(ភ្នំពេញ)៖ ក្រសួងសុខាភិបាល បានកំណត់យកពហុកីឡដ្ឋានជាតិអូឡាំពិក និងក្រសួងមហាផ្ទៃ ជាកន្លែងធ្វើតេស្ត លើកទី២ សម្រាប់អ្នកពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា។ ការធ្វើតេស្ត លើកទី២ នឹងធ្វើឡើង នៅថ្ងៃទី៨ ខែធ្នូ។
កាលពីរសៀលថ្ងៃទី៣ ខែធ្នូ លោក ឃួង ស្រេង អភិបាលរាជធានីភ្នំពេញ និងលោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានដឹកនាំក្រុមការងារបច្ចេកទេស ចុះពិនិត្យពហុកីឡដ្ឋានជាតិអូឡាពិក ដែលជាទីតាំងសម្រាប់ត្រៀមយកសំណាក អ្នកដែលពាក់ព័ន្ធនឹងព្រឹត្តិការណ៍សហគមន៍ ២៨ វិច្ឆិកា។
លោកស្រី យក់ សម្បត្ដិ រដ្ឋលេខាធិការក្រសួងសុខាភិបាលបានឱ្យដឹងថា ក្រសួងសុខាភិបាល បានប្រកាសដល់អ្នកពាក់ព័ន្ធផ្ទាល់ និងប្រយោល ជាមួយព្រឹត្តិការណ៍សហគមន៍ ២៨ វិច្ឆិកា អាចទៅធ្វើតេស្ត លើកទី២ នៅទីតាំង ២កន្លែង។ គឺទី១ នៅក្នុងក្រសួងមហាផ្ទៃ និងទី២ នៅពហុកីឡដ្ឋានជាតិអូឡាំពិក។ ការធ្វើតេស្ត លើកទី២ នឹងធ្វើឡើង នាថ្ងៃទី៨ ខែធ្នូ ឆ្នាំ២០២០។
ដោយឡែក លើកទី៣ នឹងធ្វើឡើង នៅថ្ងៃទី១២ ខែធ្នូ ឆ្នាំ២០២០ តាមទីតាំង ដែលបានកំណត់ សម្រាប់រាជធានីភ្នំពេញ គឺនៅក្រសួងមហាផ្ទៃ និងទីលានស្តាតអូឡាំពិក។
ពាក់ព័ន្ធនឹងព្រឹត្តិការណ៍សហគមន៍ថ្ងៃ២៨វិច្ឆិកា ត្រូវបានក្រសួងសុខាភិបាល ប្រកាសកាលពីព្រឹកថ្ងៃទី៣ ខែធ្នូថា គិតពីថ្ងៃទី២៩ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២០ ក្រសួងសុខាភិបាល បានធ្វើតេស្តអ្នកប៉ះពាល់ បានចំនួន ៨៧៦៦នាក់។ នៅក្នុងចំនួននេះ មានអ្នកវិជ្ជមានវីរុសកូវីដ១៩ ថ្មី សរុបចំនួន ១៩នាក់ ដែលកំពុងសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត។
គិតត្រឹមម៉ោង ៧ព្រឹក ថ្ងៃទី៣ ខែធ្នូនេះ នៅទូទាំងប្រទេសកម្ពុជា រកឃើញអ្នកឆ្លងជំងឺកូវីដ១៩ សរុប ៣៣១នាក់។ ក្នុងនោះ ៣០៤នាក់ បានជាសះស្បើយ និង ២៧នាក់ កំពុងសម្រាកព្យាបាលនៅមន្ទីរពេទ្យរដ្ឋ៕
ចែករំលែកព័តមាននេះ