រាជធានីភ្នំពេញ ៖ បុរសម្នាក់ដែលយកកន្ត្រៃចាក់បំពង់កខ្លួនឯងដើម្បីបញ្ចប់ជីវិតនោះ បានបង្កការភ្ញាក់ផ្អើលនៅរសៀលថ្ងៃទី៤ កក្កដា ២០១៥ នៅមុខស្ថាននីយប្រេងកាល់តិច មហាវិថីព្រះមុនីវង្ស កែងផ្លូវលេខ៨៦
រាជធានីភ្នំពេញ ៖ បុរសម្នាក់ដែលយកកន្ត្រៃចាក់បំពង់កខ្លួនឯងដើម្បីបញ្ចប់ជីវិតនោះ បានបង្កការភ្ញាក់ផ្អើលនៅរសៀលថ្ងៃទី៤ កក្កដា ២០១៥ នៅមុខស្ថាននីយប្រេងកាល់តិច មហាវិថីព្រះមុនីវង្ស កែងផ្លូវលេខ៨៦ ស្ថិតក្នុងសង្កាត់ស្រះចក ខណ្ឌដូនពេញ ប៉ុន្តែមិនបណ្តាលឲ្យបាត់បង់ជីវិតនោះទេ ក្រោយពីបញ្ជូនទៅមន្ទីរពេទ្យកាល់ម៉ែត ហើយគ្រូពេទ្យព្យាយាមជួយសង្គ្រោះ ។
មន្ត្រីនគរបាលមូលដ្ឋាន បានឲ្យដឹងថា បុរសដែលយកកន្ត្រៃចាក់បំពង់កខ្លួនឯងនេះ ឈ្មោះ អ៊ឹង តារា អាយុ២៥ឆ្នាំ ជាអ្នកបើករថយន្តដឹកភ្ញៀវ នៅសណ្ឋាគារភ្នំពេញ មានទីលំនៅម្តុំផ្សារថ្មី ខណ្ឌដូនពេញ បានជិះរថយន្តម៉ាកឡិចស៊ិស៤៧០ ពណ៌ស្ករ ពាក់ស្លាកលេខ២D-៥៥០៧ ដឹកប្រពន្ធឈ្មោះ យ័ន្ត ស្រីមុំ អាយុ២០ឆ្នាំ ចូលមកចាក់សាំងនៅស្ថានីយកាល់តិច ។
បុរសនេះ មានទំនាស់ពាក្យសម្តីជាប្រពន្ធក្នុងរថយន្ត ហើយរត់ចេញមកខាងក្រៅព្រមទាំងកាន់កន្ត្រៃនៅជាប់នឹងដៃផង រួចក៏ចាក់បំពង់កខ្លួនឯង បណ្តាលឲ្យហូរឈាមស្រោចពេញខ្លួន និងបង្កឲ្យមានការភ្ញាក់ផ្អើលដល់អ្នកធ្វើដំណើរឆ្លងកាត់ទីនោះ ។ ប្រភពបានបន្តទៀតថា បន្ទាប់មកទៀត ក៏រត់ឆ្លងថ្នល់សំដៅទៅសណ្ឋាគារភ្នំពេញ ហើយយកកន្ត្រៃចាក់ខ្លួនឯងបន្ថែមទៀត ប៉ុន្តែ ត្រូវក្រុមសន្តិសុខប្រចាំការនៅទីនោះជួយអន្តរាគមន៍ចាប់បុរសរូបនេះព្រមទាំងយកក្រមារុំមុខរបួស និងនាំគ្នាសែងដាក់លើរ៉ុម៉កម៉ូតូបញ្ជូនទៅមន្តីរពេទ្យកាល់ម៉ែតតែម្តង ។
ទាក់ទិននឹងការធ្វើអត្តឃាតខាងលើ សមត្ថកិច្ចជំនាញមួយរូបបាននិយាយថា បុរសដែលយកកន្ត្រៃចាក់បំពង់កខ្លួនឯងនេះ គឺសង្ស័យបែកថ្នាំច្រើនជាង ព្រោះពេញមួយយប់ហើយដែលបុរសរូបនេះបានចូលក្លិបកម្សាន្តរហូតទាល់តែប្រពន្ធជិះម៉ូតូស្វែងរក ហើយនាំគ្នាជិះរថយន្តមកចាក់សាំងគ្មានលុយឲ្យគេក៏យកទូរស័ព្ទដាក់បញ្ចាំទៀត ។ ម្យ៉ាងវិញទៀត មុនចាក់បំពង់កខ្លួនឯងនេះ រូបគេបានស្រែករវើរវាយថា មានគេតាមចាប់ និងតាមសម្លាប់ ហើយនៅក្នុងមន្ទីរពេទ្យក៏ស្រែកពាក្យដដែលនេះដែរ ។
ចំណែកលោកវរសេនីយ៍ទោ ហួត ចាន់យ៉ារ៉ាន់ អធិការនគរបាលខណ្ឌដូនពេញ បានប្រាប់អ្នកកាសែតថា មូលហេតុដែលនាំឱ្យជនរងគ្រោះចាក់ខ្លួនឯងយ៉ាងដូច្នេះ គឺដោយសារ មានជម្លោះជាមួយប្រពន្ធ ប៉ុន្តែមិនដឹងថា មានរឿងអីនោះទេ ៕
ចែករំលែកព័តមាននេះ