ខេត្តស្វាយរៀង ៖ បុរសម្នាក់ត្រូវបានក្រុមគ្រួសារដឹកយកមកសង្គ្រោះនៅមន្ទីរពេទ្យបង្អែកខេត្តភ្លាមៗ បន្ទាប់ពីបុរសរូបនោះឡើងទៅលើដំបូលផ្ទះ ក្នុងគោលបំណងដូរដងអង់តែន ដែលធ្វើពីឫស្សី តែមិនប្រយ័ត្ន អង់តែនក៏ប៉ះត្រូវខ្សែកាបស្រាត
ខេត្តស្វាយរៀង ៖ បុរសម្នាក់ត្រូវបានក្រុមគ្រួសារដឹកយកមកសង្គ្រោះនៅមន្ទីរពេទ្យបង្អែកខេត្តភ្លាមៗ បន្ទាប់ពីបុរសរូបនោះឡើងទៅលើដំបូលផ្ទះ ក្នុងគោលបំណងដូរដងអង់តែន ដែលធ្វើពីឫស្សី តែមិនប្រយ័ត្ន អង់តែនក៏ប៉ះត្រូវខ្សែកាបស្រាត ដែលនៅចំណាយប្រមាណជាង៣ម៉ែត្រពីដំបូលផ្ទះ បណ្តាលឱ្យផ្ទុះឆេះរោលមួយចំហៀងខ្លួនតែម្តង ។ ហេតុការណ៍គួរឱ្យរន្ធត់នេះកើតឡើងកាលពីវេលាម៉ោង៨ព្រឹក ថ្ងៃទី១៥ ខែមិថុនា ឆ្នាំ២០១៥ ស្ថិតក្នុងភូមិទួលអង្គប់ ឃុំសំបួរ ស្រុកស្វាយទាប ខេត្តស្វាយរៀង ។
ឪពុកជនរងគ្រោះបានប្រាប់ឱ្យដឹងថា កូនប្រុសរបស់គាត់មានឈ្មោះអ៊ំ វ៉ាន់តាក់ អាយុ២២ឆ្នាំ រស់នៅភូមិឃុំកើតហេតុខាងលើ មានមុខរបរលក់ដូរ ។ បុរសដដែលបន្តទៀតថា មុនពេលកើតហេតុកូនប្រុសរបស់គាត់បានឡើងទៅលើដំបូលផ្ទះ ដើម្បីដូរដងអង់តែនដែលធ្វើពីដើមឫស្សី ព្រោះវាចាស់ណាស់ទៅហើយ ខ្លាចពេលមានភ្លៀងខ្យល់វាបាក់ធ្លាក់មកលើដំបូលផ្ទះ តែពេលកំពុងលើកដូរដងអង់តែននោះ អង់តែនខាងលើក៏បានប៉ះត្រូវខ្សែកាបស្រាត ដែលខាងអគ្គីសនីដាក់នៅពីលើដំបូលផ្ទះរបស់គាត់ ដែលគិតពីដំបូលទៅខ្សែកាបនោះមានចំងាយប្រមាណជា៣ម៉ែត្រប៉ុណ្ណោះ ។
នៅពេលអង់តែងប៉ះត្រូវខ្សែកាប ខ្សែកាបក៏ផ្ទុះលាន់ដូចរន្ទះ និងមានអណា្តតភ្លើងឆាបឆេះត្រូវកូនរបស់គាត់ដែលនៅខាងក្រោមខ្សែកាបនោះតែម្តង បណ្តាលឱ្យឆេះខ្លោចមួយចំហៀងខ្លួនតាំងពីក្បាលដល់ចុងជើងតែម្តង ។
ក្រោយពីឃើញដូច្នេះអ្នកជិតខាងក៏បានជួយយកកូនរបស់គាត់ទៅកប់ក្នុងដីមួយសន្ទុះ ទើបនាំគ្នាបញ្ជូនបន្តទៅមន្ទីរពេទ្យ ដើម្បីសង្គ្រោះ ។
មកដល់ពេលនេះជនរងគ្រោះបាន និងកំពុងសម្រាកព្យាបាលនៅមន្ទីរពេទ្យខេត្តស្វាយរៀង ។
គួរបញ្ជាក់ថា ឪពុករបស់ជនរងគ្រោះក៏ដូចជាប្រជាពលរដ្ឋ សូមអំពាវនាវដល់រាជរដ្ឋាភិបាល មន្ទីរ ឬស្ថាប័នពាក់ព័ន្ធទាំងអស់ ជាពិសេសអគ្គីសនីកម្ពុជា សូមមេត្តាចុះទៅពិនិត្យមើលបង្គោលភ្លើង ដែលដាក់នៅតាមមុខផ្ទះប្រជាពលរដ្ឋផង ព្រោះថា បង្គោលទាំងអស់នោះភាគច្រើនគឺដាក់នៅក្បែរផ្ទះរបស់ពួកគាត់ ដែលធ្វើឱ្យខ្សែកាប និងខ្សែភ្លើងទាំងអស់វាត្រូវអូសកាត់លើដំបូលផ្ទះរបស់ពួកគាត់តែម្តង ហើយដោយសារបង្គោលភ្លើងទាប ធ្វើឱ្យខ្សែទាំងនោះមានចំងាយមិនឆ្ងាយពីដំបូលផ្ទះរបស់ពួកគាត់ទេ តួយ៉ាងដូចករណីរបស់យុវជនអ៊ំ វ៉ាន់តាក ដែលត្រូវឆេះខ្លួនមួយចំហៀង ដែលបណ្តាលមកពីខ្សែកាបនៅជិតដំបូលផ្ទះពេក ធ្វើឱ្យពិបាកក្នុងការរស់នៅ ៕
ចែករំលែកព័តមាននេះ