ខេត្តកណ្តាល ៖ ជនសង្ស័យម្នាក់ ដោយសារស្រវឹងស្រា ខឹងក្មេងជេរថា អាឆ្កួតក៏ឈប់កង់ចុះ ទៅទាត់ក្មេងមួយជើង មួយជើង បណ្តាលអោយបាក់ជើងស្តាំរងរបួសធ្ងន់ត្រូវនគរបាលឃាត់ខ្លួន ដែលហេតុការណ៍នេះបានកើតឡើង នៅថ្ងៃទី១៨ ខែធ្នូ ឆ្នាំ២០២០ វេលាម៉ោង១៤និង៣០នាទីចំណុច លើផ្លូវលំភូមិល្វាសរកណ្តាល ឃុំល្វាសរ ស្រុកល្វាឯម ខេត្តកណ្ដាល ។
ជនរងគ្រោះឈ្មោះ ផល រីតា ភេទប្រុស អាយុ៨ឆ្នាំ ជនជាតិខ្មែរ មុខរបរសិស្ស ទីលំនៅបច្ចុប្បន្នភូមិល្វាសរកណ្ដាល ឃុំល្វាសរ ស្រុកល្វាឯម ខេត្តកណ្ដាល ។ ជនសង្ស័យឈ្មោះ វ៉ាត ឆៃរ៉ាត់ហៅ ប៉ ភេទប្រុស អាយុ ២៥ឆ្នាំ ជនជាតិខ្មែរ មុខរបរកសិករ មានទីលំនៅបច្ចុប្បន្ន ភូមិល្វាសរក្រោម ឃុំល្វាសរ ស្រុកល្វាឯម ខេត្តកណ្ដាល ។
នគរបាលស្រុកល្វាឯមបានអោយដឹងថា នៅថ្ងៃទី១៨ ខែធ្នូ ឆ្នាំ២០២០ វេលាម៉ោង១៤និង៣០នាទីឈ្មោះ ផល រីតា ភេទប្រុស អាយុ៨ឆ្នាំ បានឈរលេងជាមួយក្មេងៗដូចគ្នា ១-ឈ្មោះស័ក ភេទប្រុស ២-ឈ្មោះហួ ភេទស្រី នៅលើផ្លូវលំក្រោយផ្ទះឈ្មោលី ជឺ ស្ថិតនៅភូមិល្វាសរកណ្តាល ពេលកំពុងឈរលេងស្រាប់តែឈ្មោះវ៉ាត ឆៃរ៉ាត់ហៅ ប៉ ភេទប្រុស អាយុ២៥ឆ្នាំ ស្រវឹងស្រាជិះកង់មកពីភូមិព្រែកប្រា ពេលមកដល់កន្លែងក្មេងរងគ្រោះកំពុងឈរលេង ឈ្មោះ វ៉ាត ឆៃរ៉ាត់ ហៅប៉ បានចុះពីលើកង់ទៅទាត់ក្មេងរងគ្រោះឈ្មោះ ផល រីតា មួយជើងចំភ្លៅខាងស្តាំ បណ្តាលអោយបាក់ ដោយសារខឹងក្មេងរងគ្រោះជេរថា អាឆ្កួត ។
ចំពោះក្មេងរងគ្រោះឈ្មោះ ផល រីតា ត្រូវបានម្ដាយបង្កើតនាំទៅកាន់មន្ទីរពេទ្យកុមារជាតិ បន្ទាប់មកបានទូរស័ព្ទប្រាប់មកសមត្ថកិច្ចយើងថា ឈ្មោះ ផល រីតា ត្រូវបានគ្រូពេទ្យពិនិត្យថា បាក់ឆ្អឹងភ្លៅ ។ បច្ចុប្បន្នជនសង្ស័យត្រូវបានបញ្ជូនមកអធិការរដ្ឋាននគរបាលស្រុកល្វាឯម ដើម្បីចាត់ការតាមនីតិវិធី ៕
ចែករំលែកព័តមាននេះ