នាយករដ្ឋមន្ត្រីរុស្ស៊ី លោក ឌីមីឌ្រី ម៉េដវេដេវ អះអាងកាលពីថ្ងៃទី២២ មិថុនា ថា ប្រទេសរុស្ស៊ីនឹងចាត់វិធានការដោយឆាប់រហ័សនានាដើម្បីឆ្លើយតបចំពោះការសម្រេចរបស់សហភាពអឺរ៉ុប
នាយករដ្ឋមន្ត្រីរុស្ស៊ី លោក ឌីមីឌ្រី ម៉េដវេដេវ អះអាងកាលពីថ្ងៃទី២២ មិថុនា ថា ប្រទេសរុស្ស៊ីនឹងចាត់វិធានការដោយឆាប់រហ័សនានាដើម្បីឆ្លើយតបចំពោះការសម្រេចរបស់សហភាពអឺរ៉ុប ដែលបន្លាយពេលការដាក់ទណ្ឌកម្មមកលើក្រុងមូស្គូ រហូតដល់ខែមករា ឆ្នាំ២០១៦ ។
ក្នុងកិច្ចប្រជុំមួយរបស់រដ្ឋាភិបាល លោក ម៉េដ វេដេវ បានស្នើដល់ឧបនាយករដ្ឋមន្ត្រី លោក ស័រហ្គេយ ព្រីដូកូវ រៀបចំសំណើពន្យារពេលក្រឹត្យប្រធានាធិបតី ស្តីពីបណ្តាវិធានការរឹតត្បឹតរបស់រុស្ស៊ីសម្រាប់ដំណាក់កាលនោះ។ លោកក៏ចេញបញ្ជាផងដែរឱ្យរៀបចំអនុក្រឹត្យមួយរបស់រដ្ឋាភិបាលកំណត់បញ្ជីបណ្តាផលិតផលដែលត្រូវបញ្ចូល សម្រាប់វិធានការតបតវិញរបស់រុស្ស៊ី ។
សហភាពអឺរ៉ុបបានសម្រេចពន្យារពេលដាក់ទណ្ឌកម្មខាងសេដ្ឋកិច្ចប្រឆាំងរុស្ស៊ី រហូតដល់ថ្ងៃទី៣១ ខែមករា ឆ្នាំ២០១៦ ដើម្បីឱ្យមានការអនុវត្តដោយពេញលេញនូវកិច្ចព្រមព្រៀងក្រុងមីនស្ក៍ ដែលចុះហត្ថលេខាកាលពីខែកុម្ភៈ ស្តីពីវិបត្តិអ៊ុយក្រែន ។ ការដាក់ទណ្ឌកម្មពីខែកក្កដា ឆ្នាំ២០១៤មក ត្រូវបានពង្រឹងថែមកាលពីខែកញ្ញា ឆ្នាំនោះដែរ ។ ទណ្ឌកម្មទាំងនេះសំដៅពិសេសលើការផ្លាស់ប្តូរមួយចំនួនជាមួយរុស្ស៊ី ក្នុងហិរញ្ញវត្ថុ ថាមពល និងការពារ ។
កាលពីខែសីហា ឆ្នាំ២០១៤ ក្រុងមូស្គូបានដាក់ការហ៊ុមព័ទ្ធរយៈពេល១ឆ្នាំលើការនាំចូលស្បៀងពីបណ្តាប្រទេសលោកខាងលិច ជាការឆ្លើយតបចំពោះបណ្តាទណ្ឌកម្មរបស់អឺរ៉ុប និងសហរដ្ឋអាមេរិក ៕
ចែករំលែកព័តមាននេះ