហ្វីណង់ អនុរដ្ឋលេខាធិការ និងអ្នកនាំពាក្យក្រសួងកសិកម្ម រុក្ខាប្រម៉ាញ់ និងនេសាទ បានថ្លែងថា សហគមន៍កសិកម្មទំនើប គឺជាយុទ្ធសាស្ត្រនៃការ «លក់មុនដាំ» និងជួយឱ្យកសិករលក់ផលិតផលកម្មក្នុងតម្លៃខ្ពស់ផងដែរ។
ថ្លែងនៅព្រឹកថ្ងៃទី០៣ ខែតុលា ឆ្នាំ២០២៥ ក្នុងកម្មវិធីសន្និសីទសារព័ត៌មានស្ដីពី «វេទិកា និងពិព័រណ៍កសិកម្មកម្ពុជាឆ្នាំ២០២៥ ឬហៅកាត់ថា (CAFE25)» នៅទីស្តីការក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ អ្នក បាននិយាយថា បច្ចុប្បន្ននេះ ពាក់ព័ន្ធនឹងសហគមន៍កសិកម្មទំនើបយើងមាន២២សហគមន៍ហើយ ដែលយើងបានចុះបញ្ជីហើយ ហើយយើងនៅសល់ប្រហែលជាទៅ៥ទៀតកំពុងតែដំណើរការ ។
លោក ឃឹម ហ្វីណង់ បានបន្តថា អីចឹងទេ ! តាមការរំពឹងទុករបស់ក្រសួងយើងគិតថា ក្នុងរង្វង់ប្រហែលជាចុងឆ្នាំនេះចំនួននៃសហគមន៍ទំនើបប្រហែលជាអាចកើនឡើងដល់រង្វង់៣០សហគមន៍កសិកម្មទំនើប តែម្តង ។ បើយើងមើលទៅលើគ្រួសារ យើងមានប្រមាណជា៣០០០គ្រួសាររួចមកហើយ ជាសមាជិកសហគមន៍កសិកម្មទំនើប ដែលគ្របដណ្តប់លើផ្ទៃដីកសិកម្មចំនួនប្រហែលជា២ម៉ឺនហិកតា ។
លោក ឃឹម ហ្វីណង់ បានបញ្ជាក់ បច្ចុប្បន្ននេះ យើងផ្តោតទៅលើដំណាំចំនួន៤ប្រភេទ គឺមានដំណាំស្រូវ ដំណាំបន្លែ ដំណាំម្រេច និងដំណាំចន្ទីរ ។ ដោយឡែក យើងក៏មានដំណាំម្ទេសដែរ តែយើងអាចចាត់ទុកម្ទេសក្នុងចង្កោមនៃដំណាំបន្លែតែម្តង ។
សូមបញ្ជាក់ថា សហគមន៍កសិកម្មទំនើប គឺគ្រប់សហគមន៍ដែលយើងរៀបចំសុទ្ធសឹងតែមានការតភ្ជាប់ទីផ្សារទុកមុនជានិច្ច ។ របៀបយើងធ្វើការ គឺបែបនោះឯង គឺយើងព្យាយាមលក់មុនដាំតែម្តង ហើយវាជាចំណុចពិសេសមួយ ធ្វើឱ្យសហគមន៍កសិកម្មទំនើបអាចធនាជូននូវទីផ្សារច្បាស់លាស់មួយ តម្លៃច្បាស់លាស់មួយជូនដល់កសិករ មុនពេលដែលកសិករធ្វើផលិតកម្ម ។ ដូច្នេះយើងគិតថា គ្រប់ដំណាំរបស់យើងមិនថា បន្លែ ម្រេច ស្រូវ ចន្ទីរ ទេ យើងសុទ្ធតែមានការចុះកិច្ចសន្យាទុកជាមុន មុននឹងយើងរៀបចំជាសហគមន៍ ។
យើងចូលជាសហគមន៍ធ្វើឱ្យកសិករទទួលបានអត្ថប្រយោជន៍ច្រើនពីសហគមន៍កសិកម្មទំនើប ការគាំទ្រមានច្រើន ទាំងការគាំទ្របច្ចេកទេស ទាំងការគាំទ្រដើមទុន និងការគាំទ្រខាងទីផ្សារ ។ ហើយក្រៅពីនោះយើងឃើញសល់ មានអត្ថប្រយោជន៍ផ្សេងៗទៀត ។ ហើយអ្វីដែលជាចំណុចពិសេសមួយទៀត របស់សហគមន៍កសិកម្មទំនើប គឺការកាត់បន្ថយថ្លៃដើម ។
រហូតមកដល់ពេលនេះ កសិករដែលនៅក្នុងសហគមន៍ទំនើបគាត់ទទួលបាន ឧទាហរណ៍ដូចជា ជីមួយមុខ ជាធម្មតាគាត់ទិញជី ក្នុងសហគមន៍ថោកជាងពេលដែលគាត់ទិញដោយខ្លួនឯង ក្នុងរង្វង់១៥ទៅ២០ភាគរយ ។ អីចឹង! ទាំងនេះជាចំណុចសំខាន់ ដែលកសិករអាចទទួលយកបានពីការចូលរួមសហគមន៍កសិកម្មទំនើប ហើយជាអ្វីដែលក្រសួងកសិកម្មតែងតែជំរុញលើកទឹកចិត្ត ដើម្បីឱ្យបងប្អូនកសិកររបស់យើងពិចារណា និងចូលរួមជាមួយសហគមន៍របស់យើង ។
ជាចុងក្រោយលោក ឃឹម ហ្វីណង់ បានបន្ថែមថា ជាផែនការរបស់យើងក្នុងរង្វង់រយៈពេល២ទៅ៣ឆ្នាំខាងមុខនេះ យើងគ្រងនឹងបង្កើតសហគមន៍កសិកម្មទំនើបប្រហែលជា៥០សហគមន៍ ហើយគោលដៅមិនមែនសហគមន៍ច្រើនទេ តែសហគមន៍ធំៗ តួយ៉ាងដូចជាសហគមន៍ស្រូវ ៕
ចែករំលែកព័តមាននេះ