ខេត្តត្បូងឃ្មុំ ៖ ដោយទទួលបានការណែនាំពីលោកឧត្តមសេនីយ៍ស្នងការនគរបាលខេត្ត ក្នុងការពង្រឹងសន្តិសុខ និងសណ្ដាប់ធ្នាប់សង្គម កម្លាំងសមត្ថកិច្ចបានធ្វើការបង្ក្រាបល្បែងស៊ីសងកូនយូគី ដែលប្រតិបត្តិការនេះបានធ្វើឡើងនៅវេលាម៉ោង១៧និង៣០នាទីថ្ងៃទី២៥វិច្ឆិកា ២០២០ នៅដីភូមិមួយកន្លែងក្នុងឃុំកណ្ដោលជ្រុំ ស្រុកពញាក្រែក ដោយបានឃាត់មេញៀនល្បែងម្នាក់ បញ្ជូនមកកាន់អធិការដ្ឋាននគរបាលស្រុកពញាក្រែកដើម្បីសួរនាំ ។
លោកវរសេនីយ៍ទោថាញ់ សុខវ៉ាត អធិការនគរបាលស្រុកពញាក្រែកឲ្យដឹងថា ប្រជាពលរដ្ឋល្អបានរាយការណ៍ដោយសម្ងាត់មកកាន់កម្លាំងសមត្ថកិច្ចមូលដ្ឋានឲ្យបានដឹងថាមានគេលេងល្បែងស៊ីសងដោយខុសច្បាប់ (លេងកូនសត្វ) នៅចំណុចភូមិកណ្តោលជ្រុំ ឃុំកណ្តោលជ្រុំ ស្រុកពញាក្រែក ក្រោយពីទទួលបាននូវសេចក្តីរាយការណ៍នេះកម្លាំងប៉ុស្តិ៍បានសហការជាមួយនឹងជំនាញព្រហ្មទណ្ឌស្រុកដោយចុះទៅមិនឲ្យក្រុមអ្នកញៀនល្បែងដឹងខ្លួនមុននោះទេ ។
លោកអធិការនគរបាលស្រុកពញាក្រែកបន្តឲ្យដឹងទៀតថា ជាលទ្ធផលសមត្ថកិច្ចយើងបាននាំខ្លួនឈ្មោះយ៉ុយ សុខលាន ហៅឡែន ភេទស្រី អាយុ៣៦ឆ្នាំ ជាតិខ្មែរ ជាមេស៊ីសងល្បែងដោយខុសច្បាប់(កូនសត្វរូបឆ្នាំទាំង១២) នៅភូមិកណ្តោលជ្រុំ ឃុំកណ្តោលជ្រុំ ស្រុកពញាក្រែក និងដកហូតវត្ថុតាងមួយចំនួនមានដូចតទៅ ក្រដាស់កូនសត្វឆ្នាំទាំង១២ មិនទាន់ហែក ចំនួន២៨ កាត់, ហាន់តោកូនសត្វចំនួន០១ និងតង់ក្រាល សម្រាប់អង្គុយលេងចំនួន០២ ក្រដាស់កូនសត្វដែលហែករួចចំនួន១០០,កៅអីជ័រចំនួន១០,ប្រាក់ចំនួន១៨, ០,០០០៛(ដប់ប្រាំបីម៉ឺនរៀល),កាបូបស្ពាយពណ៌ខៀវចំនួន០១,ទូរស័ព្ទដៃម៉ាកស៊ាំសុងពណ៌ខៀវចំនួន០១ ។
ជនសង្ស័យ និងវត្ថុតាង បញ្ជូនមកអធិការដ្ឋាននគរបាលស្រុកពញាក្រែក បានឃាត់ខ្លួនតាមបញ្ជារបស់ឯកឧត្តម ឡុង ហុកម៉េង ព្រះរាជអាជ្ញានៃអយ្យការអមសាលាដំបូងខេត្តត្បូងឃ្មុំ ដើម្បីកសាងសំណុំរឿងតាមនីតិវិធី ។
លោកអធិការនគរបាលស្រុកពញាក្រែកបញ្ជាក់ថា កន្លងមកស្ត្រីជាមេល្បែងស៊ីសងនេះធ្លាប់ត្រូវបានសមត្ថកិច្ចមូលដ្ឋានហៅមកសួរនាំ និងធ្វើកិច្ចសន្យាម្ដងរួចមកហើយឲ្យបញ្ឈប់នៅល្បែងស៊ីសងបែបនេះបន្តទៀត តែស្ត្រីនេះមិនរាងចាលនោះទេនៅតែបន្តសកម្មភាពលួចលេងដោយខុសច្បាប់ទើបសមត្ថកិច្ចចុះបង្ក្រាបតែម្ដង៕
ចែករំលែកព័តមាននេះ