ភ្នំពេញ៖ ក្រសួងសុខាភិបាល បានប្រកាសនៅយប់ថ្ងៃទី៤ ខែធ្នូ ឆ្នាំ២០២០ ថា ការអនុវត្តវិធានការសុខាភិបាល និងការធ្វើចត្តាឡីស័ក ចំពោះអ្នកដំណើរទាំងអស់ ចូលមកប្រទេសកម្ពុជា ត្រូវចាប់អនុវត្តពីថ្ងៃទី១២ ខែធ្នូ ឆ្នាំ២០២០ តទៅ។
ក្នុងសេចក្តីជូនដំណឹង ក្រសួងសុខាភិបាល ក៏បានប្រកាសផ្អាកជាបណ្តោះអាសន្ននូវការអនុវត្តយន្តការធានា ( Sponsorship Mechanism ) ចំពោះអ្នកដំណើរបរទេសជាវិនិយោគិន-ធុរជន បុគ្គលិកក្រុមហ៊ុន អ្នកជំនាញការ និងអ្នកបច្ចេកទេស ដែលទទួលបានការធានា ចូលមកប្រទេសកម្ពុជា រយៈពេលតិចជាង ១៤ថ្ងៃ។
យន្តការធានានេះ គឺជនបរទេស ជាវិនិយោគិន-ធុរជន បុគ្គលិកក្រុមហ៊ុន អ្នកជំនាញការ និងអ្នកបច្ចេកទេស ចូលមកកម្ពុជា គឺរង់ចាំតែពីរថ្ងៃប៉ុណ្ណោះ នៃការពិនិត្យសំណាករកមេរោគកូវីដ១៩ បើសិនជាលទ្ធផលអវិជ្ជមាន គឺគេអាចទៅធ្វើការងារនៅកម្ពុជា បានហើយ។ ប៉ុន្តែយន្តការនេះ ត្រូវបានសម្តេចតេជោ ហ៊ុន សែន ប្រកាសថា មានហានិភ័យខ្ពស់ក្នុងការចម្លងកូវីដ១៩ នៅកម្ពុជា។
ក្នុងសេចក្តីប្រកាស ក្រសួងសុខាភិបាល ក៏បានបង្ហាញអត្តសញ្ញាណអ្នកជំងឺកូវីដ១៩ បន្ទាប់ពីទទួលបានលទ្ធផលតេស្តកូវីដ១៩ វិជ្ជមាន ភ្លាម តាមបណ្តាញផ្សព្វផ្សាយផ្លូវការរបស់ក្រសួងសុខាភិបាល ដើម្បីងាយស្រួលក្នុងការស្វែងរកអ្នកពាក់ព័ន្ធ ឲ្យបានឆាប់រហ័ស ដើម្បីបង្កលក្ខណៈឲ្យអ្នកមានការពាក់ព័ន្ធនឹងអ្នកជំងឺកូវីដ១៩ ចេញមុខទាក់ទងមកក្រសួងសុខាភិបាល ឬអាជ្ញាធរពាក់ព័ន្ធ៕
ចែករំលែកព័តមាននេះ