ខេត្តបន្ទាយមានជ័យ ៖ នៅវេលាម៉ោង០០និង៤១នាទីរំលងអធ្រាត្រ ឈានចូលថ្ងៃទី៣ ខែតុលា ឆ្នាំ២០២៥ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត សហការជាមួយក្រុមល្បាតព្រំដែន ក្នុងភូមិសាស្ត្រក្រុងប៉ោយប៉ែត បានឃាត់ខ្លួនបុរសថៃ២នាក់…
ខេត្តបន្ទាយមានជ័យ ៖ នៅវេលាម៉ោង០០និង៤១នាទីរំលងអធ្រាត្រ ឈានចូលថ្ងៃទី៣ ខែតុលា ឆ្នាំ២០២៥ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត សហការជាមួយក្រុមល្បាតព្រំដែន ក្នុងភូមិសាស្ត្រក្រុងប៉ោយប៉ែត បានឃាត់ខ្លួនបុរសថៃ២នាក់ ខណៈល្បាតមកដល់ចំណុចដីវាលមុខបុរីស្តារហ្គោល ស្ថិតក្នុងភូមិព្រៃព្រិច សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ បានប្រទះឃើញជនជាតិថៃបាញ់បោះសេរីដោយកាំភ្លើង ។ ភ្លាមៗនោះ កម្លាំងបានឃាត់ខ្លួនជនសង្ស័យទាំង២នាក់ រួមទាំងអាវុធខ្លីដែលជាវត្ថុតាង និងនាំទៅកាន់មូលដ្ឋានកងរាជអាវុធហត្ថក្រុងប៉ោយប៉ែត ដើម្បីធ្វើការសួរនាំ ។
មន្ត្រីកងរាជអាវុធហត្ថបានឱ្យដឹងថា ជនសង្ស័យម្នាក់ឈ្មោះ ផាចារាក់ ខៅផូ (PATCHARA KHAOPHO) ភេទប្រុស អាយុ២៧ឆ្នាំ ជាជនជាតិថៃ ជាម្ចាស់អាវុធ និងម្នាក់ទៀតឈ្មោះ ឡាំភុម រ៉ាត់តាណាក់កែវមន្នី (RAMPUM RATTANAKAEWMANEE) ភេទប្រុស អាយុ២២ឆ្នាំ ថៃដូចគ្នា ។ ពួកគេទាំង២ស្នាក់នៅម្ដុំវត្តជាយដែន ស្ថិតក្នុងភូមិព្រៃព្រិច សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។
ពេលឃាត់ខ្លួនកងរាជអាវុធហត្ថបានរកឃើញ និងដកហូតវត្ថុតាងជាអាវុធខ្លីម៉ាក សិចសាយអឺ (SIG SAUER) ពណ៌ខ្មៅ លេខតួ 66A986594 ចំនួន១ដើម បង់១ គ្រាប់ចំនួន១០គ្រាប់ និងសម្បកគ្រាប់បាញ់រួចចំនួន៤គ្រាប់ ។ ទោះជាបែបណា ការបាញ់បោះរបស់ពួកគេទាំងកណ្តាលយប់នេះមិនដឹងថា ដោយមូលហេតុបែបណានោះទេ តែទិដ្ឋភាពដែលកើតឡើងនេះ ពិតជាគួរឱ្យថ្កោលទោសពេកណាស់ ។ សាធារណមតិបានគិតថា ការប្រើប្រាស់អាវុធក្នុងប្រទេសកម្ពុជាពីសំណាក់ជនបរទេសបែបនេះ តែងបង្ខំឱ្យមានបញ្ហាជារឿយៗ ។
តាមរយៈនៃការបង្ក្រាបករណីបាញ់បោះកណ្តាលយប់នេះ បើសិនជាជនជាតិខ្មែរបាញ់លើដីថៃវិញប្រហែលជាជាន់.កដកស្លាបដាក់ច្រវាក់ដៃជើងមិនខានឡើយ ខុសពីសមត្ថកិច្ចខ្មែរតែងគោរពសិទ្ធិជនបរទេសក្រៅពីចាប់វាយខ្នោះតែងប្រកាន់សីលធម៌ជានិច្ច ៕
ចែករំលែកព័តមាននេះ