ស្ករត្នោតហុយ ជាប្រភេទស្ករម្យ៉ាង ដែលគេបានធ្វើវាចេញពីទឹកត្នោត ដូចជា ស្ករត្នោតធម្មតា ។ ប៉ុន្តែគ្រាន់តែប្រភេទស្ករត្នោតហុយ ការសម្ងួតវាយូររហូតដល់ស្ងួត ហើយស្ករហុយនេះ គេអាចចាប់កាន់ ឬរោយវាបាន និងអាចយកវាទៅដាក់ក្នុងភេសជ្ជៈផ្សេងៗបានដូចជា ស្ករសដែរ ។ ដើម្បីឱ្យដឹងកាន់តែច្បាស់ពីរបៀបធ្វើស្ករហុយ ខ្ញុំសូមលើកយកនូវបទពិសោធន៍របស់លោកអ៊ំ ចាន់ភឺន អាយុ៦៥ឆ្នាំ ជាកសិកររស់នៅភូមិត្រពាំងស្បូង ឃុំស្រែថ្មី ស្រុករលាប្អៀរ ខេត្តកំពង់ឆ្នាំង គាត់មានបទពិសោធន៍ល្អក្នុងការធ្វើស្ករត្នោតហុយ ដែលបង្ហាញជូនដូចខាងក្រោម៖ ១-សំភារសំរាប់ធ្វើស្ករហុយ -ខ្នាសសំរាប់កៀរស្ករប៉ាតខ្ទះ ខ្ទះត្នោតសំរាប់កូរស្ករ -រហាត់សំរាប់វិតស្ករ ថាសហាលស្ករ -ថង់សំរាប់ច្រកស្ករក្រោយពេលធ្វើរួច -កញ្ច្រែងរែងស្ករ -វែកសំរាប់ដួសស្ករដាក់ចូលក្នុងថង់ (ប្រើវែកអាលុយមីញ៉ូម ល្អជាងប្រើវែកដែក) ២-របៀបធ្វើ ៖ របៀបធ្វើស្ករត្នោតហុយមានបីដំណាក់កាល ដំណាក់កាលទី១ ចាក់ទឹកត្នោតពីបំពង់ ចូលទៅក្នុងខ្ទះត្នោត ដោយច្រោះវា យកកំទេចកំទីចេញជាមួយនឹងស្បៃ ដើម្បីការពារកុំឱ្យមានសំរាមនៅក្នុងស្ករ ។ ដាក់ទឹកត្នោតរំងាស់នៅលើភ្លើងរហូតឡើងជើងអង្ក្រង និងដាំត្រូវឧស្សាហ៍កៀរយកពពុះជាប់ខ្ទះកៀនៗចេញ ។ ពេលរំងាស់ត្រូវដុតភ្លើងឱ្យឆេះជាប់កុំឱ្យរលត់ ព្រោះបើភ្លើងឆេះមិនស្មើនាំឱ្យស្ករទៅជាក្រហម ឬខ្លោច ។ ដំណាក់កាលទី២ ក្រោយពេលស្ករឡើងជើងអង្ក្រង ហើយត្រូវដាក់ចុះពីលើភ្លើង វិតស្ករចុះឡើងរហូតវិតលែងចង់កើត ។ បន្ទាប់មកយកខ្នៀសប៉ាតស្ករឱ្យពេញខ្ទះ រួចដាក់ហាលថ្ងៃឱ្យស្ងួត ។ នៅពេលស្ករស្ងួត យកខ្នៀសទៅឈូសទំលាក់ចុះក្រោម ជ្រុំវាឱ្យម៉ដ្ឋ រួចយកកញ្ច្រែង រែងអង្ករទៅរែងយកតែស្ករម៉ដ្ឋ បន្ទាប់មកចាក់ចូលទៅក្នុងខ្ទះត្នោតជ្រុំបន្តទៀត ធ្វើដូចនេះដដែលៗ រហូតដល់អស់ ស្ករ ។ ដំណាក់កាលទី៣ ស្ករដែលបានរែង រួចយកវាទៅហាលថ្ងៃឱ្យស្ងួត រួចច្រកដាក់ក្នុងកែវ ឬថង់ចងឱ្យជិតមិនឱ្យមានខ្យល់ចេញចូលទេ ។ ការច្រកដាក់ចូលទៅក្នុងថង់ ធ្វើឱ្យបានលឿនដើម្បីរក្សាគុណភាពស្ករ ព្រោះបើស្ករប៉ះជាមួយនឹងអាកាសធាតុខាងក្រៅយូរ នឹងងាយជោរទឹកជ្រាយជាប់គ្នា ។ នៅពេលដួសស្ករដាក់ទៅក្នុងកែវ ឬថង់ ហាមយកដៃ ឬរបស់ដែលមិនស្ងួតទៅប៉ះនឹងស្ករ ព្រោះវាអាចនាំឱ្យស្ករចេញទឹករលាយចូលគ្នា។ ៣-ការរក្សាទុក -ត្រូវពិនិត្យមើលស្ករ នឹងជឿជាក់ថាស្ករហុយ ពិតជាស្ងួតល្អ ហើយទុកស្ករឱ្យត្រជាក់មុនពេលដាក់ច្រកក្នុងថង់ -ត្រូវដាក់ស្ករនៅកន្លែងដែលមានលក្ខណៈអាកាសធាតុសមស្រប (ស្ងួត) ទើបយើងអាចរក្សាភាពស្ងួតរបស់ស្ករបានយូរ ។ ៤-ការប្រើប្រាស់ ស្ករហុយនេះមានលក្ខណៈពិសេសជាងស្ករធម្មតា ដោយគេអាចប្រើប្រាស់វាដាក់ជាមួយកាហ្វេទឹកដោះគោ បានដូចស្ករសដែរ និងក្រៅពីនេះគេអាចប្រើបានជាមួយមុខម្ហូបបានគ្រប់មុខ និងបង្អែមទៀតផង ៕ (ដកស្រង់ចេញពីទស្សនាវដី្តកសិករ)
ចែករំលែកព័តមាននេះ