ខេត្តកណ្ដាល ៖ ទោះបីមានវិធានការសុខាភិបាលថ្មី និងការធ្វើចត្តាឡីស័កចំពោះអ្នកដំណើរទាំងអស់ចូលមកប្រទេសកម្ពុជា ចាប់អនុវត្តពីថ្ងៃទី១២ ធ្នូ ២០២០តទៅក្តី នៅតែមានបងប្អូនមួយចំនួន មិនគិតអំពីសុខភាព មិនគិតអាយុជីវិតខ្លួន…
ខេត្តកណ្ដាល ៖ ទោះបីមានវិធានការសុខាភិបាលថ្មី និងការធ្វើចត្តាឡីស័កចំពោះអ្នកដំណើរទាំងអស់ចូលមកប្រទេសកម្ពុជា ចាប់អនុវត្តពីថ្ងៃទី១២ ធ្នូ ២០២០តទៅក្តី នៅតែមានបងប្អូនមួយចំនួន មិនគិតអំពីសុខភាព មិនគិតអាយុជីវិតខ្លួន និងអ្នកដទៃនោះទេ ជាក់ស្ដែង យុវជនម្នាក់ទៀតហើយ ទើបត្រឡប់ពីថៃ ត្រូវបានអាជ្ញាធរក្រុងប៉ោយប៉ែត ដាក់ឲ្យធ្វើចត្តាឡីស័ក១៤ថ្ងៃ ប៉ុន្តែបានរយៈត្រឹម២ថ្ងៃ ស្រាប់តែលបលួចរត់មកស្រុកកំណើត នៅខេត្តកណ្តាល ។
យុវជនដែលលួចរត់ពីកន្លែងធ្វើចត្តាឡីស័ក មានឈ្មោះ គង់ ម៉េងហ៊ង អាយុ២៦ឆ្នាំ ទើបត្រឡប់មកពីប្រទេសថៃក្នុងថ្ងៃទី២២ ធ្នូ ហើយបានលួចរត់មកផ្ទះ ក្នុងស្រុកកំណើតនៅខេត្តកណ្តាល កាលពីយប់ថ្ងៃទី២៤ ខែធ្នូ ឆ្នាំ២០២០ ។
មន្ត្រីជំនាញ និងអាជ្ញាធរ កំណត់អត្តសញ្ញាណបាន ក៏តាមស្វែងរកឃើញ នៅផ្ទះរបស់យុវជនរូបនេះតែម្តង ស្ថិតនៅភូមិសាមគ្គី ឃុំព្រែកដំបង ស្រុកមុខកំពូល ខេត្តកណ្តាល ។
បច្ចុប្បន្ន មន្ត្រីជំនាញរបស់ក្រសួងសុខាភិបាល បានយកសំណាកយុវជនរូបនេះ ទៅធ្វើតេស្តរកវីរុសឆ្លង(កូវីដ-១៩) និងសម្រេចដាក់អោយធ្វើចត្តាឡីស័ក រយៈ១៤ថ្ងៃទៀត នៅផ្ទះខ្លួនឯង តែម្តង ។
ដើម្បីជៀសវាង ការលួចរត់គេចពីទីតាំងចត្តាឡីស័ក រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានស្នើទៅគ្រប់អភិបាលរាជធានី-ខេត្ត ទូទាំងប្រទេសត្រូវពង្រឹងការគ្រប់គ្រងកន្លែងធ្វើចត្តាឡីស័ក ឲ្យបានតឹងរ៉ឹងជាទីបំផុត ហើយលោកព្រមានថា បើបុគ្គលណាមួយល្មើសនឹងវិធានការនេះ ត្រូវទទួលទោសតាមច្បាប់កំណត់ ។
ដូចគ្នានេះដែរ ករណីរត់គេចពីកន្លែងធ្វើចត្តាឡីស័កនេះ ក៏មានពលករខ្មែរម្នាក់ ឈ្មោះ លឿង លីសាន់ អាយុ២២ឆ្នាំ ដែលបានវិលត្រឡប់មកពីប្រទេសថៃ តាមច្រកអន្តរជាតិប៉ោយប៉ែត បានលោតពីលើរថយន្ត រត់គេចខ្លួនមិនព្រមធ្វើចត្តាឡីស័ក កាលពីល្ងាចថ្ងៃទី២៣ ខែធ្នូ ។ រហូតមកដល់ពេលនេះ សមត្ថកិច្ចកំពុងស្រាវជ្រាវរកបុរសម្នាក់នេះ មកធ្វើចត្តាឡីស័កវិញ ៕
ចែករំលែកព័តមាននេះ