បន្ទាយមានជ័យ៖ ដើម្បីអនុវត្តន៍តាមការណែនាំរបស់ក្រសួងសុខាភិបាល និងបទបញ្ជារបស់​ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ ជាមេបញ្ជាការកងរាជអាវុធហត្ថលើផ្ទៃប្រទេស ​គឺកងរាជអាវុធហត្ថ ខេត្តបន្ទាយមានជ័យទាំងអស់ ត្រូវចូលរួមក្នុងការទប់ស្កាត់ ការរីករាលដាល នៃការចម្លងមេរោគកូវីដ-១៩ ដោយឲ្យមានទីកន្លែង សម្រាប់ធ្វើ​ចត្តាឡីស័ក ផ្ទៃក្នុង​កងរាជអាវុធហត្ថខេត្ត ចំនួន ៤បន្ទប់ ហើយជាប្រចាំត្រូវត្រួត​ពិនិត្យការចេញចូល ក្នុងអង្គភាពទាំងកងកម្លាំងអាវុធហត្ថ ទាំងភ្ញៀវមកទំនាក់ទំនង ត្រូវអនុវត្តន៍ការលាងដៃនឹងអាល់កុល ជេល ពិនិត្យកម្ដៅ ពាក់ម៉ាស់ និងការរក្សាគម្លាត​សុវត្ថិភាពផងដែរ។​ នេះបើតាមលោកឧត្តមសេនីយ៍ត្រី បោន ប៊ិន មេបញ្ជាការកងរាជ​អាវុធហត្ថ ខេត្តបន្ទាយមានជ័យ។

លោកមេបញ្ជាការ បានបញ្ជាក់​ថា ការទប់ស្កាត់ការឆ្លងវីរុសកូវីដ-១៩នេះ វាមាន​សារៈសំខាន់ណាស់ ព្រោះជំងឺនេះ វាអាចឆ្លងតាមរូបភាព និងស្ថានភាពផ្សេងៗ ក្នុងនោះ មានការតម្រូវឲ្យបាញ់កំដៅ ឃុំខ្លួន ( ធ្វើចត្តាឡីស័ក ) លាងសម្អាតដៃនឹង​ទឹកសាប៊ូ និងទឹកលាងដៃ HAND Gel ទឹកអាល់កុល ជាដើម ហើយជួបគ្នា ត្រូវលើក​ដៃសំពះគ្នា ឬលើកដៃជាសញ្ញា ចៀសវាងចាប់ដៃ ព្រោះបារម្ភចម្លងមេរោគនេះ។

លោកបានបន្តទៀតថា មេរោគកូវីដ​១៩នេះ ជាមេរោគដ៏កាចសាហាវ នៅតែបន្តវាយ​លុកយ៉ាងខ្លាំងនៅលើពិភពលោក ធ្វើឲ្យមនុស្សស្លាប់ជាច្រើន និងមានអ្នកជំងឺរាប់​លាននាក់។ រហូតមកដល់សព្វថ្ងៃនេះ នៅមិនទាន់មានថ្នាំអាចព្យាបាលមេរោគនេះ បាននៅឡើយទេ។ ដូច្នេះយើងទាំងអស់គ្នា ត្រូវមានការប្រុងប្រយ័ត្ន និងចូលរួមបង្ការ​ទប់ស្កាត់មេរោគ covid-19 នេះ ឲ្យបានគ្រប់គ្នា។

ក្នុងនោះដែរ លោកមេបញ្ជាការបន្ថែមថា ក៏មានមន្ត្រីជំនាញ ក្នុងទីបញ្ជាការកងរាជ​អាវុធបត្ថខេត្ត បានបង្រៀនដល់មន្ត្រីកងរាជអាវុធហត្ថ ឲ្យចេះប្រើប្រាស់ អាល់កុល ឬជេល​លាងដៃ និងឲ្យចេះប្រើម៉ាស ឲ្យបានគ្រប់ៗគ្នា។

លោកឧត្តមសេនីយ៍ត្រី បោន ប៊ិន បានបញ្ជាក់បន្ថែម​ថា ឯកឧត្តម នាយឧត្តមសេនីយ៍ សៅ សុខា បានដាក់ចេញនូវបទបញ្ជាយ៉ាងម៉ឺងម៉ាត់ ដើម្បីឲ្យអនុវត្តន៍តាមការណែនាំ​របស់សម្តេចអគ្គសេនាបតីតេជោហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា និងក្រសួងសុខាភិបាល ដោយជំរុញដល់កម្លាំងប្រដាប់អាវុធទាំងអស់ ត្រូវរួមគ្នា ចុះផ្សព្វផ្សាយពីវិធីបង្ការ និងទប់ស្កាត់ជំងឺ COVID-19នេះ ទាំងអស់គ្នា​។ ក្នុងនោះ មេបញ្ជាការមូលដ្ឋានកងរាជអាវុធហត្ថស្រុក ក្រុង និងមេបញ្ជាការស្នាក់ការអាវុធហត្ថ ឃុំ​សង្កាត់ ត្រូវនាំគ្នាអនុវត្តតាមវិធានរបស់ក្រសួងសុខាភិបាល ដើម្បីចូលរួមទប់ស្កាត់​ការរីករាលជំងឺកូវីដ១៩នេះផងដែរ៕ ណុប រក្សា