រាជធានីភ្នំពេញ ៖ តាមព័ត៌មានបឋម គឺការធ្វើតេស្តកូវីដនៅក្រសួងមហាផ្ទៃ នាថ្ងៃទី២៩ វិច្ឆិកានេះ បានរកឃើញលទ្ធផលវិជ្ជមានទៅលើស្ត្រី២នាក់ ជាភរិយារបស់មន្ត្រីនៅនាយកដ្ឋានព័ត៌មានវិទ្យា និងអនុប្រធាននាយកដ្ឋានពន្ធនាគារ ឆ្លងជំងឺកូវីដ-១៩។ នេះបើយោងតាមលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល។
យ៉ាងណាមិញ តាមរយៈសារសំឡេងរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា នារាត្រីថ្ងៃទី២៩ វិច្ឆិកា នេះបានបញ្ជាក់ថា មកដល់ពេលនេះ រកឃើញការឆ្លងក្នុងក្របខណ្ឌក្រសួងមហាផ្ទៃ អគ្គនាយក អគ្គនាយកដ្ឋាននៃពន្ធនាគារ ចំនួន ៨នាក់ ហើយបើកូនស្រីរបស់ប្រធានអគ្គនាយក អគ្គនាយកដ្ឋានពន្ធនាគារ ដែលនៅសៀមរាប ឃើញវិជ្ជមាន ហើយត្រូវបានបញ្ជាក់នៅវិទ្យាស្ថានប៉ាស្ទ័រនោះវានឹងឡើងទៅដល់ ៩នាក់។
សម្តេចបានបញ្ជាក់ថា «ករណីនេះ គឺជាករណីធ្ងន់ធ្ងរមួយ ដែលចាប់ផ្តើមឆ្លងពីសហគមន៍តែម្តង ដោយយើងមិនដឹងថាប្រភពនេះចេញពីទីណាពិតប្រាកដ តើឆ្លងចេញពីសៀមរាប ឬឆ្លងចេញពីទីក្រុងភ្នំពេញ មកកាន់សៀមរាប។ ដោយមូលហេតុនេះហើយ បានជាយើងត្រូវធ្វើសកម្មភាពបន្ទាន់ ជាពិសេសនៅក្រុងភ្នំពេញ ដែលថ្ងៃនេះក្រសួងសុខាភិបាលបានខិតខំធ្វើទីតាំងជាច្រើន និងបណ្តាខេត្ត ជាពិសេសគឺខេត្តសៀមរាប»។
សម្តេចតេជោ ហ៊ុន សែន បានបន្ថែមទៀតថា «ក្នុងស្ថានភាពបន្ទាន់នេះ ខ្ញុំសូមអំពាវនាវចំពោះបងប្អូនទាំងឡាយ ឲ្យមកចូលរួមយកសំណាកដើម្បីធ្វើតេស្ត ហើយដាក់ខ្លួននៅក្នុងចត្តាឡីស័ក ១៤ថ្ងៃតាមការកំណត់របស់ក្រសួងសុខាភិបាល។ នេះជាបញ្ហាធ្ងន់ធ្ងរណាស់សម្រាប់យើង ដែលមិនធ្លាប់នៅក្នុងរយៈពេល ១១ខែ ដែលយើងបានឆ្លងកាត់តាំងពីដើមឆ្នាំរហូតមកដល់ពេលនេះ»។ សម្តេចនាយករដ្ឋមន្ត្រី បានបញ្ជាក់ថា «ឥឡូវនេះ ខ្ញុំបានពិភាក្សាជាមួយសម្តេចក្រឡាហោម ស ខេង សុំឲ្យគាត់បិទផ្នែកណាមួយរបស់ក្រសួងមហាផ្ទៃ ហើយអនុញ្ញាតឲ្យមន្ត្រីបានធ្វើការពីផ្ទះមកកាន់ស្ថាប័នតែម្តង»។
ក្នុងនោះផងដែរ សម្ដេចក៏នឹងផ្តល់ឲ្យរដ្ឋមន្ត្រីមានសិទ្ធិបិទផ្នែកណាមួយ ឬបិទទាំងស្រុងនូវក្រសួង ហើយដំណើរការធ្វើការពីផ្ទះ។ ព្រោះឥឡូវនេះ យើងឃើញថា រដ្ឋមន្ត្រីដែលមានការពាក់ព័ន្ធមានសម្តេច ស ខេង ត្រូវបានធ្វើតេស្ត និងដាក់ដាច់ដោយឡែក ១៤ថ្ងៃ រួមជាមួយក្រុមគ្រួសារអ្នកនៅជាមួយជាង ៩០នាក់។ មានរដ្ឋមន្ត្រីក្រសួងបរិស្ថាន សាយ សំអាល់ លោករដ្ឋមន្ត្រីក្រសួងទេសចរណ៍ ថោង ខុន រដ្ឋមន្ត្រីក្រសួងយុត្តិធម៌ លោក កើត រិទ្ធ និងមានរដ្ឋលេខាធិការ និងមន្ត្រីមួយចំនួនផ្សេងទៀត ដែលមានការពាក់ព័ន្ធ៕ ដោយ ៖ សហការី
ចែករំលែកព័តមាននេះ