ខេត្តត្បូងឃ្មុំ ៖ អនុវត្តតាមការណែនាំរបស់លោកឧត្តមសេនីយ៍ទោស្នងការនគរបាលខេត្តនិងប្រធានគណៈបញ្ជាការឯកភាពខេត្ត កម្លាំងសមត្ថកិច្ចជាច្រើននាក់បានឆ្មក់បង្ក្រាបទីតាំងសង្វៀនបញ្ជល់មាន់បង្កប់វង់អាប៉ោងដោយខុសច្បាប់មួយកន្លែង កាលពីវេលាម៉ោង២និង៣០នាទីរសៀលថ្ងៃទី២១ ធ្នូ ឆ្នាំ២០២០ នៅចំណុចចំការកៅស៊ូ ក្នុងភូមិគោកស្រុក ឃុំគោកស្រុក ស្រុកតំបែរ ខេត្តត្បួងឃ្មុំ ដោយក្រុមអ្នកលេងល្បែងរាប់សិបនាក់បាននាំគ្នារត់គេចទាំងបាតជើងសព្រាតចូលព្រៃបាត់អស់ ហើយសមត្ថកិច្ចដកហូតបានម៉ូតូ២០គ្រឿង និងកំពុងស្រាវជ្រាវតាមរកម្ចាស់សង្វៀនផងដែរ។
នគរបាលមូលដ្ឋានបានប្រាប់ឲ្យដឹងថា មុនពេលចុះបង្ក្រាបទីតាំងសង្វៀនបញ្ជល់មាន់ខាងលើ គឺមានប្រជាពលរដ្ឋបានរាយការណ៍ប្រាប់សមត្ថកិច្ចថា ទីតាំងក្នុងចម្ការកៅស៊ូមួយកន្លែងឃុំគោកស្រុកខាងលើ លួចបើកលេងល្បែងបញ្ជល់មាន់ជាច្រើនថ្ងៃមកហើយ ព្រមទាំងមានមនុស្សពពាក់ពពូនទៅលេងជាច្រើននិងហ៊ោកញ្ច្រៀវសប្បាយដោយឥតខ្លាចកោតក្រែងសមត្ថកិច្ច។
នគរបាលមូលដ្ឋានប្រាប់បន្តថា ក្រោយពីទទួលបានដំណឹងនេះភ្លាម កម្លាំងជំនាញបានសុំគោលការណ៍ពីលោកឧត្តមសេនីយ៍ស្នងការនគរបាលខេត្តដោយបានចុះសហការជាមួយនឹងកំលាំងអធិការរដ្ឋាននគរបាលស្រុកតំបែរ ប្រញាប់ប្រញាល់ចុះទៅបង្ក្រាបទីតាំងបញ្ជល់មាន់ ដោយក្រុមអ្នកញៀនល្បែងបានដាក់កម្លាំងពង្រាយនៅតាមដងផ្លូវគ្រាន់តែឃើញនគរបាលចុះទៅពីចម្ងាយភ្លាម ក៏បាននាំគ្នារត់គេចខ្លួនបាត់ស្រមោលចូលទៅក្នុងព្រៃអស់ ដោយបន្សល់ទុកនូវវត្ថុតាងដូចជា ម៉ូតូចំនួន២២គ្រឿង មាន់ចំនួន១០ក្បាល (ងាប់៥) តុ និងហាន់តោចំនួន១ ចានអាប៉ោងចំនួន១ឈុត កន្ត្រក់ដាក់មាន់ចំនួន១០ និងជញ្ជីងថ្លឹងមាន់ចំនួន១។ ដោយឡែកក្រុមអ្នកលេងល្បែងរាប់សិបនាក់បាននាំគ្នារត់គេចបាតជើងសព្រាត មុនពេលកម្លាំងចុះទៅដល់។
នគរបាលមូលដ្ឋានបានបញ្ជាក់ថា កន្លងមកសមត្ថកិច្ចបានចុះទៅពិនិត្យមើលត្រង់ទីតាំងនៅម្ដុំក្បែរនោះ តែមិនឃើញមានសង្វៀនបញ្ជល់មាន់នោះទេ គឺក្រុមអ្នកមានល្បែងតែងតែចល័តលេងពីកន្លែងមួយទៅកន្លែងមួយដោយបង្វែរដានពីកម្លាំងសមត្ថកិច្ច ក្នុងពេលដែលបង្ក្រាបបាន សូម្បីតែរថយន្តចូលទៅក៏មិនកើតទៀតព្រោះជាប្រភេទផ្លូវរទេះ ។
សូមបញ្ជាក់ថា នាពេលកន្លងមកលោកវេង សាខុន រដ្ឋមន្ត្រីក្រសួងកសិកម្ម និងជាប្រធានក្រុមការងារចុះពង្រឹងមូលដ្ឋានក្នុងស្រុកតំបែរ ធ្លាប់មានប្រសាសន៍ដោយក្រើនរំលឹកដល់កម្លាំងសមត្ថកិច្ចស្នើឲ្យមានការយកចិត្តទុកដាក់បង្ក្រាបល្បែងបញ្ជល់មាន់ ធ្វើយ៉ាងណាកុំឱ្យមាននៅក្នុងស្រុកតំបែរ ព្រោះអ្នកដែលទៅលេងចាញ់លុយអស់ លុះពេលត្រឡប់មកផ្ទះវិញបង្កជម្លោះជាមួយនឹងប្រពន្ធ កើតមានអំពើហិង្សាក្នុងគ្រួសារ ព្រមទាំងអាចកើតមានបទល្មើសផ្សេងៗថែមទៀតផង៕
(កែសម្រួលដោយ ៖ ធីតា)
ចែករំលែកព័តមាននេះ