រាជធានីភ្នំពេញ ៖ ការទទួលស្គាល់លោក ហែម គីរី អគ្គលេខាធិការនៃសហព័ន្ធខ្មែរកីឡាហែលទឹកកម្ពុជា និងលោក ហែម ប៊ុនទីង អតីតកីឡាករអត្តពលកម្មឆ្នើមរបស់កម្ពុជា ជាអត្តពលិកអូឡាំពិកពិភពលោកដោយសមាគមអត្តពលិកអូឡាំពិកពិភពលោក(World Olympian Association) បានបង្ហាញកាន់តែច្បាស់ពីការវិវត្តនៃវិស័យកីឡាកម្ពុជា ។ មានន័យថា ការរីកចម្រើនក្នុងវិស័យកីឡាកម្ពុជានាពេលនេះ មិនត្រឹមតែនៅក្នុងស្រុកទទួលស្គាល់ទេ សូម្បីតែសហគមន៍អន្តរជាតិ ក៏ទទួលស្គាល់ថាមានការឈានឡើងដែរ ។
ការប្រកាសទទួលស្គាល់អ្នកមានស្នាដៃទាំងពីរ នៅក្នុងពេលនេះ ក៏បង្ហាញពីសញ្ញាណជោគជ័យថា កីឡាករ-កីឡាការិនីដែលមានស្នាដៃជាច្រើនផ្សេងទៀត ក៏នឹងត្រូវបានសមាគមអន្តរជាតិមួយនេះ ទទួលឱ្យស្ថិតក្នុងបញ្ជីដូចគ្នាផងដែរ។
យោងតាមការប្រកាស មូលហេតុដែលសមាគមនេះ ទទួលស្គាល់អ្នកទាំងពីរជាកីឡាករអូឡាំពិក ដោយសារពួកលោកបានរួមចំណែកជួយក្នុងចលនាអូឡាំពិក ដោយបានចូលរួមការប្រកួតផ្ទាល់ក្នុងព្រឹត្តិការណ៍កីឡាអូឡាំពិក និងដឹកនាំកីឡាករទៅចូលរួមការប្រកួតនេះ នាពេលកន្លងមក ។ លោក ហែម គីរី បច្ចុប្បន្នជាអគ្គលេខាធិការនៃសហព័ន្ធខ្មែរកីឡាហែលទឹក និងលោក ហែម ប៊ុនទីង ម្ចាស់មេដាយប្រាក់កីឡាស៊ីហ្គេមឆ្នាំ២០០៧ នៅប្រទេសថៃ លើវិញ្ញាសារត់ម៉ារ៉ាតុន។ លោក ហែម គីរី ពេលនៅជាកីឡាករហែលទឹក ធ្លាប់ចូលរួមការប្រកួតកីឡាអូឡាំពិករដូវក្តៅនៅប្រទេសអូស្ត្រាលីក្នុងឆ្នាំ២០០០ និងការប្រកួតកីឡាអូឡាំពិករដូវក្តៅនៅទីក្រុងអាថែន ប្រទេសក្រិក កាលពីឆ្នាំ២០០៤។
អតីតកីឡាករឆ្នើមវ័យ៤០ឆ្នាំរូបនេះ ក្រោយបញ្ចប់អាជីពជាកីឡាករ បានវិវត្តខ្លួនទៅជាគ្រូបង្វឹក និងជាមន្ត្រីអាជ្ញាកណ្តាលចៅក្រមកម្រិតអន្តរជាតិ។ បន្ទាប់មក លោក ក៏ត្រូវបានតែងតាំងឲ្យធ្វើអគ្គលេខាធិការសហព័ន្ធខ្មែរកីឡាហែលទឹករហូតមកដល់បច្ចុប្បន្ន។
ចំណែកលោក ហែម ប៊ុនទីង អតីតកីឡាករអត្តពលកម្មឆ្នើមរបស់កម្ពុជា ធ្លាប់ចូលរួមប្រកួតក្នុងព្រឹត្តិការណ៍អូឡាំពិកម្តងកាលពីឆ្នាំ២០០៨ នៅទីក្រុងប៉ីជីង ប្រទេសចិន លើវិញ្ញាសារត់ម៉ារ៉ាតុង ។ ដោយកាលនោះ លោកពុំទទួលបានលទ្ធផលល្អនោះទេ ដោយបញ្ចប់ក្នុងចំណាត់ថ្នាក់លេខ៧៣ ក្រោយប្រើពេល២ម៉ោង៣៣នាទីនិង៣២វិនាទី។
ក្រៅពីព្រឹត្តិការណ៍អូឡាំពិក លោក ធ្លាប់ចូលរួមប្រកួតពិភពលោកចំនួន៣លើក កីឡាអាស៊ី Asian Games ចំនួន៣លើក និងការប្រកួតកម្រិតអាស៊ី និងអាស៊ានជាច្រើនទៀត។ បុរសវ័យ៣៥ឆ្នាំរូបនេះ ធ្លាប់ចូលរួមការប្រកួតកីឡាស៊ីហ្គេមកាលពីឆ្នាំ២០០៧ នៅប្រទេសថៃ ដោយដណ្តើមបានមេដាយប្រាក់លើវិញ្ញាសាម៉ារ៉ាតុង និងមេដាយសំរឹទ្ធលើវិញ្ញាសារត់ចម្ងាយ៥គីឡូម៉ែត្រ។ បន្ថែមលើនេះ លោក ដណ្តើមបានមេដាយសំរឹទ្ធមួយបន្ថែមទៀតលើវិញ្ញាសាម៉ារ៉ាតុងក្នុងព្រឹត្តិការណ៍កីឡាស៊ីហ្គេមនៅប្រទេសឡាវ កាលពីឆ្នាំ២០០៩ ក្រោយចំណាយពេល២ម៉ោង ២៥នាទី និង១៩វិនាទី។
ក្រោយការប្រកាសទទួលស្គាល់នេះ មិនត្រឹមតែធ្វើឱ្យស្នាដៃទាំងឡាយរបស់អ្នកទាំងពីរនៅក្នុងវិស័យកីឡាត្រូវបានទទួលស្គាល់ប៉ុណ្ណោះទេ តែក៏ជាមោទនភាពធំមួយរបស់កម្ពុជា ដែលមានសមាសភាព២រូបត្រូវបានទទួលស្គាល់ថា ជាអតីតអ្នកមានស្នាដៃឆ្នើមឱ្យពិភពលោកបានស្គាល់ផងដែរ ។
មានការលើកឡើងថា ជំហានទទួលស្គាល់លើលោក ហែម គីរី និងហែម ប៊ុនទីង នឹងក្លាយជាភ្លើងបំភ្លឺផ្លូវឱ្យកីឡាករកីឡាការិនីកម្ពុជា ដែលមានស្នាដៃរាប់មិនអស់ផ្សេងទៀត ត្រូវបានទទួលស្គាល់បែបនេះដូចគ្នាក្នុងពេលខាងមុខ ។ បើសមាសភាពកីឡាករខ្មែរត្រូវបានចុះបញ្ជីទទួលស្គាល់កាន់តែច្រើន នោះក៏ជាមុខមាត់នៃវិស័យកីឡារបស់ជាតិផងដែរ ៕
ចែករំលែកព័តមាននេះ