រាជធានីផភ្នំពេញ ៖ អ្នកនាំពាក្យក្រសួងអប់រំ យុវជន និងកីឡា បានអះអាងថា ការប្រឡងសញ្ញាបត្រមធ្យមសិក្សាបឋមភូមិ (ឌីប្លូម) និងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប)…
រាជធានីផភ្នំពេញ ៖ អ្នកនាំពាក្យក្រសួងអប់រំ យុវជន និងកីឡា បានអះអាងថា ការប្រឡងសញ្ញាបត្រមធ្យមសិក្សាបឋមភូមិ (ឌីប្លូម) និងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) មិនមានការលើកពេលនោះទេ។
លោក រស់ សុវាចា អ្នកនាំពាក្យបានឲ្យកោះសន្តិភាដឹងនៅថ្ងៃទី២៩ វិច្ឆិកា ឆ្នាំ២០២០ ថា ការប្រឡងឌីប្លូមថ្ងៃទី៣០ វិច្ឆិកា ឆ្នាំ២០២០ ធ្វើឡើងតាមការគ្រោងទុកដោយប្រតិបត្តិវិធានការសុខាភិបាលខ្ជាប់ខ្ជួន ហើយការប្រលងបាក់ឌុបគិតត្រឹមពេលនេះនៅរក្សាកាលបរិច្ឆេទនឹងដំណើរការតាមការគ្រោងទុក។
លោកបន្តថា ក្រសួងនៅតែអនុវត្តតាមប្រសាសន៍របស់សម្តេចតេជោ ហ៊ុន សែន នាយករដ្ឋមន្ត្រី។ សូមជម្រាបថា ការប្រឡងបាក់ឌុបនឹងប្រព្រឹត្តទៅនៅថ្ងៃទី២១ ធ្នូ ឆ្នាំ ២០២០។
បើតាមការបញ្ជាក់របស់រដ្ឋមន្ត្រីក្រសួងអប់រំថា ការប្រឡងបាក់ឌុមនៅតែរិតបណ្តឹងដូចការប្រឡងឆ្នាំមុនៗដដែល។ ការធ្វើបែបនេះ កុំឱ្យបេក្ខជនមានការច្រណែនគ្នាថា ការប្រឡងសម័យកូវីដ ឬមិនកូវីដ។
សូមជម្រាបថា ក្រសួងអប់រំបានកំណត់យកថ្ងៃទី៣០ ខែវិច្ឆិកា សម្រាប់ការប្រឡងសញ្ញាបត្រមធ្យមសិក្សា បឋមភូមិ (ឌីប្លូម) និងថ្ងៃទី២១ ខែធ្នូ សម្រាប់ការប្រឡងបាក់ឌុប ។
គួរំឮកថា កាលពីពេលកន្លងទៅ អ្នកនាំពាក្យក្រសួងអប់រំ យុវជន និងកីឡា បានគូសបញ្ជាក់ថា សម្រាប់បេក្ខជនដែលបានចុះឈ្មោះប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបក្នុងឆ្នាំ២០២០នេះ គឺមានជាង១២ម៉ឺននាក់ ដែលនឹងចូលរួមប្រឡងនៅថ្ងៃទី២១ ខែធ្នូ ខាងមុខនេះ ។
អ្នកនាំពាក្យក្រសួងអប់រំ យុវជន និងកីឡា បានលើកឡើងថា បេក្ខជនដែលដាក់ពាក្យប្រឡងតាមរាជធានី-ខេត្តទូទាំងប្រទេស មានចំនួន ១២១,២០១ នាក់ ក្នុងនោះស្រីចំនួន ៦៣,៩៣៧ នាក់ ។ បេក្ខជនថ្នាក់វិទ្យាសាស្ត្រ 40,765 នាក់ (33.63%) ស្រី 23,636នាក់ និងថ្នាក់វិទ្យាសាស្ត្រសង្គម 80,436 នាក់ (66.37%) ស្រី 40,301 នាក់ ។ បេក្ខជនចំណេះទូទៅ 102,037 នាក់ (84.19%) បេក្ខជនស្វៃរិន 13,991 នាក់(11.54%)។ បេក្ខជនបំពេញវិជ្ជា 3,260 នាក់ (2.7%) និងបេក្ខជនស្វៃរិនបំពេញវិជ្ជា 1,913 នាក់ (1.58%) ។
បេក្ខជនសាធារណៈ 113,173 នាក់ (93.38%) ស្រី 59,833 នាក់ និងបេក្ខជនឯកជន 8,028 នាក់ (6.57%) ស្រី 4,104 នាក់, បេក្ខជនជ្រើសរើសភាសាអង់គ្លេស 120,605 នាក់ (99.51%) ស្រី 63,632 នាក់ និងបេក្ខជនជ្រើសរើសភាសាបារាំង 596 នាក់ (0.49%) ស្រី 317 នាក់។
ចំនួនមណ្ឌល 237 មណ្ឌល (កើន 35 មណ្ឌល) និងចំនួនបន្ទប់ 4,891 បន្ទប់ (កើន 167 បន្ទប់) ក្នុងនោះថ្នាក់វិទ្យាសាស្ត្រមាន 82 មណ្ឌល (កើន 7 មណ្ឌល) 1,651 បន្ទប់ និងថ្នាក់វិទ្យាសាស្ត្រ សង្គមមានចំនួន155មណ្ឌល (កើន២៨មណ្ឌល) ៣២៤០បន្ទាប់៕
ចែករំលែកព័តមាននេះ