សហរដ្ឋអាមេរិក ៖ រូបភាពគ្រូពេទ្យម្នាក់ដែលពាក់ស្រោមដៃ និងម៉ាសកំពុងតែអោបលួង អ្នកជំងឺ COVID-19 វ័យចំណាស់ម្នាក់ចំថ្ងៃបុណ្យ THINLSGIVING នៅអាមេរិកនាំឲ្យមានការក្ដុកក្ដួលនិងរំភើបបំផុត ដោយវាជានិមិត្តរូបនៃក្ដីអស់សង្ឃឹមរបស់បណ្ដាជនរងគ្រោះដោយសារជំងឺនោះ និងអារម្មណ៍ខ្លោចចិត្តអាណិតអាសូររបស់បុគ្គលិកព្យាបាល ។
រូបភាពនោះត្រូវបានគេថត កាលពីថ្ងៃ២៦ វិច្ឆិកា ចំថ្ងៃបុណ្យ THINLSGIVING ជាថ្ងៃជួបជុំសាច់ញាតិគ្រួសារនៅមន្ទីរពេទ្យ UNITEDMEMORIAL ក្រុងហូស្តុនរដ្ឋតិចសាស់ ដោយ
អ្នកកាសែតម្នាក់ ។ វេជ្ជបណ្ឌិត JOSEPH VARON ប្រមុខផ្នែកសង្គ្រោះបន្ទាន់នៃមន្ទីរពេទ្យUNITED MEMORIAL រៀបរាប់កាលពីថ្ងៃទី៣០ វិច្ឆិកា តាមទូរទស្សន៍ CNN ថា ខ្ញុំស្ថិតក្នុង
ក្រុម COVID ហើយខ្ញុំបានឃើញ អ្នកជំងឺវ័យចំណាស់នោះស្ថិតនៅក្រៅគ្រែ ដោយគាត់ចង់ចេញហើយគាត់យំផង ។
ខ្ញុំបានទៅជិតគាត់និងសួរគាត់ថា ហេតុអីបានជាយំ ? គាត់និយាយមកកាន់ខ្ញុំថា ខ្ញុំចង់នៅជាមួយប្រពន្ធខ្ញុំ។ ពេលនោះខ្ញុំបានឱបគាត់ ។ គ្រូពេទ្យរូបនោះបន្តថា ខ្ញុំមិនទាំងដឹងថាមានគេថតរូបនោះទេ ។ គាត់កំពុងតែយំហើយក្រោយមកក៏ឈប់យំវិញ ។ លោកគិតថាអ្នកជំងឹរូបនោះពិតជាមានអារម្មណ៍ឯកោខ្លាំង និងពោរពេញដោយភាពក្រៀមក្រំហើយរូបលោកក៏ដូចរូបគាត់ដែរ ។
តាមគ្រូពេទ្យរូបនោះថា អ្នកជំងឹវ័យចំណាស់នោះក្រោយមកមានសុខភាពប្រសើរវិញហើយគាត់អាចចេញពីមន្ទីរពេទ្យមុនដំណាច់សប្ដាហ៍នេះ ។
ដូចប្រទេសជាច្រើនលើពិភពលោកដែរសហរដ្ឋអាមេរិកកំពុងតែប្រឈមមុខនឹងរលកថ្មីនៃការឆ្លងរាលដាលខ្លាំងនៃវីរុស COVID-19 ចាប់តាំងពីច្រើនសប្ដាហ៍មកហើយ ។
តាមសេចក្ដីរាយការណ៍នាថ្ងៃទី២ ធ្នូថា ក្នុងប្រទេសនោះមានអ្នកបាត់បង់ជីវិតថ្មីដល់២.៥៦២នាក់២៤ម៉ោងចុងក្រោយនេះ ។ នោះជាចំនួនអ្នកបាត់បង់ជីវិតខ្ពស់បំផុតពុំធ្លាប់មានចាប់តាំងពីដំណាច់ខែមេសាមក ។ ក្រៅពីអ្នកបាត់បង់ជីវិត២៤ម៉ោងចុងក្រោយនេះនៅអាមេរិកក៏មានអ្នកឆ្លងវីរុសថ្មីដល់ជាង១៨០.០០០នាក់ នាំឲ្យចំនួនអ្នកឆ្លងសរុបកើនដល់ជាង១៣,៧លាននាក់ ជាមួយអ្នកបាត់បង់ជីវិតកើនដល់ជាង២៦៩.០០០នាក់ ។
លើពិភពលោកចំនួនអ្នកឆ្លងវីរុសបានឡើងដល់ជាង៦៣,៨លាននាក់ និងអ្នកបាត់បង់ជីវិតជាង១,៤៨លាននាក់ ។ បន្ទាប់ពីអាមេរិកប្រទេសរងការប៉ះពាល់ខ្លាំងជាងគេទី២លើពិភពលោកគឺ
ឥណ្ឌា ដែលមានអ្នកឆ្លងកើនដល់ជាង៩,៥លាននាក់ និងអ្នកបាត់បង់ជីវិតជាង១៣៨.០០០នាក់ ។ ប្រេស៊ីលអ្នកឆ្លងកើនដល់ជាង៦,៣៩លាននាក់ និងអ្នកបាត់បង់ជីវិតជាង១៧៤.០០០នាក់ ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ