ចាប់តាំងពីឆ្នាំ២០០៦មកក្នុងមួយឆ្នាំៗនៅមន្ទីរពេទ្យមិត្តភាពខ្មែរ-សូវៀតបានរកឃើញអ្នកកើតជំងឺមហារីកមាត់ធ្មេញមានចំនួន៣៣៨នាក់ លុះមកដល់ឆ្នាំ២០១៥នេះ អ្នកដែលកើតមានជំងឺមហារីកក៏មានចំនួន
ចាប់តាំងពីឆ្នាំ២០០៦មកក្នុងមួយឆ្នាំៗនៅមន្ទីរពេទ្យមិត្តភាពខ្មែរ-សូវៀតបានរកឃើញអ្នកកើតជំងឺមហារីកមាត់ធ្មេញមានចំនួន៣៣៨នាក់ លុះមកដល់ឆ្នាំ២០១៥នេះ អ្នកដែលកើតមានជំងឺមហារីកក៏មានចំនួនប្រហាក់ប្រហែលគ្នានឹងឆ្នាំមុនដដែល គឺមិនកើនឡើងនោះទេ ។ នេះបើតាមការឲ្យដឹងរបស់លោកសាស្ត្រាចារ្យទន្តបណ្ឌិត គាម ប៊ន ឯកទេសផ្នែកទន្តសាស្ត្រនៃមន្ទីរពេទ្យមិត្តភាពខ្មែរ-សូវៀត ។
លោកវេជ្ជបណ្ឌិតបានប្រាប់កោះសន្តិភាពឲ្យដឹងថា វ័យដែលតែងកើតមានជំងឺមហារីកមាត់ធ្មេញនេះច្រើនជាងគេគឺចាប់ពីវ័យ៥០ទៅ៧០ឆ្នាំ ហើយរោគសញ្ញានៃជំងឺមហារីកមាត់ធ្មេញនេះមានដូចជា៖
-ចេញដំបៅមានលក្ខណៈខុសពីដំបៅធម្មតា
-នៅពេលដែលលោកអ្នកស្ទាបនោះមានសភាពរឹងនៅជុំវិញដំបៅ
-រីឯនៅចំកណ្តាលដំបៅមានសភាពរលួយ
-ចំពោះកោសិកាដែលនៅផ្នែកជុំវិញដំបៅមានលក្ខណៈរឹងហើយក្រហម ។
-មានឡើងកូនកណ្តុរនៅនឹងថ្គាមទាំងសងខាង
-ដំបៅមហារីកខុសពីដំបៅធម្មតា ព្រោះដំបៅនេះមិនងាយព្យាបាលឲ្យជាសះស្បើយដូចដំបៅធម្មតាបានឡើយ ។
-ស្ថានភាពដំបៅមានរីកធំពីមួយថ្ងៃទៅមួយថ្ងៃ ។
គេឃើញមនុស្សចាស់នៅពេលដែលគាត់ឈឺធ្មេញ ហើយបានទៅដកធ្មេញជាមួយគ្រូពេទ្យដែលគ្មានជំនាញច្បាស់លាស់ជួនកាលអាចក្លាយទៅជាជំងឺមហារីកមាត់ធ្មេញបាន ឬនៅពេលដែលមានអាការហើមឈឺបន្ទាប់ពីដក រួចបែរជាប្រើប្រាស់ឱសថបុរាណដើម្បីបំបាត់ការឈឺចាប់នោះទៅវិញដែលជាកត្តានាំឲ្យប្រឈមនឹងគ្រោះថ្នាក់ខ្ពស់បំផុត។ ដូច្នេះបើឃើញថា មានអាការហើមនៅពេលដែលដកធ្មេញរួច ត្រូវប្រញាប់មកជួបជាមួយគ្រូពេទ្យឯកទេសជាបន្ទាន់ដើម្បីការពារកុំឲ្យកើតមានជំងឺមហារីកទាន់ ។
ជំងឺមហារីកនេះចាប់ពីកើតរហូតវិវឌ្ឍទៅជាធ្ងន់ធ្ងរគឺមានរយៈពេលពី៣ទៅ៤ខែយឺតបំផុតគឺរយៈ៦ខែ ដូច្នេះបើរកឃើញជំងឺមហារីកនេះមុនបីខែអ្នកជំងឺអាចមានសង្ឃឹមរស់ច្រើន៕
ចែករំលែកព័តមាននេះ